Galasifuɛ Mun 2 - Nyanmien nde Ufle

Paul nin i wiéngu nga Jésus sunmaan bé'n

¹ Ke o dii afue blu-nin-nnan'n, min nin Barnabas é oo Jérusalem ékun, m man Tite kusu oo wié.

² Sa ti ye n woli'n yele ke Nyanmien séé n ke n wo. Min nin bé kaklaakla mun é yiaa é ngunmin kan, ye n kan dyasin fe'n bo n kan klé bé nga bé ti'a Juif'n kléé bé, nan n dyunman nga n dii laa'n, nin nga n te di'n, n sa a kpi'a asé.

³ Tite b'o ti n sunmanfue'n, o ti Grec ba, sannge ba mienmen ke o wla klen.

⁴ San bé nga bé ton bé wun suen ke bé ti é niaan'n, bé ye bé klô ke o yô soo. Bé wluu é nun blelelele ke béh kplah é nian é ti bo é bo é nin Christ-Jésus ya katyi swran wunmuan'n ya nyen'n ti, nan béh fah é wla kanga'n nun.

⁵ Ke o ko yô nan dyasin fe'n b'o ti nanwle'n wa tran amun klun'n, ba nya'an é dyranwle bo kaan sa.

⁶ Bé nga bé ti bé nun kpakpa'n, se bé ti se bé ti se laa ô, nanh min ndeo, afin Nyanmien lie'n o nia'an swran nyrun ye o yô i sa lie nion. Bé kpakpa so'm bé lie'n, ba sé'a n ke n yô liké ufle fi.

⁷ Sannge bé wuun ke Nyanmien siéé n ke n kan dyasin fe'n klé bé nga bé wla'a klen'n, ke o siéé Pierre ke o kan klé bé nga bé wla klen mun'n sa.

⁸ Swran ng'o siéé Pierre ke o sunmen bé nga bé wla klen'n bé sin'n, i kunngba'n ye o sunmaan min bé nga bé ti'a Juif'n bé sion.

⁹ Ke Jacques nin Céphas nin Jean bo bé tra Asonun'n nun'n bé wuun ke Nyanmien bu n swran o fa min siéé dyunman so'n su'n, bé sunmaan min nin Barnabas é nun, o man é wuun ke é nen see su ke é o bé nga bé ti'a Juif'n bé sin, ye bé kusu béh koh bé nga bé wla klen'n bé sin.

¹⁰ Liké kun nga bé sree é ke é yô'n yele ke é bu yalefue'm bo bé ô bé nun'n bé akunndan, ye n kusu m mian n nyin sa so'n i yôle'n nun.

Paul kputuu Pierre Antioche lo

¹¹ I nun nga Céphas baa Antioche le'n, wa yô'a sa ng'o ti i nuan su'n, o man n idyoe kpa.

¹² Ke bé nga Jacques sunmaan bé'n bé nian dyu'a le'n, o nin bé nga bé ti'a Juif'n bé wla asa, sannge ke bé bali'n, o tyueen i wun, o nin bé titi liké dile nun, bé nga bé wla klen'n bé wun sre ti.

¹³ Juif nga'm bé kusu bé dii bé fuka nnyon nun ke i lie'n sa, lélé o man Barnabas bobo dii fuka nnyon nun wié.

¹⁴ Ke n wuun bé sa nga bé yô'n ke o nin dyasin fe'n b'o ti nanwle'n bé seman'n, n wusaa Céphas bé kwlaa bé nyrun le ke: ?O bo a ti Juif'n bo a yatyi Juif'm bé nzuen'n a yô ke bé nga bé ti'a Juif'n bé sa'n, o yô se ye a mian bé ke bé yô ke Juif'm bé sa nion?

Juif nin bé nga bé ti'a Juif'n

¹⁵ É lie'n, Juif ye o wuu yéo, é ti'a ke bé nga bé ti'a Juif bo bé ti sa tete yôfue'n bé sa.

¹⁶ Kannze é ti so'n, é si ke Nyanmien bu'a swran fi swran kpa mmla'n b'o fa su'n ti, san Christ-Jésus su bo swran lafi'n ti ye man Nyanmien bui swran kpaa. É kusu, ke o kô yô nan Nyanmien a bu é swran kpa Christ bo é lafi su'n ti, nan wa yô'a ke mmla'n bo é fa su'n ti ye o bu é swran kpa'n, i ti ye é lafii Christ-Jésus suo. Afin Nyanmien su bu'a swran fi swran kpa mmla'n b'o fa su'n ti.

¹⁷ ?Sannge se é kunnde ke Nyanmien bu é swran kpa Christ ti'n bo bé wun ke é ti sa te yôfue wié'n, i so'n klé ke Christ ye man swran yô sa te nion? O ti'a so mlonmlon!

¹⁸ Afin se sa nga n wlee i asé'n, n sa n sin n yô i ékun'n, wuun kpa ye n timaan, mmla'n bo n sa n sin di su ékun'n ti.

¹⁹ Afin mmla'n ti, n wuli, min nin i a bu, o man ôle nga n wô ye'n, n wô Nyanmien dunman nun. Bé bôbôô min nin Christ waka'n su,

²⁰ o man ôle nga n wô ye'n nanh n ngunmin ye n wôo, min nin Christ ye é wôo, ye sulafile bo n lafi Nyanmien i Wa b'o klôli min b'o fe i wun mannin min ti'n, i ti ye n wô leo.

²¹ N kpi'a nennen nga Nyanmien dii min'n i asé, afin se mmla'n bo bé fa su'n ti ye Nyanmien bu bé swran kpa'n, wuun wule nga Christ wuli'n o wuu ngben.