Hébreu 10 - Nyanmien nde Ufle

¹ Afin mmla'n ti ke liké kpakpa nga béh bah'n bé wawe sa, o klé'a bé wafa kpa'n. I so'n ti ye ke bé fa su bo bé so Nyanmien i wafa kunngba'n afue nuan'n kwlaa'n, o kwla yôman man bé nga bé fa bé wun mantan Nyanmien so'n, bé yô'a swran kpa mlonmlon nion.

² ?Se o kwla yô man bé yô kpa'n, wuun ba yatyi'e i sole'n? Afin se bé nga bé soe so'n bé wun sa'n kwla wié mlonmlon'n, wuun bé klun titi'a bé bé sa te'n ti kun.

³ Sannge i sole so'n man bé wla kpen bé sa te'n su afue nuan'n kwlaa.

⁴ Afin nannin tôla'n nin bôli kpakpue'm bé mmôdya'n o kwla wiéman bé wun sa'n.

⁵ I so'n ti ye ke Christ bah men'n nun'n, o sé ke: «W'a kunnde'a nnen nin liké nga bé fa man wo'n, sannge a maan min wunnen.

⁶ Nnen nga bé yre'n nin nnen nga bé sa te'n ti bé fa so wo'n, o dyo'o o klun.

⁷ Ye n séé ke: Nyanmien, min ye, N su ba o klun sa yôle. Afin bé klee min nde so mmla fluwa'n nin.»

⁸ O dun mmua séé ke: «W'a kunnde'a nnen nin liké nga bé fa man wo'n, nin nnen nga bé yre'n, nin nnen nga bé sa te'n ti bé fa so wo'n, bé dyo'o o klun.» Sannge bé fa men ke bé klee mmla'n nun ke béh fah men'n sa.

⁹ I sin o sé ke: «Min ye, n su ba o klun sa yôle.» I so'n nun Nyanmien man bé yatyi i sole wafa laa lie'n, o fa ufle katyilii.

¹⁰ Ke Jésus-Christ yôô Nyanmien klun sa, b'o fe i wun men kpe kunngba b'o su yô'e kun'n, é ti te ye o fe i wun yilio.

¹¹ Tyen kwlaa Nyanmien nyrun dyranfue'n kwlaa bé ô bé dyunman'n su, bé so Nyanmien i wafa kunngba'n titi, sannge i sole so'n kwla wiéman bé wun sa'n mlonmlon.

¹² Christ lie'n, kpale kunngba nga o solii'n, o kpe i kwlaa ti, o man bé kunnde'a ufle kun. I sin o kô traan Nyanmien i fama su.

¹³ Sien'n o ti lo, o su minnde ke Nyanmien man o tie i kpofue'm bé su.

¹⁴ Afin ke o soo Nyanmien kpale kunngba so'n, o man bé kwlaa nga o fe i wun yili bé ti te'n bé yôô swran kpa mlonmlonmlon.

¹⁵ Nyanmien Wawe'n kan nde kunngba'n klé é. Afin o sé ke:

¹⁶ «É Min'n sé ke: Nian sa nga n waan, Tyen wié lélé nh yôh man bé'n ye: M man min mmla'n tranh bé awlen'n nun, Ye nh fah kle bé akunndan'n nun.»

¹⁷ I sin o sé ke: «N su bô'a bé sa te'n nin bé sa tete yôle'n su di'a dyole kun.»

¹⁸ O man swran nga Nyanmien yatyi i sa te'n tyee'n, o kunnde'e i sa te'n i ti nnen kun.

Man é fa é wun mantan Nyanmien kpa

¹⁹ I so'n ti, aniaan mun, é sii wéiin ke é kwla wlu Nyanmien lika kpa'n nun Jésus mmôdya'n ti.

²⁰ Afin Jésus kpee atin man é kôkô nun wa, o tanni'an mlonmlon. O tii tannin'n b'o kpe Nyanmien sua'n nun'n nun, o oo i sin lo, tannin so'n yele i wunnen'n.

