Efɛzfuɛ Mun 5 - Nyanmien nde Ufle

Amuan kpen wéiin'n nun

¹ Ke an ti Nyanmien i alwen su ba'n, anh nian liké ng'o yô'n su, anh yô.

² Sa kwlaa nga amunh yôh'n, anh yôé swran klôle'n ti, ke Christ kusu klôli é b'o fe i wun maan Nyanmien é ti ke te nnen bo bé yre'n (*f41*) b'o bon fannin Nyanmien bué nun'n sa.

³ An ti Nyanmien i swran, i so'n ti, nanh man bé ti bla nin bian kunndele, nin sa tete yôle, nin bé nyin b'o yi'a liké'n, bé nde fi amun nuan nun.

⁴ Ye nanh man bé ti nde tete, nin nde finfin, nin aôwi tete dile'n amun nuan nun. Bé ti liké b'o nin amun fataman, sannge man bé ti Nyanmien asénna nde amun nuan nun.

⁵ Afin nanwle, swran kwlaa nga bé ti bla nin bian kunndefue'n, nin sa tete yôfue'n, nin bé nga bé nyin yi'a liké bo bé ti ke amuen sofue sa'n, bé nun wié fi su nya'an liké fi men nga Christ nin Nyanmien bé siéé'n nun lo.

⁶ Nanh man swran fi fa nde ngben wié laka amun, afin sa so'm bé ti ye Nyanmien i ya'n o wa dyaô bé bo bé nyin yimen'n bé su nion.

⁷ Nanh amun nin bé di mlonmlon.

⁸ Laa an wô aôsin nun, sannge swran wunmuan bo amun nin é Min'n amuan katyi'n ti, amuan fité wéiin nun sien'n. I so'n ti, anh yô sa ng'o klé ke an wô wia klénglé kpa'n nun'n.

⁹ Afin bé nga bé ô wia'n nun'n, bé yô swran yé, bé yô sa kpa, bé di nanwle.

¹⁰ Anh mian amun nyin anh yôh sa ng'o yô é Min'n i fe'n.

¹¹ Nanh amun nin bé nga bé fa aôsin'n kata bé nyin bé yô sa b'o yô'a sa fi yé'n mun di, sannge anh yô man bé wun sa so'm bé wle.

¹² Afin sa nga swran so'm bé fia yô'n, i kanle'n yô nyannzuen.

¹³ Ke bé kô wun sa so'n kwlaa bé wle'n, bé wun bé wafa nga bé ti'n wéiin,

¹⁴ afin liké kwlaa nga bé wun bé wafa nga bé ti'n wéiin'n, o man bé wun asé. I so'n ti, bé séé ke: «Lafifue, tinngé, Dyaô fuen'm bé nun Ye Christ man ah wunh asé.»

¹⁵ I so'n ti, anh nian amun dyaôsu'n su kpa. Nanh an yô ke swran b'o wu'an sa wle sa, sannge anh yô ngwlelefue.

¹⁶ Ke amuan nyan amun ti'n, nanh an tran le ngben, anh yô liké ng'o yô sa yé'n, afin ble nga é ô nun ye'n ti te.

¹⁷ I so'n ti, nanh an yô sinnglinfue, sannge anh mian amun nyin ke amunh sih liké nga é Min'n klô ke an yô'n.

¹⁸ Nanh an non nzan bô, afin o yô swran wannzô, sannge man Nyanmien Wawe'n sié amun mlonmlon.

¹⁹ Ke amunh kôkôh yale'n, anh kan psaume, anh tô Nyanmien manmanle dyué nin asonun dyué. Anh tu amun klun tô dyué manman é Min'n, anh kan psaume ng'o menmen'n.

²⁰ Sa'n kwlakwla su anh la é Si Nyanmien asé titi é Min Jésus-Christ dunman nun.

Yasua nin i yi

²¹ Ke amun nyin yi Christ'n ti, anh bu amun wiéngu swran.

²² Bla mun, ke an bu é Min'n i swran'n, anh bu amun wun'm bé swran so, nanh an fa amun nyin wlawla bé,

²³ afin yasua ye o sié blaa, ke Christ kusu ti Asonun'n i sukpen'n sa. I ye o ti Asonun'n b'o ti i wunnen'n i Ti Défueo.

²⁴ Ke asonunfue'm bé bu Christ swran'n, man mmla'm bé bu bé wun'm bé swran so sa'n kwlaa nun.

²⁵ Yasua mun, ke Christ klôli Asonun'n, amun kusu anh klô amun yi mun so.

²⁶ Afin Asonun'n ti, o fe i wun mannin nan ke o wunnziin b'o yô yeiin i nde'n ti'n, o katyi Nyanmien lie mlonmlon.

²⁷ O yôé so nan ke Asonun'n beh i wun le'n, oh wunh ke o ti klaan, o ti yeiin, le fi nu'en i wun, i wun trale'n ti'a nyonnyonwa, o ti Nyanmien lie mlonmlon.

²⁸ I so'n ti, yasua mun, anh klô amun yi mun ke an fa klô i bobo wun.

²⁹ Swran fi kpo'e i bobo wun, sannge o te i wun, o nien i wun su ke Christ kusu nian Asonun'n i lika'n sa,

³⁰ afin é ti i wunnen'n i lika'n wié.

³¹ «I so'n ti ye man yasua yatyi i si nin i nin, o fe i wun menten i yi, ye bé nnyon'n bé katyi swran wunmuan nion.»

³² Nanwle nde so'n b'o te nglô wa'n ti nanndôlie. Ke n ken i so'n, n fa nde so'n sunnzun Christ nin Asonun'n,

³³ sannge kusu o ti amun lie wié. Man yasua kun klô i yi ke o fa klô i bobo wun'n sa, ye man mmla'm bé kusu bé bu bé wun'm bé swran.