Kolɔsfuɛ Mun 2 - Nyanmien nde Ufle

¹ N klô ke an si ke afe nga amun, nin Laodicéefue, nin bé nga bé si'a min'n bé ti o ô n su'n, o ti dan.

² M mian min nyin nan an tra amun awlen, ye klôle bo an klô amun wun'n ti amun bô yô kun, ye an si ngwlele kpa b'o man amunh wunh sa wle wéiin nan an si liké nga Nyanmien fiee swran'm bé nyrun'n, liké so'n yele Christ!

³ O ti ke betro sa, i nun ye Nyanmien fe i ngwlele'n nin sa wle wunle'n kwlaa fialio.

⁴ N ken i so nan swran fi a fe'e i nuan nun fe a laka'a amun.

⁵ Afin se m bobo n nu'an lo'n, sannge min akunndan'n wô lo. Ke n wun ke amun bô ti kun, an dyran kéklé an lafi Christ su'n, n klun dyo.

⁶ I so'n ti, ke an kpliin su ke Christ-Jésus yô amun Min'n, man amun nyôli'n klé ke amun nin i a katyi swran wunmuan,

⁷ o man i ti an dyran kéklé ke sua bo bé wle i bô asé kpa'n sa. Anh lafi i su kpa ke bé kléli amun'n sa, anh le i asé tititi.

Christ ti, liké'n kwlaa ti a sin a yia amun

⁸ Anh sasa amun wun, nanh man swran fi fe i sa ng'o si'n nin sa ngben wié fa laka amun, o nyan amun. Sa so'm bé fin lalafue'm bé nzuen'n, nin ninngé nga é nannan'm bé klé'n, bé fi'an Christ.

⁹ Afin ke é wun Christ b'o katyii swran'n, é wun wafa kwlaa nga Nyanmien ti'n.

¹⁰ O man swran wunmuan bo amun nin Christ b'o ti mmusu nin kpenngben'n kwlaa bé sukpen'n, amun ti'n ti, liké'n kwlaa ti a sin a yia amun.

¹¹ Swran wunmuan bo amun nin i a katyi'n ti, ba wla amun klen, amun klen lie so'n, nanh swran ye o wlalio, sannge o fin Christ bobo, i bô klé ke amun nin sa te'n wa bu.

¹² Ke bé yôli amun baptême'n, o ti ke bé siéli amun nin Christ, o man amun nin i tyennin, afin an lafi Nyanmien Kpli b'o ti kwlafue b'o tyenniin'n su.

¹³ Amun bo laa amun sa bo an yôli Nyanmien, nin klen bo ba wlaman amun'n ti, an ti ke swran bo wa wu sa'n, ke o yatyii sa kwlaa nga é yôlii'n tye yé'n, o maan amun nin Christ amun nguan.

¹⁴ O nunnuun mmla'n i nun nde ng'o ti é wun nde b'o man é di'a aladyé'n. O gueli i asé, afin o ti ke o bôbôlii waka'n su sa.

¹⁵ Christ i waka so'n ti, o bu mmusu nin kpenngben'm bé kwlale'n i bué, ke o fa bé yii kwlale'n nglô'n, o man bé wun bé wafa nga bé ti'n.

Anh kunnde nyanmien su lo ninngé mun

¹⁶ I so'n ti, nanh man swran wié kan amun nde liké diwa, nin liké nga amun non'n, nin tyen dile, nin anglô lékun, nin sabbat b'o ti bé tyen te'n ti.

¹⁷ Liké so'n kwlaa ti liké ng'o wa yô'n bé wawe, i kpafue'n yele Christ.

¹⁸ Nanh man swran b'o klô ke bé bu i aénvuefue'n, b'o kôtô ange'm bé bô, b'o fe i aôlia nun ninngé b'o wunnin bé'n di i nuan'n, o dé amun liké kpa nga an nyenniin'n. Swran so'n ke o bu liké nga o si'n i akunndan'n o tu i wun, i wun tule so'n ti ngben.

¹⁹ O fe'e i wun manta'an Christ b'o ti bé ti'n kpa kun. Christ ye man bé akpoleakpole nin bé ndin'm bé sasa su, ye man bé wunnen wunmuan'n yô kpa, ye o nyin ke Nyanmien klô ke o nyin'n saa.

²⁰ ?Se amun nin Christ ye an wuli'n, bo amun nin asie'n su ninngé'm ba bu'n, nzu ti ye an te yô amun wun ke an ti asie'n sufue sa bo an di bé mmla'n suo?

²¹ Bé sé ke: Bé fa'a liké nga! Bé di'a liké nga! Bé ka'an liké nga!

²² Liké so'n kwlaa ke bé kô fa kô yô liké nga bé fa yô'n, wuun wa wié. Bé ti swran'm bé mmla nin bé nde bé kan.

²³ Nanwle, ke bé su liké nga bé klô bé'n, bo bé yô bé wun ke bé ti aénvue sa'n, ye bé klé bé wun nyrennen'n, swran'm bé nyrun bé nde so'n ti sa b'o ti ngwlele liké kpa. Sannge sa so'm bé yôle'n ti ngben, o man swran'm bé kwla yatyi'a kônvi yôle'n.