Hébreu 1 - Nyanmien nde Ufle

Nyanmien kannin

¹ Lalafue nun Nyanmien man i nuan idyofue'm bé bôbô i nde'm bé su wafawafa kléé é nannan mun.

² Sannge é bo é su ko men'n i bué nuan'n, o man i Wa'n ye o kan nde kléé yéo. I ye o man o yii men'n nin ninngé'n kwlaaa, ye o sé ke oh fah liké'n kwlaa men.

³ I ye o man é wun Nyanmien b'o yi i wun nglô nyannyannyan nion, o fa Nyanmien Kpli'n i wafa kwlaa ng'o ti'n, i nuan nun nde'n ye man ninngé'n kwlaa ô leo. Ke o yôli bo swran'm bé wun sa'n wiéli'n, o kô traan Nyanmien Kpli b'o ti Wléngbi'n i fama su nyanmien su lo.

⁴ O man o yôô kpa tra ange mun, ke i dunman nga Nyanmien fa flelii'n kusu ti dan tra bé lie'n soo.

Jésus-Christ i kpa tra ange mun

⁵ Afin ange'm bé nun ônin ye Nyanmien séé i ke, «o ti i Wa, ndeken wa katyi i sio»? ?Ye bé nun ônin ékun ye o ken i nde ke, «oh yôh i si, ye i kusu oh yôh i Waa»?

⁶ Ke o fe i Wa kpen'n ba men nun'n, o keen i ékun ke: «Man Nyanmien i ange'n kwlaa bé kôtô i bô bé menmen.»

⁷ Ye o keen i ange'm bé nde ke: «O katyi i ange mun ke aunngban sa, ye o katyi i swran mun ke sin taaman sa.»

⁸ Sannge o keen i Wa'n i nde ke: «Nyanmien, o bia'n wô le tititi,» ye «Siéle nga a sié swran mun'n, a sié bé kpa.

⁹ A klô sa ng'o ti kpa'n, a klôman sa te'n mlonmlon, I so'n ti, Nyanmien o Nyanmien faa o, o guo o su ngô (*f21*), o man o klun dyo dan kpa tro o wiéngu mun,»

¹⁰ Ye o keen i ékun ke: «Nannan, ke o fin lalafue nun'n, wo ye a yili asie nion, Ye nglô lo'n ti o sa nuan liké.

¹¹ Béh satyih, sannge o lie'n ah kah le, Bé kwlaa so'n, béh yôh nvuen ke trale sa,

¹² Ah bubuh bé ke kôndrô sa, Ah katyih bé ke bé katyi trale sa, Sannge o lie'n, ah kah o ôsu'n nun, wo afue lie'n su wié'a mlonmlon.»

¹³ ?Ye ange'm bé nun ônin ye o sé i ke: «Tran asé n fama su, Lélé m man ah tioh o kpofue'm bé suo»?

¹⁴ ?Ange'n kwlaa bo bé ti aôlia nun swran bo bé su Nyanmien'n, wa sunma'an bé ke bé wa nian bé nga bé wa nyan bé ti'n bé su?