Kolɔsfuɛ Mun 4 - Nyanmien nde Ufle

¹ Amun bo an le kanga'n, anh yô bé kpa, anh yô liké ng'o ti su'n man bé, afin an si ke amun kusu, amun Min lie'n wô nyanmien su lo.

² Anh kôkô yale klé Nyanmien titi, anh fa amun wla'n kwlaa gua su yô, anh le i asé.

³ Ke amunh yôh so'n, anh sre Nyanmien ke o man é kusu é atin man é ken i nde'n, nan é kwla kan Christ nde bo Nyanmien fiee swran'm bé nyrun'n, afin i ti ye man bé wlaa m bisua nion.

⁴ Anh sre i ke o dyran n sin man n ken wéiin ke n kaan o ti su'n sa.

⁵ Liké nga an yô man bé bo bé ti'a Christfue'n, anh fa ngwlele yô. Ke amuan nyan amun ti'n, nanh an tran le ngben, anh yô liké ng'o yô sa yé'n.

⁶ Man amun idyole wafa'n yô swran'm bé fe, man amun nuan nun nde'n yô fe ke ndyin sa, nan swran ng'o usa amun sa'n, amuan te i su klaan.

Bé liké yôle

⁷ É niaan Tychique b'o ti é swran kpa'n, b'o ti n wiéngu dyunman difue kpa é Min'n i dyunman'n nun'n, o wa kan sa kwlaa ng'o ô n su'n klé amun.

⁸ N sunmeen amun wun lo nan an si sa ng'o ô é su'n nan o gua amun awlen su nzué.

⁹ N sunmen nin é niaan Onésime b'o ti amun nun kun, b'o ti é swran kpa bo é kwla fa é wla gue i su'n. Bé wa kan sa kwlaa ng'o ô wa'n klé amun.

¹⁰ Aristarque b'o nin min ô bisua'n nun wa'n o nin Marc Barnabas i niaan'n, béh yôh amun liké. Ba dun mmua ken i nde a klé amun ke, se o ba amun wun lo'n, an so i nun kpa.

¹¹ Jésus bo bé flee Justus'n i waan oh yôh amun liké. Juif'm bo bé lafi Christ su'n bé nun nsan so'n tye ye bé nin min é di dyunman nan swran'm bé yô men nga Nyanmien siéé'n i nunfueo. Bé uka min dan kpa.

¹² Épaphras b'o ti amun nun kun'n i waan oh yôh amun liké. Christ-Jésus i dyunman difue so'n o mien i nyin sre Nyanmien ke an yô swran an wun sa ng'o ti klun sa'n i wle kpa, nan an dyran kéklé.

¹³ Ke n nien lélé'n, n wun ke amun nin Laodicéefue nin Hiérapolisfue'm bé ti o fe dan kpa.

¹⁴ Luc b'o ti dootro'n b'o ti é swran kpa'n o nin Démas bé waan béh yôh amun liké.

¹⁵ Nh yôh é niaan nga bé ô Laodicée'n, nin Nympha nin asonunfue nga bé yie i awlô lo'n, bé liké.

¹⁶ Se an wié fluwa so'n kanngan'n, anh fa kô man Laodicéefue mun man bé kusu bé kanngan bé lie bé asonun'n nun, ye amun kusu anh kanngan nga Laodicéefue'm bé wa fa ble amun'n.

¹⁷ Anh sé Archippe ke o nian dyunman nga é Min'n fe sié i su'n su kpa, o nian nun dii kpa.

¹⁸ M bobo m Paul ye n klee nde kaan nga n fa yô amun likéo. Nanh amun wla fi ke n te ô bisua nun'n. Nh yrah n nuan ke an nyan yé!