Hébreu 8 - Nyanmien nde Ufle

Jésus ti é Nyanmien nyrun dyranfue dan

¹ Anh nian nde nga é kan'n i nun nanndôlie'n ye: é le Nyanmien nyrun dyranfue dan kun b'o ti Nyanmien Kpli b'o ti Wléngbi'n i bia'n i fama su nyanmien su lo.

² O di Nyanmien nyrun dyranle dyunman Nyanmien lika kpa'n bo yele tannin sua kpa nga nanh swran ye o kplannin bo é Min'n bobo ye o kplannin'n nun.

³ Nyanmien nyrun dyranfue dan kwlaa nga bé sié bé'n, bé sié bé ke bé fa liké nga swran'm bé waan béh fah man Nyanmien'n nin nnen nga béh fah soe'n bé fa men. O man é lie'n, kusu o fata ke o nyan liké wié fa men.

⁴ Se o ti asie'n su wafue'n, wuun o su yô'a Nyanmien nyrun dyranfue, afin bé nga bé klee mmla'n nun ke bé fa liké nga swran'm bé waan béh fah man Nyanmien'n bé fa men'n, i sofue'm bé ô le.

⁵ Bé Nyanmien nyrun dyranle dyunman nga bé di'n, o ti nyanmien su lo le kpa'n i sonnzon su, o nin i wawe. Ke Moïse lie'n kusu ti soo. I nun nga o wa kplan tannin sua'n, Nyanmien séé i ke, «o nien i wafa kwlaa ng'o klélii ôka'n su lo'n su yô.»

⁶ Sannge sien'n, ba fa Christ a sié Nyanmien nyrun dyranle dyunman b'o ti kpa tra bé nga'm bé lie'n su, afin o ti sa kpa nga Nyanmien waan oh yôh man swran mun'n i nun dyranfue. Sa so'n i kpa tra laa lie'n, afin sa nga Nyanmien waan oh yôh bé sien'n ti kpa tra laa lie'n.

⁷ Sa nga Nyanmien waan oh yôh man swran mun laa'n, se o ti ke fien nu'en i wun'n, wuun ba sé'a ke béh kunndeh ufle.

⁸ Sannge Nyanmien kputu i swran mun, afin bé klee Nyanmien Nde'n nun ke: «É Min'n sé ke: Tyen wié lélé M ma kan sa ufle nga n waan nh yôh man Israël nin Juda bé ôsufue mun'n klé bé,

⁹ O nin sa nga laa ke n tra bé nannan'm bé sa bo bé fin Égypte lo fitéli'n, Bo n waan nh yôh man bé'n, bé su yô'a kun. É Min'n sé ke: Ba yô'a sa nga é nuan see su ke bé yô'n, O man n kusu man nia'an bé lika.

¹⁰ É Min'n sé ke: Nian sa nga n waan tyen wié lélé nh yôh Man Israël ôsufue mun'n ye: M man min mmla'n tranh bé klun, Ye nh fah kle bé awlen'n nun. Nh yôh bé Nyanmien, Ye bé kusu béh yôh n swran

¹¹ Swran fi su klé'e i wiéngu Nin i niaan liké kun, o sé'a bé ke: Anh kô si é Min'n! Afin ke o fin bé kanngan'm bé su lélé fa dyu bé kaklaakla'm bé su'n, Bé kwlaa béh sih min.

¹² Sa nga bé yôô min'n, nh yatyi tye bé, N su bô'a bé sa te'n su di'a dyole kun.»

¹³ Ke Nyanmien kanh ke, oh yôh sa ufle man swran'n, o klé ke laa lie'n i ble'n wa sin, afin nga bo wa tye, bo i ble lie'n su sin'n, o tye kaan bé su di'a su kun.