Jean 1 - Nyanmien nde Ufle

Nde'n i swran katyile

¹ Nde'n wô le lalaa i sin nan Nyanmien a bô ninngé'm bé yile bô, Nde'n nin Nyanmien bé ô le, Nde so'n ti Nyanmien.

² O nin Nyanmien bé ô le lalaa.

³ I ye Nyanmien man o yii ninngé'n kwlaaa, liké fi nu'an le bo nenh i ye o yilio.

⁴ I sa nun ye nguan'n wôo, nguan so'n ti ke wia'n sa, o man swran'm bé wun asé.

⁵ Ye i kpadyale'n kpadya lika'n b'o ti aôsin'n nun, aôsin'n wa kwla nuenmen.

⁶ Nyanmien sunmaan bian kun, bé flee Jean.

⁷ O baa liké b'o man swran'm bé wun asé'n i nde kanle nan swran'n kwlaa bé lafi Nyanmien su i nde so'n ti.

⁸ Nenh i bobo ye o ti liké b'o man swran'm bé wun asé nion, sannge o baa liké so'n i nde kanle.

⁹ Liké so'n ye man swran'm bé wun asé sakpaa. Ke o baa men'n nun'n, o man swran'n kwlaa bé wun asé.

¹⁰ O ô men'n nun laa, i ye Nyanmien man o yii men nion, sannge menfue'm ba simen.

¹¹ O bee i bobo nvlé'n nun, ba so'e i nun.

¹² Sannge bé kwlaa nga bé soo i nun bo bé lafi i su'n, o man bé katyi Nyanmien wa.

¹³ Nyanmien wa bo bé ti'n, ba wu'a bé ke bé fa wu ba'n sa, b'o fin yasua nin bla bo bé klô ke béh nyanh ba'n, sannge Nyanmien bobo ye o wuu béo.

¹⁴ Nde so'n katyii i wun swran, o nin é wa trannin, o ti aklunyéfue nin nanwlefue. É nieen i anyrunnyan'n, o ti anyrunnyan bo se Ba b'o ti kunngba'n i Si meon o ti su.

¹⁵ Jean keen i nde o kpan sé ke: I ye n keen i nde ke, swran ng'o ô sien o su ba'n, o le nyrun tra min nion, afin o ô le i sin nan ba wu min.

¹⁶ É kwlaa é nyeen i liké kpakpa'n wié, o yô é yé nan wa yô é yé ékun.

¹⁷ Moïse ye Nyanmien man o fa mmla'n maan yéo, Jésus-Christ kusu ye o fa yé yôle'n nin nanwle'n balio.

¹⁸ Swran fi nian wu'an Nyanmien lé. San i Wa kunngba'n b'o nin i ti kun b'o ti i awlen su ba'n, i ye man é sii io.

Jean baptême yôfue'n i Jésus nde kanle

¹⁹ Anh nian i nun nga Jérusalem Juif'm bé yii Nyanmien nyrun dyranfue nin Lévifue mun ke bé kô usa Jean ke, wan yele i'n, nde ng'o kannin'n ye.

²⁰ Wa si'a akplôwa, o ken wéiin kléé bé ke, nenh i ye o ti Christ nion.

²¹ Ye bé use i ékun ke: ?Wuun, wan yele o? ?Élie yele o? O sé bé ke, nenh i yele i. ?Nyanmien nuan idyofue'n yele o? O sé bé ke: Tyetye.

²² O man bé use i ke: ?O kpa'n, wan yele o? Bua é wié man é wun nde nga é kô kan klé bé nga bé sunmaan yé'n. ?A bu o wun se?

²³ O sé ke, i ye o ti swran bo «O kpan blô lo o sé ke: Anh yô é Min'n i akpo'n séiin, anh tréké su» nion. Nde so'n ye Nyanmien nuan idyofue Ésaïe kannin nion.

²⁴ Bé nga bé sunmaan bé'n, bé wié'm bé ti Pharisifue (*f4*),

²⁵ bé usaa Jean ke: ?Se a ti'a Christ nin Élie nin Nyanmien nuan idyofue'n, nzu ti ye a yô swran'm bé baptême nion?

²⁶ Jean sé bé ke: N lie'n, n yô swran'm bé baptême nzué'n nun. Swran kun ô amun nun bo an simen,

²⁷ o ô sien o su ba. Min nin i ngbabua nyanman'n i nyanndyile fataman.

