Kolɔsfuɛ Mun 3 - Nyanmien nde Ufle

¹ I so'n ti, se amun nin Christ ye an tyennin'n, anh kunnde nyanmien su lo ninngé mun, Christ ti Nyanmien i fama su lo.

² Anh bu nglô lo ninngé'm bé akunndan, nanh an bu asie'n su wa lie'm bé akunndan,

³ afin an wuli, o man ôle nga an wô le nde'n, an wô Nyanmien sa nun, afin wa fa amun nin Christ a fie i wun lo.

⁴ Ke Christ bo amun nguan'n wô i sa nun'n o wa yi i wun nglô'n, oh yih amun nglô wié, ye nyrun ng'oh nyenh'n, amunh nyanh wié.

Sa nga bé yô bé laa'n nin nga bé yô bé sien'n

⁵ I so'n ti, anh wla amun asie'n su wa nzuen'n bé asé, bla nin bian kunndele, sa tete yôle, bé kônvi b'o so nyannzuen sa mun'n, bé nyin b'o blô liké'm bé su'n, bé nyin b'o yi'a liké'n b'o nin amuen sole'n ti kun'n.

⁶ Sa so'm bé ti ye Nyanmien i ya'n o wa dyaô [bé bo bé nyin yimen'n] bé su nion.

⁷ Laa bo sa tete so'm bé ti amun nzuen'n, ke an yô soo.

⁸ Sannge sien'n, anh yatyi sa so'n kwlaa, ya fale, awlen fufu, klunwi, swran wun satyile, nin nde tete b'o fin amun nuan fité'n.

⁹ Nanh an bua atô klé amun wiéngu, afin amuan wla amun nzuen laa b'o man an yô sa tete'n i asé,

¹⁰ ye amuan fa nzuen ufle b'o man amuan yô ke swran bo Nyanmien yi i ufle sa, o katyi swran so'n titi lélé o sii kpa, ye o fe mlonmlon.

¹¹ I so'n ti, o le'a ke wié ti Grec, wié ti Juif, bé wlaa wié klen, b'a wla'a wié klen, wié'm bé nyin nian timan, wié ti Scythe sinnglinfue, wié ti kanga, wié ti diéwa, sannge Christ ti bé liké kwlaa, ye o tran bé kwlaa bé awlen'n nun.

¹² An ti Nyanmien i swran, o klô amun, o faa amun. I so'n ti, man swran'm bé yô amun annvo, anh yô bé kpa, anh yô amun wun aénvue, anh yô weteefue, anh blu sa'm bé su. Anh fa liké so mun fa tyityi amun ti.

¹³ Sa nga amun wiéngu yô bo an wuin'n, mon o son amun nun, se swran kun yô i wiéngu sa'n, mon o yatyi tyee. Christ yatyi sa nga an yôli'n tyeli amun, o man amun kusu, sa nga bé yô amun'n, anh yatyi tye.

¹⁴ Ye sa ng'o ti tyinndyin tre i ngba b'o man i kwlaa so'n kwla yô yé'n yele ke an klô amun wiéngu.

¹⁵ Se é wun nga Christ man o dyo yé'n ti swran'n, wuun éh séh ke, mon o sié amun nin amun klun akunndan'n kwlaa, afin i so'n ti ye o fleli amun ke an yô swran wunmuan nion. Ye liké kwlaa nga Nyanmien yô man amun'n, nanh amun wla fi.

¹⁶ Man Christ nde b'o ti amun liké kpa'n tran amun klun. Anh kan klé amun wiéngu, ngwlele kwlaa nga an sii'n anh fa tu amun wun fo. Anh tu amun klun tô psaume nin Nyanmien manmanle dyué nin asonun dyué'n menmen, anh le i asé.

¹⁷ Se amunh yôh liké wié ô, se amunh kanh nde wié ô, liké kwlaa nga amunh yôh'n, anh yôé é Min Jésus dunman nun, ye i ti anh la é Si Nyanmien i asé.

Sa nga Christfue'm bé yôé bé awlô nun'n

¹⁸ Bla mun, nanh an fa amun nyin wlawla amun wun mun, anh bu bé swran, afin é Min'n i nyrun se an yô so'n, o ti kpa.

¹⁹ Yasua mun, anh klô amun yi mun, nanh an yô amun nyrun wiwi bé wun.

²⁰ Ba kanngan mun, man amun nyin yi amun si nin amun nin mun sa'n kwlaa nun é Min'n lie bo an ti'n ti, afin se an yô so'n, o yô i fe.

²¹ Ndya mun, nanh an yô sa ng'o kun amun mma'm bé ya'n, man bé sa sin bubu bé.

²² Kanga mun, man amun nyin yi amun min mun sa'n kwlaa nun, anh bu bé swran. Nanh ke ke bé ô le'n i ngunmin ye an yôé so nan swran'm bé klun dyo amun wuon. Sannge é Min'n bo an srôé'n ti, liké nga an yô'n, nanh an bu i sin.

²³ Liké kwlaa nga amunh yôh'n, anh tu amun klun yô ke é Min'n ye an su yô men sa, nanh an bu i ke swran ye an su yô men io.

²⁴ Man an si ke é Min'n bobo ye oh fah liké nga i waan i swran'm béh nyenh'n tua amun kaleo. Afin amun Min kpafue nga an sui'n, yele Christ.

²⁵ Afin swran ng'o yô sa ng'o ti'a kpa'n, oh nyenh i nuan liké, yele ke Nyanmien kpa'a swran nun.