Hébreu 9 - Nyanmien nde Ufle

Sa nga bé yôé laa man bé wun sa'n wié'n, nin sien lie'n

¹ Sa nga Nyanmien yô maan swran laa'n o le i Nyanmien sule'n su mmla nin i sua asie'n su wa.

² Afin bé kplannin tannin sua kun, i nun sua ba klikli'n, bé fle Nyanmien lika. Kannin, nin table, nin kpaun nga bé fa teke Nyanmien nyrun'n bé ô lo.

³ Ye tannin i nnyon su'n i sin lo sua ba lie'n bé flee Nyanmien lika kpa.

⁴ Lika ng'o ti sika okwle, bo bé yra ayré fannin su'n, nin alaka bo bé fa sa nga Nyanmien waan oh yôh man swran'n bé kle fa siéé nun'n, bo bé klô sika okwle guee i wun'n bé ô lo. Sika okwle sema'n bo manne'n (*f29*) wô nun'n, nin Aaron kponman b'o fefeli'n, nin yebue paplaapla bo bé kle sa nga Nyanmien waan oh yôh man swran'n bé su'n, bé ô alaka so'n nun.

⁵ Chérubin (*f43*) bo bé yi Nyanmien i wafa ng'o ti'n i nglô'n bé ô alaka so'n su, bé ndewa'n kata Nyanmien sowle'n su. Sannge nenh i kanle'n i nun yiyile i tyen yele nde.

⁶ Ke bé siésiéé ninngé so'n bé kwlaa so'n, tyen'n kwlaa Nyanmien nyrun dyranfue'm bé wlu su ba klikli'n nun bé di bé dyunman'n.

⁷ Sannge sua ba i nnyon su'n, Nyanmien nyrun dyranfue dan'n i ngunmin ye o wlu lo afue kun nun kpe kuon. Ke oh wluh lo'n, san oh feh i bobo i ti nnen'n i mmôdya'n nin swran'm bé fonle'n i ti nnen'n i mmôdya'n ye o wlu loo.

⁸ Nyanmien Wawe'n fe i so sa'n klé é ke, ke tannin sua klikli lie'n te ô le'n, wuun atin ng'o ko Nyanmien lika kpa'n nun lo'n nian bôman.

⁹ O ti ble nga é ô nun ye'n lie'n i sonnzon su. O klé ke liké nga bé fa man Nyanmien'n nin nnen ng bé fa soe'n, o man bé nga bé men i so liké'n bé klun titile'n wiéman.

¹⁰ Afin bé ti swran liké dile, nin liké nonnonle, nin wunnzinle fanunfanun bé su mmla bo bé di su lélé fa dyuu tyen nga Nyanmien katyi liké'n kwlaa ufle'n.

¹¹ Sannge Christ bali, o wa yôô Nyanmien nyrun dyranfue dan ninngé kpakpa bo bé wa ba'n bé ti. Tannin sua ng'o di i dyunman nun'n ti dan, o ti kpa tra laa lie'n. Nanh swran ye o kplannion, o man o ti'a men nga Nyanmien yii i ye'n i nun liké'm bé wié.

¹² Ke Christ wluh Nyanmien lika kpa'n nun'n, nanh bôli kpakpue nin nannin ba mmôdya ye o fa olio, sannge o fe i bobo i mmôdya'n, o wluu lo kpe kun, o su wlu'a lo kun, o man o déé é ti mlonmlon.

¹³ Bé fa bôli kpakpue nin nannin tôla'm bé mmôdya'n nin nannin talua bo bé yre'n i nzuen'n fa kpentenkpenten bé nga bé kan fien'n bé wun, bé fa bô bé wun asô.

¹⁴ Se o ti so'n, Christ kwla fe i mmôdya lie'n kusu yô liké b'o tra wun asô bôle'n fatifati! Ke o ti aôlia nun swran b'o ti anannganman'n ti'n, o fe i bobo bo fien kaan nu'en i wun'n maan Nyanmien. O man liké nga bé yô'a liké fi yé bo é yô bé man é klun titi yé'n, oh wiéh nan é kwla su Anannganman Nyanmien'n!

¹⁵ I so'n ti ye o ti sa ufle nga Nyanmien waan oh yôh man swran'n i nun dyranfue nion. I wule b'o wuli'n ti o dé bé nga bé fa sa klikli nga Nyanmien waan oh yôh man swran'n su'n bo bé yô sa te'n, i sae'n nun. O man bé nga Nyanmien flee bé'n béh nyanh liké kpakpa ng'o wiéman mlonmlon bo i waan oh fah man bé'n.

¹⁶ Se swran kun sié adya'n, san oh wuh nan ba wun i wle sakpa.

¹⁷ San swran ng'o siéé adya'n oh wuh nan ba di adya'n, afin ke o nian wuman'n, bé kwla diman.

¹⁸ I so'n ti, ke béh bôh sa klikli nga Nyanmien waan oh yôh man swran'n i su fale'n i bô'n, mmôdya ye bé fa bôô i bôo.

¹⁹ Afin ke Moïse kan mmla'n kwlaa kléé swran mun'n, o fa nannin ba'm bé mmôdya'n o gua nun nzué, nan wa fa bua ndre okwle nin hysope nnya a bô nun, wa fa kpentenkpenten mmla fluwa'n nin swran'n kwlaa bé wun.

²⁰ O sé ke: «Mmôdya ng'o ô ye'n ti sa nga Nyanmien waan oh yôh man amun'n nin nga i waan an yô'n i mmôdya.»

²¹ O fa mmôdya'n kpentenkpenteen tannin sua'n nin Nyanmien ninngé'n kwlaa bé wun.

²² Bé klee mmla'n nun ke, bé fa mmôdya bô ninngé'm bé kpanngban lika kpa bé wun asô, o man se bé ku'an nnen bo i mmôdya guaman'n, Nyanmien yatyi'a bé wun sa'n tye'a bé.

Christ fe i wun soo Nyanmien

²³ I so'n ti, se bé bô ninngé nga bé ti nyanmien su lo lie'n bé sonnzon su'n bé wun asô so'n, o ti su. Sannge nyanmien su lo lie'n b'o ti i kpafue'n, san béh nyanh nnen bo i kpa tra nga'n, nan ba bô bé wun asô.

²⁴ Afin nanh Nyanmien lika b'o ti swran sa nuan b'o ti kpafue'n i sonnzon su'n i nun ye Christ wlulio, sannge o oo nyanmien bobo su lo Nyanmien wun o, o man ke é sé ye'n, o dyran é nuan.

²⁵ Nyanmien nyrun dyranfue dan'n afue nuan kwlaa o fa nnen mmôdya wlu Nyanmien lika kpa'n nun. Sannge Christ lie'n, wa wlu'a lo ke o fe i wun so Nyanmien titi,

²⁶ afin se o ti ke o yôli so'n, wuun ke o fin men'n i bôbôle nun'n oh wunh nyrennen tititi. Sannge sien'n bo ya dyu men'n i bué nuan'n, o yii i wun nglô kpe kunngba nan sa te'n wié, i wun b'o fa soo Nyanmien'n ti.

²⁷ Bé siéé ke swran wu kpe kunngba, i sin bé fe ko Nyanmien dyasu.

²⁸ I kunngba'n, ke o yô nan Christ a fa swran kpanngban bé wun sa'n, i kusu fe i wun soo Nyanmien kpe kun. Bale nga o wa ba ékun'n, nanh sa te'n tio, sannge oh bah bé nga be nyin te i sin'n bé déle.