Jean 10 - Nyanmien nde Ufle

Bua tuin'n i wun nyanndra

¹ Nanwle, swran ng'o si'an bua'm bé tuin'n i anuan'n nun b'o sin lika ufle wlu lo'n, o ti awiéfue nin kakadyéfue.

² Sannge swran ng'o sin anuan'n nun'n, i ye o ti bua tafue nion.

³ Swran ng'o nian anuan'n su'n, o tiké i anuan, bua'm bé ti i nen'n. Bua'm bé ti i lie, o fa bé dunman'n flefle bé, o fa bé fité guasu lo.

⁴ Ke wa fa bé kwlaa a fité lo'n, o dun mmua bé nyrun, bé su i su, afin bé si i nen'n.

⁵ Bé su'a swran wié su, sannge bé wanndii, afin bé si'e i nen'n.

⁶ Jésus bu nyanndra so'n kléé bé, sannge ba wu'an liké ng'o ken i nde klé bé so'n i wle.

Jésus ti Bua Tafue Kpa

⁷ Jésus sé bé ékun ke: Nanwle, n ti bua'm bé tuin'n i anuan.

⁸ Bé kwlaa nga bé duun mmua min nyrun'n, bé ti awiéfue nin kakadyéfue, sannge bua'm ba su'a bé su.

⁹ N lie'n, n ti anuan, swran ng'o sin min nun'n, oh fitéh nun, oh wluh, oh fitéh, ye oh nyanh didiwle.

¹⁰ Bua'm bé wuale, nin bé kunle, nin bé nunnunle ti ye awiéfue'n baa, sannge n lie'n ke o kô yô nan bua'm ba nyan nguan, nan ba nyan bé ti, nan bé wun a dyo bé fouun'n ti ye m balio.

¹¹ N lie'n, n ti bua tafue kpa, bua tafue kpa'n fe i wun tô i bua'm bé ti.

¹² Sannge bua sunianfue'n b'o ti'a bua tafue, bo bua'm bé ti'e i lie'n, ke o wun ke gbôklô'n su ba'n, o katyi b éwanndi. Gbôklô'n wa wlu bé nun, kpekuun ba bô a sanndi.

¹³ Sa ti b'o wanndi'n yele ke o ti dyunman difue b'o kunnde i sika, o man bua'm bé nde mienmen.

^14-15 N lie'n, n ti bua tafue kpa. Ke n Si si min bo n kusu n si n Si'n, i kunngba'n, n si m bua mun ye bé kusu bé si min. Ye n fa min wun man m bua mun.

¹⁶ M bua'm bé wié ô le bo bé nu'an tuin nga nun. San nh fah bé sofue mun ba, béh tih min nen, bé akpasua'n yôh kun ye bé tafue kun.

¹⁷ N Si klô min, min wun bo n fa man nan man nyan nguan ékun'n ti.

¹⁸ Swran fi kwla kpe'a min nguan'n i sin, m bobo n klun su ye n fa min wun maan. N kwla fa min wun man, ye n kwla nyan nguan ékun. Afin i so ye n Si kan kléé n ke n yôo.

¹⁹ Nde so'n ti, Juif'm bé buu bé wun nun ékun.

²⁰ Bé nun kpanngban bé sé ke: Liké wié su i su. I ti a satyi. ?Nzu ti ye an tié nde ng'o kan nion?

²¹ Wié'm bé sé ke: I nde ng'o kan'n, o fa'a swran bo asie usu a satyii'n i nde. ?Asie usu kwla tiké anyansifue nyinma?

Juif'm bé Jésus i blô yile

²² Ke wawa'n kpennin bo béh dih Nyanmien sua dan'n i Nyanmien sa nun wlale'n i tyen Jérusalem lo'n,

²³ Jésus wlanwlan ala'n bo bé flee Salomon'n i bô Nyanmien sua dan'n nun le.

²⁴ Juif'm bé kpe sin yielii, bé use i ke: ?Tyen ônin bo tye ye wo man é wla'n guah aséo? Se wo ye a ti Christ'n, di i nanwle wéiin klé é.

²⁵ Jésus sé bé ke: N kan kléé amun laa, amuan lafi'a n su. Sa nga n Si dunman nun n yô bé'n, bé ti n lalôfue.

²⁶ Sannge an lafi'a n su, afin an nu'an m bua'm bé nun wié.

²⁷ M bua'm bé ti n nen, n si bé, ye bé su n su.

²⁸ M man bé anannganman nguan, bé su nunnu'an lé, ye swran fi su dé'a bé n sa nun.

²⁹ N Si b'o fa bé maan min'n i dan'n tra liké'n kwlaa, ye swran fi kwla dé'a bé i sa nun.

³⁰ Man nin n Si é ti kun.

³¹ Juif'm bé faa yebue ékun ke bé fa fiin.

³² Jésus sé bé ke: M man wunnin sa kpakpa bo n yô bé n Si fanngan nun'n. ?Sa so'm bé nun ônin ti ye man amun waan amunh finh n yebue kun mion?

³³ Juif'm bé sé i ke: Nanh ke sa kpa bo a yôli'n ti ye é waan éh kunh o, sannge Nyanmien dunman bo a satyi, ye o bo a ti swran bo a yô o wun ke a ti Nyanmien'n, i ti ye é waan éh kunh oo.

³⁴ Jésus sé bé ke: ?Ba kle'e amun mmla'n nun ke Nyanmien sé ke: «An ti ke Nyanmien sa.»?

³⁵ É si ke swran fi kwla nunnu'an Nyanmien nde nga bé kleli'n. Bé klee ke bé nga Nyanmien fe i mmla'n maan bé'n bé ti ke Nyanmien sa.

³⁶ ?Se o ti so'n, m bo Nyanmien fa min sié ke n di i dyunman'n b'o sunmaan min men'n nun'n, ke n sé ke n ti Nyanmien Wa'n, nzu ti ye an sé ke n satyi Nyanmien dunmaan?

³⁷ Se n yô'a sa nga n Si yô bé'n, nanh an lafi n su!

³⁸ Se n yô bé'n, kannze an lafi'a m bobo n su'n, sannge anh lafi sa so'm bé su nan amuan wun i wle kpa ke min nin n Si é ti swran wunmuan.

³⁹ I so'n ti, bé baa ékun, bé waan béh treh, sannge o flôô bé sa nun.

⁴⁰ Jésus oo Jourdain'n sin lo ékun, lika nga Jean yôô swran'm bé baptême lo laa'n, o traan lo.

⁴¹ Swran kpanngban bé bee i wun le, bé sé ke: Jean wa yi'a atre fi, sannge bian nga i wun nde ng'o kannin'n, i kwla so'n ti nanwle.

⁴² Ye swran kpanngban bé lafii i su lika so'n nun le.