Hébreu 11 - Nyanmien nde Ufle

Bé nga bé lafi Nyanmien su'n

¹ Nyanmien su bo é lafi'n ti, é sii wéiin kpa ke ya nyan liké nga é wla ô su'n, o man é sii kpa ke liké nga é wunmen'n wô le.

² Laafue'm bé Nyanmien su bo bé lafi'n ti ye o bôô bé dunman kpa nion.

³ Nyanmien su bo e lafi'n ti ye é si ke i nuan nun nde'n ye o fa yii men nion, o man o fa liké nga bé wunmen'n ye o fa yii liké nga é wun bé ye nion.

⁴ Nyanmien su bo abel lafi'n ti ye i liké nga o fa solii'n i kpa tra Caïn lie nion. I su b'o lafi'n ti, Nyanmien bobo sé ke o ti swran kpa, afin o soo liké nga o fa menniin'n nun. O wuli, sannge Nyanmien su b'o lafi'n ti, o te idyo.

⁵ Nyanmien su bo Hénoch lafi'n ti ye o fe oo i wun lo bo wa wuman nion. Ba wu'en kun afin Nyanmien meen i su. Bé klee ke Nyanmien klun dyo i wun nan wa men i su.

⁶ Afin se bé lafi'e i su'n, i klun dyo'a bé wun mlonmlon. O man swran nga i waan oh feh i wun mantan Nyanmien'n, mon o lafi su ke o ô le, ye bé nga bé kunndee'n, oh yih i wun klé bé.

⁷ Nyanmien su bo Noé lafi'n ti, ke o bôô liké nga bé nian wu'en lé'n su klélii'n, o bôbôô mméli kun o fa dé i ôsufue mun, srôle b'o srôé'n ti. Ke o yôô so'n, o buu menfue'm bé fo, ye o yôô swran kpa i su b'o lafi'n ti.

⁸ Nyanmien su bo Abraham lafi'n ti, ke o flelii ke o o nvlé nga i waan oh fah men'n nun'n, i nyin yilii, o si'a lika ng'o ko'n, sannge o oli.

⁹ I su b'o lafi'n ti, o kô traan nvlé nga i waan oh fah men'n nun ke aôfue sa. O nin Isaac nin Jacob bo bé kusu béh nyanh liké nga i waan oh fah men'n i wié'n, bé tran tannin sua nun.

¹⁰ Afin o minnde klo kpa nga bé wle i sua'm bé bô asé kpa'n, bo Nyanmien bobo ye o dyadyali ye o kplannin'n.

¹¹ Sara kusu Nyanmien su b'o lafi'n ti, o nin i kpenngben bobo bo wa yô'n, o meen i fanngan man o wuu ba, afin o si ke Nyanmien b'o kan ke oh yôh sa so'n men'n o ti nanwlefue.

¹² I so'n ti ye yasua kunngba so'n bo wa yô kpenngben b'o ti ke wa wu sa'n, o wuu ba bo i ôsu'n tre ke nzraama nin dyénvié nuan aunnyan bo bé kwla kaman'n sa nion.

¹³ Bé kwlaa bé lafi Nyanmien su lélé bé fa wuli, sannge o nin i so'n ngba, ba nyanman liké nga i waan oh fah man bé'n. Bé wuun bé mmua lo, o man bé klun dyoli. Ye bé di bé wun nanwle ke bé ti aôfue nin wlanwlanfue asie'n su.

¹⁴ Bé nga bé sé so'n, o klé wéiin ke bé bobo bé nvlé ye bé kunndeo.

¹⁵ Se o ti ke bé nyin kpeen nvlé nga bé tu lo'n su'n, wuun bé saa bé sin.

¹⁶ Ba yô'a so, sannge bé kunnde nvlé nga i kpa tra nvlé so'n, yele nyanmien su lo lie'n. I so'n ti, ke bé sé ke o ti bé Nyanmien'n, nyannzuen kunmen, afin wa yô klo kun a sié bé.

¹⁷ Nyanmien su bo Abraham lafi'n ti ye ke o ken niannin'n, o fa Isaac menniin nion. Sa nga Nyanmien séé ke oh yôh'n, Abraham ye o séé i ke oh yôh men io. Sannge o fe i wa kunngba tye'n menniin.

¹⁸ Ba kunngba so'n ti ye Nyanmien séé i ke, «Isaac ti ye ah nyanh ôsu kun b'o man o dunman'n su nunnunmaan.»

¹⁹ Abraham si ke Nyanmien kwla tyen Isaac, i so'n ti ye Nyanmien fe i wa'n meen ékun nion. Sa so'n ti sa nzolie.

