Hébreu 3 - Nyanmien nde Ufle

Jésus-Christ i kpa tra Moïse

¹ I so'n ti, aniaan bo an ti Nyanmien lie b'o flee amun wié'n, anh bu Jésus bo Nyanmien sunmeen i ke o yô i nyrun dyranfue dan i su bo é lafi'n ti'n, i akunndan.

² Dyunman nga Nyanmien fe siéé su'n, o nian nun di i kpa men, ke Moïse kusu yô i so Nyanmien awlô wunmuan'n nun'n sa.

³ Se swran kun kplan sua klaan kun'n, i bobo dunman'n fu tra sua'n. Jésus kusu, se o nyan nyrun tra Moïse'n, o ti su.

⁴ Afin sua kwlaa nga bé ô le'n, swran ye o kplan béo, sannge Nyanmien ye o yii ninngé'n kwlaaa.

⁵ Moïse ti dyunman difue kpa Nyanmien awlô wunmuan'n nun. O kan nde nga tyen wié lélé Nyanmien wa kan'n i nde.

⁶ Christ kusu, ke o ti i Wa'n, o nien i bobo i awlô'n su kpa so. Se é tra é awlen dyran kéklé lafi liké nga é wla ô su ke éh nyenh'n su kpa'n, é ti i awlô.

Nyanmien i swran'm bé aladyé dile

⁷ Afin Nyanmien Wawe'n séé ke: «Se ndeken an ti nde nga Nyanmien kan'n,

⁸ Nanh an yô nyin kéklé i su ke i nun nga swran'm bé dyaô i wun'n bé yôli'n, Bo bé ken i niannin blô lo'n sa.

⁹ Nyanmien sé ke: Amun nannan'm bé kan min niannin blô lo, Ye bé wuun sa kwlaa nga n yôé afue ablanan nun'n.

¹⁰ I so'n ti ye n fa ya swran so'm bé wun, N séé ke: Bé ti swran bo bé akunndan'n tra'an lika kun, Ye bé si'a min nzuen'n mlonmlon nion.

¹¹ I so'n ti n fa ya, n tali nda ke: Bé su dyu'a n lika nga bé di aladyé nun lo'n nun mlonmlon.»

¹² Aniaan mun, i so'n ti anh nian amun wun, nanh man amun nun wié i awlen'n yô te, ye o yô ke o lafi'a Nyanmien su, b'o man o yatyi Anannganman Nyanmien nion.

¹³ Sannge ke o yô nan ba laka'a amun nun wié nan wa yô'a sa te wa kétéman'n, anh tu amun wun fo tyen'n kwlaa bo bé te sé ke: Ndeken'n.

¹⁴ Afin se é fa é wla gue Christ su lélé gue i ti nin i bô ke i bôbôle nun sa'n, é nin i é ti wiéngu.

¹⁵ É te kanngan Nyanmien Nde nga bé kleli'n nun ke: «Se ndeken an ti nde nga Nyanmien kan'n, Nanh an yô nyin kéklé i su ke i nun nga swran'm bé dyaô i wun bé yôli'n sa.»

¹⁶ ?Wan mun ye ke Nyanmien kan nde bo bé tili'n bé dyaô i wun nion? ?Nanh bé kwlaa nga Moïse nin bé fin Égypte bali muon?

¹⁷ ?Wan mun ye Nyanmien fa bé wun ya afue ablanan nion? ?Nanh bé kwlaa nga bé yô sa te bo bé fuen'n kaa blô lo muon?

¹⁸ ?Ye wan mun ye Nyanmien ta bé nda ke bé su dyu'e i lika nga bé di aladyé lo nun nion? ?Nanh bé nga bé yô nyin kéklé i su muon?

¹⁹ O man é wun ke ba kwla dyu'a lika so'n nun, yele ke ba lafi'e i su.