Galasifuɛ Mun 4 - Nyanmien nde Ufle

¹ N sé ke yiô: ba nga oh dih i si i adya'n, kannze liké'n kwlaa ti i lie'n, ke o te yô bakan'n, o nin kanga'n bé ti kun.

² Ke o te yô bakan so'n, o ô swran wié'm bé sa nun, bé nien i su, ye wié'm bé kusu bé nien i ninngé'm bé su lélé san ble nga i si siéli su'n wa dyu.

³ É kusu, se é kwla sé ke ninngé nga é nannan'm bé klé'n ti swran'n, wuun éh séh ke, ke é te yô ke bakan sa'n, é ti i akua.

⁴ Sannge ke ble nga Nyanmien siéli'n dyuli'n, o sunmeen i Wa'n, bla kun wulii, o di mmla'n su.

⁵ O bali ke oh déh bé nga bé di mmla'n su'n bé ti, nan é katyi Nyanmien klun ba.

⁶ Nyanmien wa bo an ti'n ti, o sunmeen i Wa'n i Wawe'n ke o wa tran é awlen'n nun, o kpan fle Nyanmien ke: Baba!

⁷ I so'n ti, an ti'a kanga kun, an ti Nyanmien wa. Ke an ti wa'n ti, liké ng'o ti i lie'n o ti amun lie.

Paul kôkôô Christfue'm bé ti

⁸ Laa an si'a Nyanmien, o man an su ninngé nga bé nin sule fataman'n.

⁹ ?Sannge sien'n, ke amuan si Nyanmien'n, annze bo Nyanmien bobo a si amun'n, nzu ti ye an klô ke amunh sah amun sin ko ninngé ngbenngben bo bé kwla yô'a liké fi'n bé sin ékun ke amunh kôh yô bé akuaa?

¹⁰ An tyi tyen'n wié, nin anglô'n wié, nin lé motyue'n wié, nin afue'n wié!

¹¹ Se afe nga man fe amun ti lélélé'n o yô ngben'n, oh yôh n ya.

¹² Aniaan mun, nh sreh amun kpa, anh yô amun wun ke min sa, afin n kusu man yô min wun ke amun sa. Amuan yô'a n te lé.

¹³ An si ke, dyasin fe bo n kan kléé amun kliklikli'n tukpatye'n b'o too n su'n ti ye n nyan n ti n kannion.

¹⁴ An fee dan min wunnen b'o yô n ya'n ti, sannge man yô'a amun kain, amuan yi'a m blô, an soo min nun ke Nyanmien i ange sa, ke Christ-Jésus bobo sa.

¹⁵ Laa amun klun dyo min wun kpa. ?Nzu ye amuan wuin sien nion? Afin m bô amun dunman ke, se o ti ke an kwla tu amun nyinma'n man min'n, wuun an tuli.

¹⁶ ?Nde nanwle nga n kan kléé amun'n ti, man katyi amun kpofue?

¹⁷ Minnien so'm bé yô ke bé klô amun sa, sannge bé klun akunndan'n ti'a kpa, bé waan béh yôh so nan amun nin min bu, nan an klô bé, an su bé su.

¹⁸ Se amun kpa yôle ti ye amun nde lô bé titi'n, bo nanh ke n wô amun wun lo'n ngunmin ye bé yôé so'n, o ti kpa.

¹⁹ M mma mun, amun ti n su wun nyrennen kpa ékun ke bla bo wa kôtô awulie sa, lélé béh wunh Christ nzuen'n kwlakwlakwla amun nun.

²⁰ O ka n ngunmion ke é sé ye'n n wô amun wun lo, nan man kôkô yale a klé amun, afin amun ti, n wla'n gua'a asé.

Agar nin Sara

²¹ ?Amun bo an klô ke mmla'n su ye amunh di'n, an ti'e i nun nde'n? Anh bua n wié.

²² Afin bé klee ke Abraham wuu ba yasua nnyon, o nin afannien'n bé wuu kun, ye o nin i yi b'o ti diéwa'n be wuu kun.

²³ Nga b'o nin afannien'n bé wulii'n, bé wui ke swran wu ba titi'n sa, sannge nga b'o nin i yi bobo bé wulii'n, sa bo Nyanmien séé ke oh yôh'n ti ye o wuli io.

²⁴ Sa so'n ti ke nyanndra sa, afin bé kwla fa bla nnyon so'n sunnzun liké nnyon nga Nyanmien séé i swran'm bé ke oh yôh man bé'n, b'o man bé di anuanse'n. Agar ti Sinaï Ôka b'o ô Arabie lo'n, i mma'm bé ti kanga.

²⁵ Ye ke nde Jérusalem ô le'n, o fa bla so'n b'o nin i mma'm bé ti kanga'n.

²⁶ Sannge Jérusalem ng'o ô nyanmien su lo'n, o ti ke bla'n b'o ti diéwa'n sa, i ye o ti é nin nion.

²⁷ Afin bé klee ke: «O bo a bô'a akpué lé'n, guo o wla asé! O bo a nian wu'an ba wule i nyrennen lé'n, kpan o klun b'o ti dyowa'n ti, Afin bla nga ba yatyii'n, i mma'm béh sonh tra Bla ng'o te ti i wun bô'n.»

²⁸ Aniaan mun, amun lie'n, an ti ke Isaac sa, sa nga Nyanmien séé ke oh yôh'n ti ye bé wuu amuon.

²⁹ Laa ba nga bé wui ke swran wu ba titi sa'n, o kléé ba nga bé wui Nyanmien Wawe'n i fanngan nun'n i yale, ke o ti so ndeo.

³⁰ ?Nyanmien Nde nga bé kleli'n, bé klee se? Bé klee ke: «Fuan afannien'n nin i wa'n, afin afannien ba'n nin diéwa bla'n i wa'n bé kwla di'a adya kun.»

³¹ I so'n ti, aniaan mun, é ti'a afannien bla'n i wa, é ti diéwa bla'n i wa.