Filipfuɛ Mun 2 - Nyanmien nde Ufle

Christ yôô i wun aénvue, o man o nyaan nyrun

¹ Swran wunmuan bo amun nin Christ an ti'n ti, o man amun afotue, klôle b'o klô amun'n ti o gua amun awlen su nzué, amun nin Nyanmien Wawe'n amun nuan se, an klô amun wiéngu an wun i aunnvue.

² I so'n ti, anh yô man n klun dyo kpa. Man amun akunndan'n yô kun, anh klô amun wun, man amun nuan se.

³ Nanh an bu amun bobo amun wun akunndan yô liké fi, nanh an kunnde amun dunman, nanh an tu amun wun, sannge anh bu swran wié'm bé swran tra amun bobo.

⁴ Nanh man swran fi bu i bobo i ninngé'm bé akunndan, sannge man amun wiéngu'm bé lie'n lô amun.

⁵ Anh bu akunndan kunngba nga Christ-Jésus buli'n wié.

⁶ I b'o nin Nyanmien bé ti kun'n wa kunnde'a ke o fe i wun sunnzun Nyanmien,

⁷ wa bu'e i so'n liké fi, o yô i wun kanga, o yô i wun ke klo swran sa.

⁸ Ke o katyii i wun swran so'n, o yô i wun aénvue, o yô ainyiefue lélé o fa wuli, waka'n su ye o wulio.

⁹ I so'n ti ye Nyanmien fe sié liké'n kwlaa su, bo i dunman'n fu tra dunman'n kwlaa nion.

¹⁰ Nan ke liké kwlaa nga bé ô nyanmien su lo'n, nin asie'n su wa'n, nin asie'n i bô lo'n, bé ti i dunman Jésus'n, bé kôtô i bô,

¹¹ ye o fité bé kwlaa bé nuan ke Jésus-Christ ti bé Min, nan é Si Nyanmien'n nyan nyrun.

Anh yô ke nzraama sa

¹² I so'n ti, n swran kpa mun, ke n wô amun wun lo bo amun nyin fa yi min titi'n, sien'n kannze n nu'an lo'n, man amun nyin yi min kpa tra laa'n. Ke o kô yô nan amuan nyan amun ti mlonmlon'n, anh mian amun nyin di dyunman kpa.

¹³ Afin Nyanmien bobo ye o man i klun sa yôle'n yô amun fe, ye man an kwla yôo.

¹⁴ Liké kwlaa nga amunh yôh'n, nanh an idyo amun kônviabô, nanh an katyi amun nuan,

¹⁵ i so'n nun bé su kwla ka'an amun wun nde te fi, ye bé su wu'an sa te kaan sa amun wun. Se an yô so'n, amunh yôh Nyanmien mma mun bo bé kwla kputu'a amun adyulisufue tete bo ba satyi'n bé nun. An ti ke nzraama b'o kpadya men'n nun sa bé nun,

¹⁶ ye an fa nde b'o man nguan'n klé bé. Se an yô so'n, Christ bale tyen'n nun nh nyanh komin, ye béh wunh ke n dyunman'n nin min afe'n wa yô'a ngben.

¹⁷ Nyanmien su bo an lafi'n ti ke nnen bo bé fa soe'n sa. Se bé fa min uka su men'n, oh dyoh n klun ye amun kwlaa amunh yô m mô.

¹⁸ Amun kusu, amun klun dyoh, ye nh yôh amun mô.

Timothée nin Épaphrodite

¹⁹ N wla ô é Min Jésus su ke se o tye kan'n, oh manh min atin n sunman Timothée amun wun lo, nan se n ti amun wun lo nde'n, n wla'n gua asé.

²⁰ Afin i kunngba tye ye o nin min é akunndan'n ti kun bo amun nde lôé kpaa.

²¹ Bé nga'm bé lie'n, bé bobo bé ninngé'n ye o lô béo, Christ-Jésus lie'n lô'a bé.

²² Amun bobo an si Timothée ke i nzuen'n ti kpa, o uka min di dyunman ke ba yasua kun uke i si'n sa dyasin fe kanle'n nun.

²³ O man, se n wun wafa nga béh siéh n su'n i wle'n, m man oh bah amun wun lo.

²⁴ Ye n wla ô é Min'n su ke, se o tye kan'n, oh manh min atin m bobo mh bah amun wun lo.

²⁵ N wun i ke, se n sunman Épaphrodite b'o ti n wiéngu dyunman difue bo min nin i é fe'n amun wun lo'n, o ti kpa. Bian so'n amun bobo ye an sunmeen ke o fa liké nga n sa mien i wun'n ble mion.

²⁶ I wla lô amun kwlaa. Ke an tii i ke i wun lôli'n, o man i klun titii kpa.

²⁷ Nanwle, i wun lôô kpa o wa dé wu, sannge Nyanmien wuun i aunnvue, ye o wuun n kusu min aunnvue wié, nan n wla'n wa bô'a tra'a su.

²⁸ I so'n ti ye n sunmen amun wun lo ndende nion, nan se an wuin ékun'n, amun klun dyo, ye n kusu n wla'n gua asé.

²⁹ Anh so i nun amun klun-ufué su é Min'n ti. Ye anh bu swran nga bé ti ke i sa'n bé swran,

³⁰ afin Christ dyunman'n ti ye o wa dé wu nion. O fe i wun maan wié'n ke o di dyunman nga amuan nya'an amun ti a di'a ma'an min'n.