²⁰ Nyanmien su bo Isaac lafi'n ti, o yraa Jacob nin Ésaü bé nguan, o sé bé ke, tyen wié lélé béh nyanh yé.

²¹ Nyanmien su bo Jacob lafi'n ti, ke o wa wu'n, o yraa Joseph wa nnyon'n bé nguan, ye o klu i kponman'n su manmaan Nyanmien.

²² Nyanmien su bo Joseph lafi'n ti, ke o wa dyu i wié tyen'n, o kaan Israël mma'm bé Égypte lo bô tule'n, nin i saka'n i nde.

²³ Nyanmien su bo Moïse si nin i nin bé lafi'n ti, ke bé wulii'n, bé fe fiaa anglô nsan, afin bé wun ke ba'n ti klaan, o man ba bu'a famien'n i nde'n nde.

²⁴ Nyanmien su bo Moïse lafi'n ti, ke o nyinnin'n, wa kpli'an su ke bé sé ke o ti Pharaon wa bla'n i wa,

²⁵ afin o klô ke bé klé i nin Nyanmien swran'm bé nyrennen tra ke o di men'n b'o ti lé nnyon kun liké'n.

²⁶ O wun i ke, finfin nga Christ (*f1*) ti bé yô i'n ti kpa tra Égypte lo liké kpakpa'n kwlaa, afin i nyin ta liké nga o wa nyen tyen wié'n mmua lo.

²⁷ Nyanmien su b'o lafi'n ti, ke o dyaô Égypte famien wlefue'n wun lo'n, sre a kunmen, afin o tre i awlen, o ti ke wa wun Nyanmien bo bé wunmen'n sa.

²⁸ Nyanmien su b'o lafi'n ti, o bôô Pâque (*f17*) dile'n bô, ye o man bé fa mmôdya kpentenkpenten anuan'm bé su nan ange b'oh bah talua ba yasua'm bé kunle'n, wa ku'an Israëlfue'm bé lie'm bé wié.

²⁹ Nyanmien su bo Israël mma'm bé lafi'n ti ye Dyénvié Okwle'n kpatyili nan ba sin nun nion. Sannge ke Égyptefue'm bé waan béh suh bé su'n, nzué'n bu kataa bé su.

³⁰ Nyanmien su bo Israël mma'm bé lafi'n ti ye, ke bé bô sin yiaa Jéricho klo'n lé nsô'n, i wun nga bé sili'n bu guali nion.

³¹ Nyanmien su bo Rahab téklé bla'n lafi'n ti ye, ke bé bo bé nyin yi'a Nyanmien'n bé wuli'n wa wu'a wié nion, yele ke bé nga bé oo bé men'n i kpla nianle'n, o sikéé bé kpa.

³² ?Nzu nde ye n ken ékuon? Se n waan nh kanh Gédéon, nin Barak, nin Samson, nin Jephté, nin David, nin Samuel, nin Nyanmien nuan idyofue'm bé nde'n, n su nya'an n ti ke'en i ngba.

³³ Nyanmien su bo bé lafi'n ti, bé kwla nvlé mun, bé yô sa ng'o ti i nuan su'n, bé nyan liké nga Nyanmien waan oh manh bé'n, bé tyityi dyra'm bé nuan,

³⁴ bé nuan sin srôésrôé, bé flô bé nga bé waan béh fah kaka kun bé'n bé sa nun. Bé nga bé le'a wunmien'n bé nyan fanngan, bé yô yakpa ale nun, bé fuan nvlé wié'm bé sôndya mun.

³⁵ Bla wié'm bé swran nga bé wuli'n bé tyennin, bé wun bé ékun. Bé klé wié'm bé nyrennen lélé bé kun bé, bé klô'a ke bé dé bé, afin bé klô ke béh tyenh nan béh nyanh nguan kpa.

³⁶ Bé tô wié'm bé mma, bé fa nyantiaan bô bé, bé fa dyroko tyi wié mun, bé wla bé bisua.

³⁷ Bé fin bé yebue, bé wlanwlan bé, bé fa scie kpatyi bé nun, bé fa kaka kun bé. Bé wla bua nin bôli kplô bé ko wa ko wa, bé le'a liké fi, bé wun nyrennen, bé yô bé tete.

³⁸ Bé kpa'n ti, bé nin men nga nun tranle fataman! Bé wlanwlan aawle'm bé nun nin ôka'm bé su, bé tran yebue bue nin kunman'm bé nun.

³⁹ Bé kwlaa so'n, Nyanmien su bo bé lafi'n ti, bé nyaan dunman, sannge ba nya'an liké nga i waan oh fah man bé'n.

⁴⁰ Afin Nyanmien siéé liké nga i kpa tra bé lie'n lo sié é, o man se é nu'an nun'n, bé su yô'a kpa.