Jacques 5 - Nyanmien nde Ufle

Anyanbéunfue'm bé afotue manle

¹ Anya béunfue mun, anh sié amun su! Nyrennen b'o wa to amun su'n ti, anh bô auyé, anh sun!

² Amun ninngé'm ba satyi, kakaa'm ba di amun trale mun.

³ Amun sika okwle'n nin amun dyete ufué'm ba dun, i dunle so'n oh yiyih amun bô, oh yrah amun ke sin sa. Men nga ya dyu i bué nuan ye'n, amuan tian amun ninngé'm bé nuan!

⁴ Bé nga bé di amun fié'n su dyunman, bo amuan tu'a bé kale'n, anh tié bé kpanle'n. Bé nga bé kpe amun awié'n bé kpan lélé bé nen'n tô é Min Anannganman Nyanmien Kpli'n lo.

⁵ An di amun klun liké, an di men'n, o man amuan yô ke nnen bo wa lô kpa bo i kunle a dyu sa.

⁶ An buu bé nga bé ti swran kpa'n bé fo, an kuun bé, bé nin amun a kpliman.

Bé awlen trale nin Nyanmien yale kôkô kléle

⁷ I so'n ti, aniaan mun, anh tra amun awlen lélé mon o fa dyu é Min'n i bale. Anh nian fié difue mun, bé tra bé awlen lélé bé nyan bé fié'n su liké kpakpa. Bé tra bé awlen lélé kôfié bôle nzué'n nin wawa nzué'n o to su.

⁸ Amun kusu, anh tra amun awlen, anh dyran kéklé, afin é Min'n i bale'n wa mantan.

⁹ Aniaan mun, nanh an kan amun wiéngu wun nde, man Nyanmien bu amun fo, afin i ye o ti Dyole Difue nion, o dyin anuan'n sin.

¹⁰ Aniaan mun, Nyanmien nuan idyofue bo bé kan nde é Min'n i dunman nun'n, ke béh kléh bé nyrennen'n bé tra bé awlen. Anh nian bé lie'n su.

¹¹ Bé nga bé dyraan kéklé'n, é sé ke, bé lie su ti yé. An tii Job i awlen b'o trelii'n, ye an wuun i agualie nga é Min'n mon o guelii'n, afin swran yô é Min'n i annvo, o si bé aunnvue.

¹² N niaan mun, sa ng'o ti tyinndyin kpa'n yele ke, nanh an fle nyanmien'n, nin asie'n, nin liké wié fi bé di. Sannge se an sé ke, iyô'n, mon o ka su, ye se an sé ke, tyetye'n, mon o ka su nan ba fa'a amun a oman Nyanmien dyasu.

¹³ Se nyrennen ô amun nun wié su'n, mon o kôkô klé Nyanmien. Se amun nun wié klun ti dyowa'n, mon o tô dyué manman Nyanmien.

¹⁴ Se amun nin wié wunnen yô i ya'n, mon o fle asonun kpenngben mun. Man bé gue i su ngô é Min'n i dunman nun, ye bé sre Nyanmien ke o yô i dyuédyué.

¹⁵ Nyanmien su bo bé lafi'n ti, Nyanmien srele so'n man tukpatyefue so'n nyenh i ti, ye é Min'n man oh dyasôh. Ye se o yôô sa wié'n, oh yatyih tyee.

¹⁶ I so'n ti, ke o yô nan amuan yô dyuédyué'n, anh kan sa nga an yôli'n klé amun wiéngu, anh sre Nyanmien man amun wun ke o man amun dyasô. Se swran kpa kun sre liké Nyanmien sa nun b'o dyran su kpa'n, i srele so'n yô sa yé dan.

¹⁷ Élie ti swran ke é sa. O sree Nyanmien dyran su kpa ke, nanh man nzué'n to, ye nzué'n dyraan lélé afue nsan anglô nsien.

¹⁸ I sin o sree Nyanmien ékun ke, man nzué'n to. O toli nan ninngé'm ba yô yé.

¹⁹ N niaan mun, an si ke, se amun nun swran wié yatyi atin kpa'n b'o fa'a nde nanwle'n su kun'n, nan swran wié klé i atin kpafue'n,

²⁰ swran so'n b'o klé sa te yôfue i atin kpa'n, oh dééh wié'n sa nun, ye o man i wun sa kpanngban'n béh wiéh.