Efɛzfuɛ Mun 4 - Nyanmien nde Ufle

Christfue'm bé bô kun yôle

¹ I so'n ti, m bo é Min'n ti ye n ti bisuafue'n, n sre i kpa ke an bu flele nga Nyanmien flee amun'n i akunndan, nan an yô sa ng'o ti i nuan su'n.

² Nanh an tu amun wun mlonmlon, anh yô weteefue, anh blu sa'm bé su, sa nga amun wiéngu yô bo an wuin'n, mon o son amun nun i klôle bo an klôé'n ti.

³ Amun bô bo Nyanmien Wawe'n man wa yô kun anuanse bo an di'n ti, anh nian su kpa mon o yô so tititi.

⁴ Ke Nyanmien fle amun bo liké nga an fa amun wla gua su'n ti kun'n, i kunngba'n, wunnen'n ti kun, ye Nyanmien Wawe'n kusu ti kun.

⁵ É Min'n ti kun, sulafile wafa nga é lafi Christ su'n ti kun, baptême'n ti kun,

⁶ Nyanmien'n ti kun, o ti swran'n kwlaa bé Si, o sié liké'n kwlaa, bé wun i sa nuan lika'n kwlaa, o tran lika'n kwlaa.

⁷ Sannge swran kun i liké lie nga Christ men i ke o yô'n, ye o kwla yôo.

⁸ I so'n ti ye man bé séé ke: «Ke o fuu nglô lo'n, O fa bé b'o traa bé lômuen'n mun woli, Ye o man swran'm bé liké ke bé yô» nion.

⁹ ?Ke bé sé ke: «o fuu nglô lo'n,» i bô ti se? I bô klé ke o dun mmua oo asie'n i bô mmuamua kpa lo.

¹⁰ I b'o oo asie'n i bô lo'n, i kunngba'n o fuu nglô mmuamua kpa lo o tra nyanmien su lo'n su nan oh tranh lika'n kwlaa.

¹¹ Nyanmien siéé swran wié mun ke o sunman bé, o sié wié mun ke bé idyo i nuan, o sié wié mun ke bé bô i dyasin fe'n, o sié wié mun pasteur nin liké kléfue.

¹² Ke o kô yô nan i swran'm ba yô kpa nan ba di i dyunman'n nan Christ i wunnen'n wa yô kpa'n ti, ye man bé nun kunngun bé dyunman'n ti wafawafa so nion.

¹³ O man éh yôh swran lélé é kwlaa éh yôh kun Nyanmien Wa'n i su bo é lafi'n nin i sile bo é sii kpa'n ti, ye éh yôh swran lélé béh kwlah fa é sunnzun wafa kwlaa nga Christ ti'n.

¹⁴ Ke o kô yô so'n, é ti'a ba kaan kun bo é fa atô nde kwlaa nga swran'm bé gble'n ti bé ken ke bé fa lakalaka swran mun'n su, b'o man é ko wa ko wa ke mméli bo aunngban'n fe ko wa ko wa'n sa.

¹⁵ Sannge se é klô swran bo é di nanwle'n, éh nyinh, éh yôh swran, éh fah Christ sa'n kwlaa nun. I ye o ti Asonun'n b'o ti i wunnen'n i ti nion,

¹⁶ ye man wunnen wunmuan'n kwlaa ô leo, ye wunnen so'n i lika kun dyunman lie nga bé klé i ke o di'n o dio, afin bé kwlaa bé sasa su. O man o nyin o yô kpa klôle bo bé klô bé wun'n ti.

Christ ti ya nyan nguan

¹⁷ I so'n ti, é Min'n dunman nun n sé amun ke yiô, nanh amun nzuen'n fa bé bo bé ti'a Juif'n bé lie'n kun. Bé le'a akunndan,

¹⁸ bé kwla wu'an sa wle. Nguan nga Nyanmien fa man swran'n, bé dunman te'a nun wié, afin ba kété, o man bé si'a sa fi.

¹⁹ Bé si'a nyannzuen kun, wlaka'n wa kun bé kpô, bé katyi'a sa tete'm bé yôle mlonmlon.

²⁰ Sannge amun lie'n, nenh i so ye an sueen Christ nde'n nuon.

²¹ Afin nanwle, an tii Jésus nde bo bé kan'n, ye swran wunmuan bo amun nin i katyili'n ti, bé kléé amun nanwle nde ng'o kléli'n.

²² I so'n ti, anh wla amun nzuen laa b'o man an yô sa ng'o fataman'n i asé. I ti ye amun nyin blô ninngé'm bé su, an laka amun wun lélé an satyi nion.

²³ Man Nyanmien bô amun ufle o katyi amun akunndan'n.

²⁴ Ye anh fa nzuen ufle b'o fa Nyanmien lie'n, b'o man amunh yôh kpa, amunh yôh i klun sa nanwle bo an di'n ti.

²⁵ I so'n ti, anh yatyi atô buale'n, anh di nanwle klé amun wiéngu, afin é kwlaa é ti swran wunmuan.

²⁶ Se an fa ya'n, nanh an yô sa te. Nanh an fa ya so'n lélé man wia'n to su.

²⁷ Nanh an man mmusu'm bé si Satan'n i wluwle.

²⁸ Swran ng'o wua'n, mon o yatyi, o di dyunman nan o nyen i nuan nun alie nan o nyan wié ti swran wié'm bé wun nyanman nun.

²⁹ Nanh nde te kun sa fin amun nuan fité, sannge anh kan nde ng'o ti kpa bo swran tio, o yô swran'n, nan o yô bé kwlaa nga bé ti'n bé fe.

³⁰ Nanh an bô Nyanmien Wawe'n i wla, afin i ye Nyanmien fa maan amun b'o klé ke an ti i lie lélé fa dyu tyen nga éh nyanh é ti mlonmlon nion.

³¹ Anh wla klunwi'n, nin awlen fufu'n, nin ya fale'n, nin ndengan'n, nin swran wun satyile'n, nin swran kpole'n bé kwlaa bé asé.

³² Anh yô amun wun yé, anh si amun wun aunnvue, sa nga amun wiéngu yô amun'n, anh yatyi tyee, ke Nyanmien kusu yatyi sa nga an yôlii'n tyee amun Christ ti'n sa.