²¹ É le Nyanmien nyrun dyranfue dan kun bo bé fe siéé Nyanmien i awlô'n su.

²² I so'n ti, man é fa é wun mantan Nyanmien. Ke éh yôh so'n, nanh man akunndan te tran é klun, man é lafi i su kpa, afin o man é wun sa'n b'o man é klun titi yé'n o wiéli, ye o fa nzué klôuun wunnzinnin é.

²³ Man é tra liké nga é ken i nde ke é wla ô su'n i kéklé, nanh man é sa kpo, afin Nyanmien b'o sé ke oh yôh man yé'n, o ti nanwlefue.

²⁴ Man é bu é wiéngu'm bé akunndan é wla bé fanngan nan bé klô bé wun, bé yô swran yé.

²⁵ Nanh man é yatyi yiale'n ke swran wié'm bé yô'n sa. Sannge man é yia, é tu é wun fo. Sien'n bo an wun ke é Min'n i tyen'n su mantan'n, anh yôé so tra su.

²⁶ Afin se é si nanwle'n nan é nyinfu é yô sa te ékun'n, i so sa lie'n o le'e i ti nnen kun.

²⁷ Liké ng'o ka'n b'o yô é srô'n yele fo nga Nyanmien wa bu i kpofue mun'n, nin sin srôésrôé b'o wa yra bé'n.

²⁸ Swran kwlaa ng'o ton Moïse mmla'n, se swran nnyon annze nsan bé kan'n, bé simen i aunnvue, bé kuin.

²⁹ ?Se o ti so'n, an bu bé nga bé yô Nyanmien Wa'n i finfin'n, bo bé bu sa nga Nyanmien waan oh yôh man swran'n i mmôdya b'o man bé wun sa'n wié'n i ngben'n, bo bé kpe Nyanmien Wawe'n b'o yô swran yé'n i nzôwa'n bé lie'n se? Bé lie'n yôh te tra su.

³⁰ Afin é si swran ng'o sé ke: «Min ye n tu klunngbo nion, min ye nh tuah bé kaleo,» ye o ken ékun ke: «É Min'n i dyasu ye béh feh i swran mun koo.»

³¹ Se Anannganman Nyanmien'n nyan swran kun'n, oh yôéh te dan kpa!

³² Anh bu laa bo ke Nyanmien man an wuun asé'n, nyrennen dan kpa nga an wunniin'n bo an dyran kéklé'n i akunndan.

³³ Tyen wié bé kpe amun nun wié nzôwa, bé yô amun tete nzra nun, tyen wié kusu an fa amun wun wla bé bo bé yô bé tete so'n bé nun.

³⁴ Afin an wun bisuafue'm bé aunnvue. Ke béh déh amun ninngé mun amun sa nun'n, amun nin bé a kpliman, amun klun dyo su, afin an si ke an le ninngé wié b'o ti kpa tra nga le'n, b'oh kah le tititi.

³⁵ Nanh an yi amun nyin liké nga amun wla ô su'n su, afin mô yôle dan kpa ô su!

³⁶ Anh tra amun awlen nan amuan yô Nyanmien klun sa, nan amuan nyan liké nga i waan oh fah man mun'n.

³⁷ Afin bé klee ke: «o tye kan'n, o ka bo kaan sa, Swran nga bé waan, oh bah'n, o su tyeman, oh bah.

³⁸ Ye n swran ng'o lafi n su, b'o man o katyi swran kpa'n, oh nyanh nguan. Sannge se o tyuen i wun ko sien'n, n klun su dyo'e i wun.»

³⁹ É lie'n, nanh bé nga bé tyuen bé wun ko sien'n b'o man bé mlin'n bé wié yele é, sannge é ti bé nga bé lafi Nyanmien su bo bé nyan bé ti'n bé wié.