Efɛzfuɛ Mun 3 - Nyanmien nde Ufle

Bé nga bé ti'a Juif'n bé flele

¹ I so'n ti, m Paul n ti Christ-Jésus i bisuafue amun bo an ti'a Juif'n amun ti.

² Sa nga Nyanmien i klun-ufué'n ti o man n yô man amun'n, n lafi su kpa ke an tili.

³ O man n si i klun sa b'o fiee swran'm bé nyrun'n. Sa so'm bé wié ye m bô su kléé amun n fluwa'n nun ityra nion.

⁴ Se an kanngan'n, amunh wunh i wle wéiin ke n si Christ i wun nde bo Nyanmien fiee swran'm bé nyrun'n kpa.

⁵ Lalafue nun sa so'n Nyanmien yi'e nglô klé'a swran mun ke nde o man i Wawe'n yi i nglô klé i swran'm bo Jésus sunmaan bé'n nin i nuan idyofue mun'n sa.

⁶ Sa so'n yele ke liké nga Nyanmien waan oh fah men i swran mun'n, o nin liké ng'o sé ke oh yôh man bé'n, bé nga bé ti'a Juif'n bé dunman teh nun wié, ye bé nin Juif mun ba yô kun dyasin fe b'o man bé nin Christ-Jésus ba katyi swran wunmuan'n ti.

⁷ Dyasin fe so'n i dyunman bo Nyanmien man n di i klun-ufué'n ti'n, i fanngan nun ye n dio.

⁸ Nyanmien yôô m bo n ti i swran'n kwlaa bé nun kaan'n n yé, o man n kan klé bé nga bé ti'a Juif'm bé ke Christ i anyanbéun'n tyennin, bé kwla ke'en bé nuan nun.

⁹ Ye kusu o man n klé bé sa nga bé yô nan wa yô i klun su'n, wéiin. Nyanmien b'o yii ninngé'n kwlaa'n, lalafue nun o fiee i klun sa so'n swran'm bé nyrun,

¹⁰ nan ke o fin nde'n, nyanmien su lo mmusu nin ngbenngben'm bé wun Nyanmien i ngwlele'n, ninngé kwlaa ng'o yô bé Asonun'n nun'n, bé nun.

¹¹ Ke o yôé so'n, sa ng'o dun mmua buu i akunndan lalafue nun ke o man é Min Christ-Jésus yô'n, o kpeen su.

¹² Swran wunmuan bo é nin i a katyi, nin i su bo é lafi'n ti, é kwla ko Nyanmien wun lo, é klun ti'a é kaan sa.

¹³ O man nh sreh amun ke, nanh amun sa sin bubu amun nyrennen nga n wuin amun ti'n ti, afin o ti amun anyrunnyan liké.

Klôle nga Christ fa klô yé'n

¹⁴ I so'n ti, n kôtô é Si'n bô.

¹⁵ I dunman'n wô ôsuôsu'n kwlaa su, nyanmien su lo ô, asie'n su wa ô.

¹⁶ Ke i aunndie ninngé'm bé sonnin dan kpa'n ti, nh sreh i ke i Wawe'n wla amun fanngan nan an tra amun awlen ye an dyran kéklé,

¹⁷ nan Christ su bo an lafi'n ti, o tran amun awlen'n nun. Ye nh sreh i ke o man an wun klôle b'o fa klô amun b'o man an dyran kéklé'n, i wle wéiin,

¹⁸ ye amun nin Nyanmien swran'n kwlaa an wun ke klôle so'n b'o fa klô amun'n ti dan. Se é kwla fa sunnzun liké wié'n, wuun éh séh ke o ti tetreetre, o ti tenndenndeiin, o ti kplôuun kpa, ye o ti kéndéngléiin.

¹⁹ Kannze swran fi kwla wu'an klôle bo Christ fa klô yé'n i wle kpa'n, nh sreh i ke an wun i wle, nan an fa Nyanmien Kpli'n sa'n kwlaa nun.

²⁰ Ke é wun sa nga Nyanmien Kpli'n yô man yé'n, o man é si ke o kwla yô sa dan tra liké kwlaa nga é sre i ke o yô'n, o nin liké kwlaa nga é bu i akunndan'n.

²¹ Man Asonun'n nin Christ-Jésus bé be i nyrunnyan ôsuôsu'n kwlaa nun tititi. Mon o yô so!