²⁸ Bé yôô i so sa'n Béthanie b'o ô nzué ba bo bé flee Jourdain'n i sin lo, lo ye Jean yô swran'm bé baptême nion.

Anh nion Nyanmien Bua Gbanflen'n

²⁹ Ke alie tyennin'n, Jean wuun Jésus o su be i wun le, o sé ke: Anh nian Nyanmien Bua Gbanflen'n b'o wa fe i wun yi men'n i ti te'n ye.

³⁰ I ye n keen i nde ke, swran kun ô sien o su ba, o le nyrun tra min nion, afin o ô le i sin nan ba wu min.

³¹ Laa n si'a swran so'n, sannge m ba ke m ma yô swran'm bé baptême nzué'n nun nan Israëlfue'm bé sii.

³² Jean keen i nde ékun ke: N wuun Nyanmien Wawe'n, o fin nyanmien su lo ke aublé sa, o wa treen i su.

³³ Laa n simen, sannge Nyanmien b'o sunmaan n ke m ma yô baptême so'n, o sé n ke: Swran nga a wun ke n Wawe'n o dyra o wa tren i su'n, i ye oh fah n Wawe'n yô swran'm bé baptême nion.

³⁴ N lie'n n wunniin, ye man n sé ke, i ye o ti Nyanmien Wa nion.

Jésus i sonnzonfue klikli mun

³⁵ Ke i alie tyeen ékun'n, Jean nin i sonnzonfue'm bé nun nnyon bé ô le ékun.

³⁶ Ke o wuun Jésus b'oh sinh'n, o sé bé ke: Anh nian Nyanmien Bua Gbanflen'n ye.

³⁷ Ke i sonnzonfue nnyon so'n bé tii nde so'n, bé suu Jésus su.

³⁸ Jésus kpeh i nyion… bé su i su, ye o usa bé ke: ?Nzu ye an kunndeo? Bé use i ke: ?Rabbi, a tran nin? — Rabbi'n i bô yele ninngé kléfue.—

³⁹ O sé bé ke: Anh bla'a nian. Bé oli bé kô si i tranwle'n, bé tren i wun lo lélé lika'n duun bé. Ke béh koh so'n, wuun lika'n wa katyi nnosua nun.

⁴⁰ André b'o ti Simon Pierre i niaan'n o ti swran nnyon bo bé ti nde nga Jean kannin bo bé suu Jésus su'n, bé nun kun.

⁴¹ O kô tôô i niaan Simon, o sé i ke: Ya wun Messie'n bo i bô yele Christ'n (*f1*).

⁴² O fe oo Jésus wun lo. Ke Jésus wunniin'n, o sé ke: Bé fle o Simon, a ti Jean wa, ke o fin nde'n, béh fleh o Céphas, bo i bô yele Pierre.

Jésus flee Philippe nin Nathanaël

⁴³ Ke i alie tyeen ékun'n, Jésus waan oh koh Galilée men'n nun, nan wa wun Philippe, o sé i ke: Bla'a su n su.

⁴⁴ Philippe fin André nin Pierre bé klo Bethsaïda lo.

⁴⁵ Philippe kô tôô Nathanaël, o sé i ke: Ya wun swran nga é kenngen i nde Moïse mmla fluwa'n nin Nyanmien nuan idyofue'm bé lie'n nun'n, yele Jésus b'o fin Nazareth, Joseph wa'n.

⁴⁶ Nathanaël sé i ke: ?Nazareth ôle ng'o ô le'n, liké kpa kun ô lo? Philippe sé i ke: Bla'a nian.

⁴⁷ Ke Jésus wun Nathanaël ke o su be i wun le'n, o ken i nde ke: Anh nian, Israëlfue kpa kun ye oh bah ye'n, o ti'a gblefue kaan sa.

⁴⁸ Nathanaël use i ke: ?A si min nin? Jésus sé i ke: Ke Philippe nian fle'a o bo a ô blofue aloma'n bô lo'n, ye n wuun woo.

⁴⁹ Ye Nathanaël sé i ke: Baba, wo ye a ti Nyanmien Wa nion, a ti Israël'm bé famien.

⁵⁰ Jésus sé i ke: Ke bo n séé o ke, n wuun wo blofue aloma'n bô lo'n ti ye a lafi n suo. Sa nga a wa wun bé'n, bé wa bô o nuan tra nga!

⁵¹ Nanwle, an wa wun nyanmien su lo, o ti tikéwa ye amunh wunh Nyanmien i ange mun bo bé fu bé dyra m bo n katyii Swran'n n su.