Efɛzfuɛ Mun 2 - Nyanmien nde Ufle

Bé nga ba wu'n ba nyan nguan

¹ Laa amun fonle'n nin amun sa te yôle'n ti, Nyanmien nyrun an ti ke amuan wu sa,

² ye amun nzuen'n fa bé nga bé ô ye'n bé lie'n, amun nyin yili nglô lo mmusu'm bé si'n, i ye nde o wlawla swran nga bé nyin yi'a Nyanmien nion.

³ Laa é kwlaa é ti ke bé sa, liké nga klo swran kônvi soe'n, ye é kunndeo, liké kwlaa ng'o yô é fe bo é bu i akunndan'n, ye é yôo. Nzuen so'n bo bé wulii nin yé'n ti, san Nyanmien fah é wun ya ke o fa swran wié'm bé wun ya'n sa.

^4-5 Sannge Nyanmien ti aunnvue sifue dan, o man ke é te ti ke swran bo wa wu sa i nyrun'n, klôle b'o fa klô yé'n ti, o maan é nin Christ é nguan. Yé bo Nyanmien yôô amun'n ti o man amuan nyan amun ti.

⁶ Swran wunmuan bo é nin Christ-Jésus é ti'n ti, o man é nin i tyennin, ye o man é nin i é tran nyanmien su lo

⁷ nan ble ng'o ba lo'n nun, ke oh yih i kpa b'o yôli é Christ-Jésus ti'n, i nglô'n, béh wunh ke i yé b'o yôô yé'n i dan'n le'a wunsu.

⁸ Afin Nyanmien i yé b'o yôô amun'n ti o man amuan nyan amun ti i su bo an lafi'n ti. Amun ti nyanle so'n o fi'an amun bobo, Nyanmien ye man an nyaan amun tio.

⁹ Nanh sa kpa nga an yôli'n tio, i so'n ti, swran fi kwla fa di'e i nuan.

¹⁰ Afin é ti i sa nuan liké, ke é nin Christ-Jésus é yôô swran wunmuan'n, Nyanmien bô é ufle nan é yô nyôlie kpakpa ng'o dun mmua sié é ke é yô'n.

Christ ti ya katyi swran wunmuan

¹¹ I so'n ti, anh bu wafa nga an ti laa'n i akunndan. Amun bo amun ôsu'n fi'an Juif'm bo bé fle bé klen wlafue bo swran ye o fe i sa yô bé'n, bé sé amun ke an ti'a klen wlafue.

¹² I nun so'n nun, amun nin Christ di'a mlonmlon, an ti Israël nvlé'n nun aôfue, liké nga Nyanmien séé ke oh yôh men i swran mun nde ng'o kan kléé Abraham'n ti'n, amun lie nu'an nun, ke an wô le'n, an le'a liké bo an fa amun wla gue i suo, an si'a Nyanmien.

¹³ Amun bo laa amun nin Nyanmien diman'n, sien'n swran wunmuan bo amun nin Christ-Jésus amuan katyi'n ti, ke o wuli bo i mmôdya'n guali'n, o man amun nin i a di.

¹⁴ Afin i ye o ti é afien siésiéfueo, o kan bé nvlé fa nnyon'n bôô nun, ye sa ng'o ô bé afien b'o ti ke tale sa'n, o bubulii. O fe i wun

¹⁵ tô mmla'n nin i nun nde'n, nan bé nvlé nnyon so'n bé katyi nvlé ufle kun swran wunmuan bo bé nin i ba katyi'n ti, ye bé di anuanse.

¹⁶ Ke o wuli waka'n su'n, o man sa ng'o ô bé nvlé nnyon'n bé afien'n o wiéli, ba katyi swran wunmuan, ye wa siésié bé nin Nyanmien bé afien.

¹⁷ O wa kan dyasin fe'n kléé amun bo amun nin Nyanmien diman'n, nin bé nga bé nin i di'n, o sé ke amun nin i amun nuan a se,

¹⁸ afin é kwlaa, se é ti Juif ô, se é ti'a Juif ô, Christ ti é kwla ko é Si Nyanmien wun lo i Wawe'n i fanngan nun.

¹⁹ I so'n ti, an ti'a aôfue annze nvlé wié nunfue kun, sannge amun nin Nyanmien swran mun, amun nvlé ti kun, ye an ti i mma mun.

²⁰ An ti ke sua bo bé fa teke i bô nga bé bo Jésus sunmaan bé'n, bé nin Nyanmien nuan idyofue'm bé wleli i asé'n i su'n sa, ye Jésus-Christ bobo ye o ti yebue kpa b'o tra sua'n i tyondyo'n i asé nion.

²¹ I ye man sua wunmuan so'n o nyin, o yô kpa, ye o yô Nyanmien sua, swran wunmuan bo é nin é Min'n é ti'n ti.

²² Amun kusu, swran wunmuan bo amun nin i amuan katyi'n ti, Nyanmien Wawe'n i fanngan nun an ti sua bo Nyanmien tran nun'n i yebue'n wié.