Efɛzfuɛ Mun 1 - Nyanmien nde Ufle

Paul kle fluwa nga kô maan Éphèse lo Christfue mun

¹ M Paul ye n kle fluwa nga ble amun bo an wô Éphèse lo muon. O ti amun bo an ti Christfue kpa bo amun nin Christ-Jésus amuan katyi swran wunmuan'n amun lie. Christ-Jésus sunmaan min ye n sunmanle so'n ti Nyanmien klun su.

² Man é Si Nyanmien nin é Min Jésus-Christ bé man an nyan yé, ye man amun wun dyo amun fouun!

Ninngé kpakpa nga Nyanmien yô man é Christ ti'n

³ É Min Jésus-Christ i Si Nyanmien Kpli i kwla ô! Ke é nin Jésus-Christ é katyii swran wunmuan'n, o fa nyanmien su lo ninngé kpakpa'n kwlaa b'o kwla yô é wun sa yé'n maan é.

⁴ O dun mmua faa é ke é nin Christ é katyi swran wunmuan, é yô i lie, ke nanh mon o wun sa kaan sa é wun, nan wa bô men'n i bô.

⁵ Klôle b'o klô yé'n ti, o dun mmua buu é akunndan ke sa nga Jésus-Christ yôli'n ti oh fah é katyi i klun ba. I klun dyo su ke oh yôh i so ti ye o yôli so nion,

⁶ nan ya bô i dunman yé dan b'o fe i awlen su Ba'n yôô yé'n ti.

⁷ Ke Christ wuli bo i mmôdya'n guali'n ti, Nyanmien déli é ti, o yatyi sa nga é yôlii'n tyee é. I so'n nun é wun yé dan nga o yôô é

⁸ i klun-ufué'n ti'n. I ngwlele b'o si'n nin i sa kwlaa wle wunle'n ti,

⁹ o man é si i klun sa b'o fiee swran'm bé nyrun'n o nin sa klaan nga i waan Christ yô man yé'n.

¹⁰ Sa so'n bo i waan oh yôh'n, ke i tyen'n dyu'n, oh yôh. Sa so'n yele ke oh kanh swran'n kwlaa nin asie'n su liké'n kwlaa nin nyanmien su lo lie'n kwlaa bô nun, ye oh fah Christ sié bé su.

¹¹ Liké kwlaa nga Nyanmien klô ke oh yôh'n, o yô, o man ke é nin Christ é katyii swran wunmuan'n o fa é katyi i lie, afin i bobo ye o siéé i soo.

¹² O yô é so nan é bo é dun mmua fa é wla guaa Christ su'n, é men i komin su.

¹³ Amun kusu, ke an tii dyasin fe'n b'o ti nanwle'n, b'o man amun kwla nyan amun ti'n, an lafii Christ su. Ke amun nin i amuan katyi swran wunmuan'n ti, Nyanmien fe i Wawe'n b'o ken i nde'n maan amun b'o klé ke an ti i lie mlonmlon.

¹⁴ Liké nga Nyanmien séé é ke éh nyenh'n, i Wawe so'n ye o klé ke éh nyenh sakpa nion. O klé é wéiin ke tyen nga o kô dé i swran'm bé ti mlonmlon'n éh nyenh, ye oh nyanh komin.

Sa nga Paul sree Nyanmien ke o yô'n

¹⁵ I so'n ti, n kusu ke n tii é Min Jésus i su bo an lafi'n nin klôle bo an klô Nyanmien i swran mun'n,

¹⁶ o man n la Nyanmien asé, ye m bô amun dunman kléé tititi.

¹⁷ Ye n sre é Min Jésus-Christ i Nyanmien b'o ti é Si b'o le nyrun'n, ke o fe i Wawe'n man amun man an si ngwlele, ye o yi i wun nglô nan an sii kpa.

¹⁸ N sre i ékun ke o man an wun sa wle wéiin kpa nan an si liké nga é nyin ô i sin'n, flele b'o flee yé'n ti. Ye an si ke i swran'm bé anyanbéun'n oh yôh dan, afin liké nga i waan oh fah man bé'n o ti liké kpa sakpa.

¹⁹ Ye an si i kwlale dan b'o le'a wunsu b'o yi i nglô klé é bo é lafi i su'n. I kwlale kunngba so'n

²⁰ ye man o kwla tyeen Christ ye o fe siéé i fama su nyanmien su lô.

²¹ O sié liké'n kwlaa, mmusu mun ô, kpenngben mun ô, baé ô, bé kwlaa nga bé sié swran mun ô, o nin swran kwlaa nga bé bô bé dunman'n, se ble nga é ô nun ye nin ô, se ble ng'o ba lo nun ô.

²² Nyanmien man o sié liké'n kwlaa ye o fe siéé Asonun'n sukpen.

²³ Asonunfue'n kwlaa bé ti i wunnen, i bobo ye o ti i ti nion. I b'o ô lika'n kwlaa'n, o ô Asonun'n nun.