Jacques 2 - Nyanmien nde Ufle

Nanh an bu swran'n wié kpa tra wié

¹ N niaan mun, ke an lafi é Min Jésus-Christ b'o le nyrun dan'n i su'n, nanh an bu swran'n wié kpa tra wié.

² Man é sé ke wiénuon amuan o asonun, kpekuun swran wié a wlu lo, sika nga ô i sa, trale klaan wle i wun, ye swran wié kusu i wun trale srasra wa wlu lo.

³ Se an bu ng'o wla trale klaan'n i swran bo an sé i ke: Tran lika kpa nga nun wa! ye an sé yalefue'n kusu ke: O lie'n, dyran le! annze: Tran asie wun m bia'n wun le'n,

⁴ wuun an bu amun nun wié kpa tra wié, amuan yô akunndan te bufue.

⁵ N niaan kpa mun, anh sié amun su! ?Nyanmien a fa'a men nga nun yalefue mun ke bé yô anyanbéunfue i su bo bé lafi'n ti nan bé di famien nga i waan bé nga bé klôé'n, bé di'n wié?

⁶ Sannge amun lie'n, an bu'a yalefue'm bé swran. ?Nanh anyanbéunfue mun ye bé mianmian amun, bé fa amun ko dyole difue'm bé dyasu nion?

⁷ ?Nanh bé ye bé satyi swran nga i dunman fe'n wô amun su'n i dunman nion?

⁸ Nanwle, se an fa mmla nga wié nu'en i sin, bo bé klee Nyanmien Nde'n nun ke: «Klô o wiéngu ke a fa klô o bobo wun'n sa'n» su'n, o ti kpa.

⁹ Sannge se an bu swran'n wié kpa tra wié'n, wuun amuan yô sa te. Ke bé nian mmla'n nun'n, bé wun ke amuan ton mmla'n.

¹⁰ Afin swran ng'o fa mmla'n kwlaa su b'o yatyi kun'n, wuun wa satyi i kwlaa.

¹¹ Swran ng'o séé ke: «Nanh kunnde bla o yi bô annze bian o wun bô'n,» i kunngba'n séé ke: «Nanh kun swran.» O man se a kunnde'a bla o yi bô annze bian o wun bô, sannge a kun swran'n, wuun w'a satyi mmla'n.

¹² Ke bé wa dyran mmla b'o man é nyan é ti'n su di dyole'n ti, o man nde nga amunh kanh'n, nin liké nga amunh yôh'n, anh yôé i nuan su.

¹³ Afin ke Nyanmien dih bé nga bé si'a swran aunnvue'n bé dyole'n, o su si'a bé aunnvue. Se aunnvue sile'n nin fo bule'n bé ti swran'n, wuun aunnvue sile'n kwla fo bule'n.

Nyanmien sulafile nin liké nga swran yô'n

¹⁴ ?N niaan mun, se swran kun sé ke o lafi Nyanmien su, sannge bé wu'en i so i nzuen'n nun'n, nzu yé ye o yô men io? ?I Nyanmien sulafile so'n kwla déé?

¹⁵ Man é sé ke wiénuon é niaan bian annze é niaan bla kun le'a trale, o le'a alie.

¹⁶ ?Se amun nun kun sé i ke: Mon o wun dyo o fouun, man a nyan tannin kla, mon o ku yi! sannge o me'en liké nga i sa mien i wun'n, nzu yé ye wa yô a men io?

¹⁷ Swran ng'o lafi Nyanmien su'n, ke i kusu ti soo, se sa ng'o yô bé'n bé ti'a kpa'n, wuun i Nyanmien sulafile'n ti ngben.

¹⁸ Wiénuon swran wié wa sé n ke: O lie'n, a lafi Nyanmien su, ye n kusu, n yô be'n m ma fa klé o ke n lafi Nyanmien su.

¹⁹ A lafi su ke Nyanmien ti kunngba tye, o ti nanwle. Mmusu'm bé kusu bé lafi su so wié, o man bé wun usu bé.

²⁰ Ééé, swran finfinfue! ?A klô ke a wun i wle ke swran ng'o sé ke o lafi Nyanmien su, sannge o yô'a sa kpakpa'n, i Nyanmien su b'o lafi'n o yô'a sa fi yé?

²¹ ?Ke é nannan Abraham fee i wa Isaac ke o fa so Nyanmien'n, wa bu'e i swran kpa i sa so'n ti?

²² ?An wunmen? I Nyanmien sulafile'n nin i sa kpa yôle'n bé san nun, o man i Nyanmien sulafile'n i nyin fitéé wéiin i sa kpa b'o yôli bé'n ti.

²³ Ke o yôô so'n, o man Nyanmien Nde nga bé kleli'n o kpeen su, bé klee ke: «Abraham lafii Nyanmien su, o man i su b'o lafi'n ti, o bulii swran kpa.» Ye Nyanmien flelii i dyanvue.

²⁴ ?An wunmen? Nanh swran i Nyanmien su b'o lafi'n ngunmin ti ye o bu i swran kpaa, sannge sa kpa ng'o yô bé'n bé ô nun wié.

²⁵ ?Ke Rahab téklé bla'n sikéé Juif'm bo bé sunmaan bé'n, b'o man bé fa atin ufle oli'n, Nyanmien a bu'e i kusu swran kpa i sa so'n ti?

²⁶ Se swran kun ô sa, b'o dé'a wunmien'n, wuun wa wu. I kunngba'n, se swran kun sé ke o lafi Nyanmien su bo bé wunmen i so i nzuen'n nun'n, wuun i Nyanmien sulafile'n ti ngben.