Hébreu 12 - Nyanmien nde Ufle

É Si Nyanmien

¹ I so'n ti, ke swran kpanngban kpa bo bé kan Nyanmien sulafile nde'n bé sin yia é kukukuku'n, man é kusu é gua liké kwlaa ng'o tanndan é nun'n bé asé, man é wla sa te'n kwlaa asé, afin o fi'an wa dyu'a wa nan wa tanndan é dya nun. Man é mian é nyin sin lika nga bé klé yé'n nun.

² Man é kpe é nyin nian Jésus, é Nyanmien sulafile'n fiin, i ye man é lafi i su lélé gue i ti nin i bôo. Ke o bu i klun b'o wa dyo'n i akunndan'n, o kplin su man bé kuin waka'n su, wa bu'e i nyin asé guale'n liké fi, nan wa kô tran Nyanmien bia'n i fama su.

³ Anh bu i bo ke sa te yôfue'm bé satyi i wun'n o tre i awlen'n i akunndan nan amun sa sin a bubu'a amun nan amuan kponzoman.

⁴ Se sa te'n ti swran'n, wuun nh séh ke, amun nin i a tu lélé amun mmôdya nian guaman.

⁵ ?Afotue nga Nyanmien maan amun bo an ti i wa'n, amun wla a fi su? Bé klee ke: «N wa, nanh bu fo nga é Min Nyanmien'n tu wo'n i aôwi, Ye se o idyo wo'n, nonh o sa sin bubu o.

⁶ Afin é Min'n tu bé nga o klô bé'n bé fo, Ye bé nga o bu bé i wa'n, o fa nyantiaan bô bé.»

⁷ Se Nyanmien tu amun fo'n, mon o son amun nun, afin o bu amun i wa. ?Ba ônin ye i si tu'e i foo?

⁸ Se o tu'a amun fo ke o fa tu i mma mun sa'n, wuun an ti'e i klun ba, an le'a si.

⁹ É si'm bé tu é fo, é bu bé swran. Se o ti so'n, man é bu é Si nga é wawe'n wô i sa nun'n i swran tra bé nan ya nyan nguan.

¹⁰ Kpa nga é si'm bé waan é yô bo i ti ye bé tu é fo'n, o ti lé nnyon kun lie, sannge nga Nyanmien fa tu yé'n é kpa yôle mlonmlon tio nan é katyi ke i sa.

¹¹ Nanwle, fo tule'n kwlaa, ke béh tuh yé'n, i klikli'n nun o yô é ya, o yô'a é fe, sannge bé nga bé fa su bo bé katyi'n, o man bé yô kpa, bé di aladyé.

Afotue manle

¹² I so'n ti, anh kpenten amun sa bo ba kpo'n nin amun dya bo ba nyan amun wun'n bé nun.

¹³ Anh kpe atin nga an sin nun'n kpa nan swran nga i dya ti'a kpa'n i dya'n wa fonndonman, sannge wa yô dyuédyué'n ti.

¹⁴ Man amun nin swran'n kwlaa amun nuan se amun wun, man amun nzuen'n fa Nyanmien lie'n, afin se o ti'e i tio, swran fi su wu'an é Min'n.

¹⁵ Anh nian amun wun kpa, nanh man yé nga Nyanmien yô swran'n o tô fuan swran fi nan klunwi'n i ôlui'n wa fefeman, wa satyi'a amun nan wa sa'a swran kpanngban'n ti.

¹⁶ Anh nian amun wun kpa nan swran fi a kunnde'a bla nin bian, swran fi a bu'a Nyanmien liké'n ke o ti'a liké fi, ke Ésaü bo alie talié kun ti o yôô i kpenngben'n i ate'n sa.

¹⁷ An si ke, ke o yôô so'n, i sin i waan i si yre i nguan, sannge wa kpli'an su. O suun bo lélé, sannge wa wu'en i wafa nga o yô nan wa katyi nde ng'o kannin nion.

¹⁸ Amun lie'n, amuan oman ôka wié bo bé kwla ken, bo sin dan nin bole tukuu, nin aôsin, nin aunngban dan ô su'n i bô, ke Israël mma'm bé lie'n sa.

¹⁹ Bé tii awe tele, nin swran kun nen. Ke bé tii i nen'n, bé waan, nanh mon o kan nde klé bé kun,

²⁰ yele ke nde so'n ti kéklé bé kwla fa'a su, afin o sé ke: «Se nnen bobo kan ôka'n, bé fa yebue kuin.»

²¹ Liké so'm bé yô srô, o man Moïse sé ke, «sre kuin, i wun usui.»

²² Sannge an baa Sion Ôka'n i bô, an baa nyanmien su Jérusalem b'o ti Anannganman Nyanmien'n i klô'n bo ange akpiakpi bé ô su'n su.

²³ An baa Nyanmien i mma ngbenngben bo bé klce bé dunman nyanmien su lo'n bé tyen dile'n bô nin bé anyia'n nun. An baa Nyanmien b'o ti swran'n kwlaa bé dyole difue'n, nin swran kpa nga Nyanmien a katyi bé swran kpa mlonmlon sien'n bé wawe'n,

²⁴ nin Jésus b'o ti sa ufle nga Nyanmien waan oh yôh man swran'n i nun dyranfue'n bé wun. Jésus mmôdya b'o fa kpentenkpenten'n, se o kwla idyo'n, wuun oh kanh nde ke tra Abel lie'n.

²⁵ Anh nian amun wun kpa, nanh an kpalô nde nga bé kan klé amun'n. Bé nga bé kpalô swran ng'o kan nde kléé bé asie'n su wa'n i nde'n, ba fité'a nun. Se é kusu é katyi é sin si swran ng'o ô nyanmien su lo b'o kan nde klé yé'n, é su fité'a nun mlonmlon.

²⁶ Laa ke oh idyoh'n, asie'n kédyé, sannge sien'n o sé é ke: «M ma kédyé asie'n ékun nin nyanmien'n kusu.»

²⁷ Ke o sé ke oh kédyééh «ékun'n», o klé wéiin ke i ye oh yih liké nga o kédyé bé'n bé leo, afin i ye o yii béo, nan nga wa kédyé'a bé'n bé ka le.

²⁸ I so'n ti, man é yô Nyanmien mô, afin éh nyanh men b'o kédyéman'n. Man é su Nyanmien i wafa ng'o dyo i klun'n, srôle bo é srôé'n nin swran bo é bui'n ti,

²⁹ afin é Nyanmien'n ti ke sin sa, o yra.