Hébreu 6 - Nyanmien nde Ufle

¹ I so'n ti, man é yatyi Christ nde'n i bôbôle nga bé klé yé'n, é mian é nyin é yô swran. Nanh man é wla sua'n i bô asé kun. I bô asé wlale so'n yele nde nga é kan sé ke bé yatyi sa ngbenngben yôle, bé lafi Nyanmien su,

² bé yô swran'm bé baptême wafawafa'n, bé sié bé sa swran'm bé su, swran'm bé tyen, ye Nyanmien bu ndeo o katyimen'n.

³ Se Nyanmien di su'n, ke é wa yô soo.

⁴ Afin se Nyanmien man swran kun wun asé, b'o wun nyanmien su lo liké b'o bé fa men'n i fe'n, bo Nyanmien Wawe'n yô i lie wié'n,

⁵ b'o wun Nyanmien nde'n i fe'n, b'o si sa kéklééklé nga tyen wié lélé béh yôh'n,

⁶ o nin i so'n ngba, se o yatyi atin'n, bé kwla yôman mon o se'e i sin katyi'e i nzuen'n kun. Afin se o yô so'n, wuun i kusu su bôbô Nyanmien Wa'n waka'n su ékun, o gue i nyin asé nzra nun.

⁷ Afin lika nga nzué ta le to, b'o yô liké nga bé yô i su'n i yé'n, b'o man bé nga bé yô liké so'n bé nyan wié'n, Nyanmien man lika so'n yô yé kpa.

⁸ Sannge se o yô'a liké yé bo ôwié nin aintonman ye o yô yé le'n, bé bu'e liké fi, o tyeman nan Nyanmien a sé ke, nanh man i su liké yô yé mlonmlon, i agualie yele i nun wole.

Sa nga Nyanmien séé ke oh yôh'n

⁹ N swran kpa mun, kannze é kan so'n, é lafi su ke amun sa lie nga ke amun nyan amun ti'n an yô'n ti kpa tra bé lie'n.

¹⁰ Afin Nyanmien yô'a sa b'o ti'e i su, i wla fi'a dyunman nga an dili nin klôle nga an fa klôé b'o man an yôli i swran'm bé yé, bo an te yô'n su.

¹¹ Sannge é klô ke amun kwlakwla an mian amun nyin yô ke an yôé laa'n sa gue i ti nin i bô, ye amunh nyanh liké kwlaa nga amun wla ô su ke amunh nyenh nion.

¹² É klô'a ke an yô nveefue, sannge an nian bé nga bé lafi Nyanmien su, bé tra bé awlen b'o man bé nyan liké nga i waan oh fah man bé'n, bé lie'n su yô.

¹³ Ke Nyanmien kanh sa nga i waan oh yôh man Abraham'n, o tali nda. Ke o wu'an swran nga i dan tre nan wa te i nda'n, o te i bobo wun nda.

¹⁴ O sé ke: «M man o wun dyoh o fouun, ye o ôsu'n treh.»

¹⁵ O men i so'n ti, ke Abraham tre i awlen lélé'n, o nyaan liké nga Nyanmien séé ke oh menh'n.

¹⁶ Ke swran'm béh tah nda'n, swran ng'o le nyrun tra bé'n ye bé te i ndaa. Ke bé kô ta nda so'n, wuun akplôwa'n wa wié.

¹⁷ Nyanmien klô ke bé nga béh nyanh liké nga i waan oh manh bé'n, bé wun i wle kpa ke o su katyi'e i akunndan'n. I so'n ti ye ke o kannin'n, o taa nda nion.

¹⁸ O man nde ng'o kannin'n nin nda ng'o tali'n, liké nnyon so'n o katyi'a bé, o bua'a atô. I so'n ti, o wla é bo é talôlii'n é fanngan ke é kplin é nyin nan é nyan liké ng'o sié é nyrun lo siéli é, bo é wla ô su ke éh nyenh'n.

¹⁹ Liké nga é wla ô su so'n, ti ke mméli i blale'n bo bé fa dyren'n sa, o tra é asé. O so é lafi i su. O wlu lélé dyuu tannin b'o kpe nyanmien su lo Nyanmien sua dan'n nun'n i sin lo.

²⁰ Lo ye é ti Jésus b'o ti é nyrun dunfue'n o wluli nion. O katyii Nyanmien nyrun dyranfue b'oh kah le titi ke Melchisédek lie'n sa.