Hébreu 13 - Nyanmien nde Ufle

Sa nga bé yôo o yô Nyanmien fe'n

¹ Anh klô amun wun kpa ke swran nin i niaan sa tititi.

² Swran ng'o tô amun'n, anh sikéé, afin swran wié'm bé yôô so bé siké ange mun, ba si'a nun.

³ Anh bu bisuafue'm bé akunndan, ke amun bobo an wô lo wié sa. Anh bu bé nga béh yôh bé tete'n bé akunndan, afin bé kusu bé ti swran ke amun sa.

⁴ Man swran'n kwlaa bé bu adya'n i liké dan, ye bé bo ba dya bé wun'n, nanh man bé yô sa sukusuku. Afin Nyanmien nin bé nga bé kunnde bla annze bian'n, nin bé nga bé kunnde bla bé yi bô annze bian bé wun bô'n mun lee.

⁵ Liké nga amunh yôh'n, nanh an yôé sika klôle'n ti. Man amun nyin yi liké nga an lee'n, afin Nyanmien bobo sé ke, «o su yatyi'a o, o su kpotyi'a o mlonmlon.»

⁶ I so'n ti, é tra é awlen kan nde nga bé klee ke: «É Min Nyanmien'n ye o ti n wukafueo, sre ku'an min. ?Nzu ye swran kwla yô mion?»

⁷ Anh bu amun kpenngben bo laa bé kan Nyanmien nde kléé amun'n bé akunndan. Anh nian bé nzuen'n nin bé agualie'n, anh nian ke bé fa lafi Nyanmien su'n, anh lafi i su so wié.

⁸ Ke Jésus-Christ fa ti anunman'n, o ti so nde, ye o ti so tititi.

⁹ Nanh an fa liké wafawafa nga bé klé amun b'o nin é lie'n ti'a kun'n su man an yatyi atin kpafue'n. Se é tra é awlen kpa yé bo Nyanmien yôô yé'n ti'n, o ti kpa. Nanh man é bu ke alie dile mmla'n bo é fa su'n o kwla yô é kpa, afin bé nga bé faa su'n, wa yô'a sa fi yé a ma'an bé.

¹⁰ Nyanmien nyrun dyranfue bo bé di dyunman Juif'm bé tannin sua'n nun'n, bé kwla di'a é Nyanmien su.

¹¹ Afin ke Nyanmien nyrun dyranfue dan'n fa nnen bo bé fa so Nyanmien'n i mmôdya'n ko i lika kpa'n nun'n, bé fe i nnen'n kô yre klô'n tiwa lo.

¹² I so'n ti, ke o yô nan Jésus mmôdya'n ti swran'm bé wun sa'n wa wié'n, i kusu o wuun nyrennen klo'n tiwa le.

¹³ I so'n ti, man é fité é o i wun klo tiwa lo nan bé gua é nin i é nyin asé.

¹⁴ Afin é le'a klo kpa wa, é su minnde klo nga bé wa fa man yé'n.

¹⁵ I so'n ti, man manmanle nga é manman Nyanmien titi'n yô ke asénna liké bo é fa man Jésus ke o fa men'n sa. Ke éh yôh so'n, é bô i dunman.

¹⁶ Nanh an yatyi sa kpa nin swran yé yôle'n, afin i so liké'n ye bé yôo o dyo Nyanmien kluon.

¹⁷ Man amun nyin yi amun kpenngben mun, anh bu bé swran. Bé nian amun su titi, afin bé wa kan bé dyunman'n i su nde klé Nyanmien. Anh yô sa nga b'o man bé klun dyo bé dyunman'n su'n. Se amuan yô'e i so bo bé ôtô'n, o man bé su kwla uka'a amun.

¹⁸ Anh sre Nyanmien titi ke o nian é su. É si é klun lo wéiin ke ya yô'a sa fi, afin sa'n kwlaa nun é klô ke éh yôh sa ng'o ti kpa'n.

¹⁹ Nh sreh amun kpa ke an sre Nyanmien ke o man min atin man n wo amun wun lo ékun ityra'n.

I nuan yrale nin bé liké yôle

²⁰ Nyanmien tyennin é Min Jésus b'o ti Bua Tafue Dan'n, i mmôdya b'o man swran nin Nyanmien bé di anuanse tititi'n ti. Man Nyanmien b'o man swran di aladyé'n

²¹ o man amun fanngan sa'n kwlaa nun nan an yô i klun sa. Jésus-Christ ti, mon o fa é yô liké ng'o klô'n. Man é la Christ asé tititi! Mon o yô so!

²² Aniaan mun, nh sreh amun, anh fa afotue nga m maan amun ye'n su, afin o ti'a nde tennden.

²³ Anh tié nde fe kun, ba yi é niaan Timothée bisua'n nun. Se o tô n wa ityra'n, min nin i éh bah amun wun lo.

²⁴ Nh yôh amun kpenngben nin Nyanmien swran'm bé kwlaa bé liké. Italiefue'm béh yôh amun liké.

²⁵ N yra n nuan ke amun kwlaa an nyan yé!