Jacques 1 - Nyanmien nde Ufle

Nvlé blu-nin-nnyon'n bé liké yôle

¹ N Jacques bo n ti Nyanmien nin é Min Jésus-Christ bé swran'n, nh yôh nvlé blu-nin-nnyon bo ba sanndi men wunmuan'n nun'n bé liké.

Sa b'o to swran su'n nin ngwlele

² N niaan mun, sa fanunfanun ng'o to amun su'n, anh bui amun tyéndyélé liké,

³ afin an si ke, ke an lafi Nyanmien su, bo bé sa amun nian'n, ye man an katyi swran b'o tre i awleon.

⁴ Anh tra amun awlen lélé gue i ti nin i bô nan amuan yô swran, ye liké fi su mia'an amun.

⁵ Se ngwlele'n wa ti'a amun nun wié kpa'n, mon o kan klé Nyanmien bo i sa ti'a tankaan'n, b'o fa liké man swran'n kwlaa, o idyo'e i sin'n. O man swran so'n oh wunh sa wle.

⁶ Sannge ke oh kanh kléé'n, mon o lafi i su. Nanh mon o sié i nyin nnyonnyon, afin swran ng'o lafi'e i su kpa'n, o ti ke dyénvié'n bo aunngban'n kpe su, b'o man o kédyé ko wa ko wa'n sa.

⁷ I sofue'n, nanh mon o bu ke é Min Nyanmien'n menh i liké.

⁸ O ti swran bo i akunndan'n ti nnyonnyon. I sa'n kwlaa nun o katyikatyi.

⁹ Aniaan ng'o ti yalefue'n, mon o fa nyrun bo Nyanmien man wa nyen'n, di i nuan.

¹⁰ Ye anyanbéunfue'n kusu, ke Nyanmien klé i ke o ti yalefue'n, mon o fe i yale'n di i nuan. Afin anyanbéunfue'n ti ke waka nyre sa, o tyeman.

¹¹ Wia'n fi, o bôé fiaan, i nyre'n gua, kpekuun i nyrunnyan'n wa kpa. Ke anyanbéunfue'n kusu o wa yatyi i ninngé ng'o yô bé'n kpe kpô wu soo

Lakale

¹² Swran nga sa to i su b'o tre i awlen'n, i lie su ti yé. Afin ke Nyanmien wun ke o tre i awlen sa so'n nun'n, oh fah nguan b'o ti liké kpa, bo i waan oh fah man bé nga bé klôé'n, men.

¹³ Se bé laka swran kun'n, nanh mon o sé ke, Nyanmien ye o leke io. Afin bé kwla laka'a Nyanmien sa fi nun, ye i bobo laka'a swran fi.

¹⁴ Sannge swran kun i lakale'n fin i bobo i kônvi'n, ye man bé leke bé nyen io.

¹⁵ Se kônvi'n ti swran'n, wuun éh séh ke, o wunnze, o wu sa te'n. Ke sa te so'n i nyin kô ti kpa'n, i liké b'o su i su'n yele wié'n.

¹⁶ N niaan kpa mun, nanh an laka amun wun.

¹⁷ Liké kpa kwlaa nga bé fa man swran'n, nin liké kpa kwlaa nga bé nyen'n, bé fin é Si b'o ô nglô lo, b'o yii anglô'n, nin nzraama, nin wia'n bo bé kpadya'n. I lie'n o katyi'a mlonmlon, o kpe'e i wun ke lôle b'o kpe i wun'n sa.

¹⁸ I nde nanwle'n ti o fa é katyi i wa i klun klô su, nan ya yô liké kwlaa ng'o yii bé'n, bé nun klikli.

Nyanmien Nde'n su fale

¹⁹ N niaan kpa mun, anh bu nde nga akunndan! Man swran'n kwlakwla bé sié bé su bé tié nde nga bé kan'n kpa, nanh man swran fi kan nde ndende, nanh man bé fa ya ndende.

²⁰ Afin se swran fa ya'n, o kwla yô'a sa ng'o ti kpa'n Nyanmien nyrun.

²¹ I so'n ti, anh wla nzuen tete'n nin klunwi'n kwlaa bé asé. Anh yô amun wun aénvue, anh fa nde nga Nyanmien kan klé amun'n su. I ye man amunh nyanh amun tio.

²² Nyanmien nde nga an ti'n, anh lafi su. Se an tiéé ngben bo an fa'a su'n, wuun an su laka amun wun.

²³ Afin se swran kun ti Nyanmien nde'n b'o fa'a su'n, o ti ke swran b'o nien i nyrun niannun nun sa.

²⁴ Ke o kô nian nun bo wa o'n, kpekuun i wla a fi i wafa ng'o ti'n.

²⁵ Sannge swran ng'o nian Nyanmien mmla'n b'o ti niannun kpa, b'o man swran'm bé nyan bé ti'n nun'n, b'o nian nun tititi'n, bo ke o ti mmla'n i wla fiman, sannge o fa su'n, Nyanmien man liké ng'o yô'n, oh yôh yé.

²⁶ Se swran kun bu i wun ke o su Nyanmien, sannge o sié'e i nuan'n diin'n, i Nyanmien sule'n ti ngben, o su leke i wun.

²⁷ Nyanmien sule b'o ti kpa bo fien fi nu'en i wun é Si Nyanmien mien nyrun'n, yele aika nin angbôti mmla'm bo bé wun nyrennen'n, bé lika nianle, nin bé wun su nianle men nun sa tete yôle'm bé nun.