Galasifuɛ Mun 1 - Nyanmien nde Ufle

Paul kle fluwa nga kô maan Galatie lo Christfue mun

¹ M Paul, Jésus-Christ nin é Si Nyanmien b'o tyenniin'n bé sunmaan min. N sunmanle so'n fi'an swran, ye nanh swran fi ye o sié n soo.

² Min nin é niaan kwlaa nga é ô wa'n, é ye éh kleh fluwa nga ble Galatie lo asonun muon.

³ Man é Si Nyanmien nin é Min Jésus-Christ bé man an nyan yé, ye man amun wun dyo amun fouun!

⁴ Ke o kô yô nan Christ wa dé é ti men te kain nga nun'n ti, o fe i bobo wun mannin é sa te'n ti. I so'n ti é Si Nyanmien klun su.

⁵ Man é yi i aye tititi! Mon o yô so!

Dyasin fe'n ti kunngba tye

⁶ O bô n nuan kpa ke, ke é sé ye'n, amuan katyi amun sin a si i bo yé bo Christ yôli amun'n, ti o fleli amun'n, amuan fa dyasin fe ufle su'n.

⁷ Nanwle, dyasin fe ufle fi nu'an le, sannge swran wié'm bé ô le, bé sanngan amun akunndan, bé klô ke béh katyih Christ i dyasin fe'n.

⁸ O man se é bobo ô, se nyanmien su lo ange wié ô, o wa kan dyasin fe ufle klé amun, b'o nin nga e dun mmua kan kléé amun'n ti'a kun'n, man Nyanmien bôé sannzan!

⁹ Nde nga é kan kléé amun laa'n, i kunngba'n ye nh kenh ékun ye'n: Se swran wié kan dyasin fe ufle klé amun b'o nin nga an faa su'n ti'a kun'n, man Nyanmien bôé sannzan!

¹⁰ ?Nde nga n ken ye'n, swran'm bé nyrun annze Nyanmien nyrun dunman ye n kunndeo? ?N waan n yô so nan swran'm bé klô n sa? Se n waan n yô so nan swran'm bé klô n sa'n, wuun n su yô'a Christ swran.

Jésus-Christ ye o sunmaan Paulo

¹¹ Aniaan mun, man n kan nde kun klé amun: Dyasin fe nga n kan kléé amun'n, nanh swran mun ye bé kpe wlaa n nuaan.

¹² Nanh swran ye o kan kléé mion, ye man sue'en swran fi a nun, sannge Jésus-Christ ye o yii nglô kléé mion.

¹³ Laa bo n te ô Juif'm bé Nyanmien sule'n nun'n, an tii sa nga n yôli'n, n klé Nyanmien i Asonun'n yale lélé tra yale kléle su, n waan nh nunnuinh.

¹⁴ N ti Juif'm bé nun Nyanmien sufue dan kpa tra n wiéngu'm bé nun kpanngban kpa, ye é nannan'm bé nzuen'n lô n kpa.

¹⁵ Sannge Nyanmien dun mmua fa min nan min nin a gua min asé, ye i klun-ufué'n ti o flee min.

¹⁶ Ke o klô ke oh yih i wa'n nglô klé min nan n ken i nde'n klé bé nga bé ti'a Juif'n, man kô kunnde'e i wun ngwlele swran wié sa nun.

¹⁷ Man oman bé nga bé ô Jérusalem lo bo Nyanmien dun mmua sunmaan bé nan wa sunman min'n bé sin, sannge n woo Arabie. I sin n woo Damas ékun.

¹⁸ Ke o dii afue nsan'n, n woo Jérusalem Céphas i sile, n dii lé blu lé nnun i wun le.

¹⁹ Man wu'an bé nga Nyanmien sunmaan bé'n bé wié fi san é Min'n i niaan bian Jacques tye ye n wuin ékuon.

²⁰ Nanwle, nde nga n klee ye'n, m bua'a atô, Nyanmien Kpli'n ti n lalôfue.

²¹ Ke o yôô so'n ye n woo Syrie nin Cilicie bé akpasua lie'n suo.

²² I nun so'n nun, Christ i asonunfue nga bé ô Judée lo'n, bé si'a min,

²³ san n dunman'n ye bé ti ke, bian'n bo laa o klé é yale'n, sien'n o su kan Christ i sulafile nde'n bo laa i waan oh nunnunh su'n.

²⁴ Sa nga Nyanmien yô maan min'n ti, bé menmen.