2 Timote 4 - Nyanmien nde Ufle

¹ Nde nga m ma kan klé o ye'n, Nyanmien Kpli'n nin Christ-Jésus b'o wa di bé nga bé wuli'n nin bé nga bé nyin ô su'n bé nde'n, bé ti n lalôfue. I bale b'o wa ba'n nin i famien b'o wa di'n ti, nh sreh o kpa,

² se a nyan o ti ô, se a nya'an o ti ô, kan Nyanmien nde'n dyran su kpa klé bé man bé wun i wle. Swran ng'o yô sa'n idyoe, wla bé fanngan, tro o awlen kpa klé bé.

³ Afin tyen wié swran'm bé su fa'a nde nanwle'n su kun, béh yôh sa ng'o yô bé bobo bé fe'n, ye béh kunndeh swran kpanngban kpa ke bé klé bé liké ng'o yô bé fe'n.

⁴ Bé su sié'a bé su nanwle'n su kun, béh siéh bé su nde nga bé ti ke ngôwa sa'n bé su.

⁵ Sannge o lie'n, nion o wun su sa'n kwlaa nun, yale nga bé klé wo'n, mon o son o nun, dyasin fe i kanle b'o ti o dyunman'n di, dyunman nga Nyanmien fa wlo o sa nun'n guegue i bô.

⁶ N lie'n man katyi ke du vin bo bé fa gua man Nyanmien'n sa, n kole'n wa dyu.

⁷ Man mian min nyin man wanndi wanndile dan kpa, man dyu n dyuwle, n dyran kéklé lafii Nyanmien su.

⁸ Sien'n ba sié liké nga swran ng'o yô kpa'n bé fa yô i mô'n, lo a sié min. É Min'n b'o di dyole nanwle su'n ye oh fah man min tyen so'n nuon. Nanh min ngunmin ye oh fah man mion, sannge oh fah man bé kwlaa nga bé nyin te i sin'n.

Paul yiaa Timothée

⁹ Bô manndren tô n wa ityra'n,

¹⁰ afin men'n nun ninngé bo Démas klô bé'n bé ti wa wanndi min a o Thessalonique. Crescens kusu wa o Galatie, Tite a o Dalmatie.

¹¹ Luc ngunmin ye o nin min ô waa. A nin Marc anh bla, afin o uka min kpa n dyunman'n nun.

¹² N sunmaan Tychique Éphèse.

¹³ Se ah bah'n, fa n trale dan'n bo n yatyii Carpus sa nun Troas lo'n, nin fluwa'n, nin kplô nga bé kle su b'o ti n tyinndyin kpa'n ble min.

¹⁴ Alexandre b'o ti blale bôfue'n o yôô n te dan kpa. Sa ng'o yô min'n, Nyanmien Kpli kô tue i kale.

¹⁵ O kusu nian o wun kpa i lika, o sii nde nga é kan'n i akplôwa tete kpa.

¹⁶ Ke bé fa min oo dyole difue'm bé dyasu klikli'n, swran fi a dyra'an n sin, bé kwlaa bé wanndii min. Nanh man Nyanmien fa bé wun nde sié i klun!

¹⁷ Sannge é Min'n ye o dyran n sin wlaa n fanngan ye man n kwla ken i nde'n kwlaa, ye man bé kwla nga bé ti'a Juif'n bé tilio. O déé min dyra'n i nuan nun.

¹⁸ É Min'n déh min sa tete'n kwlaa nun, oh nianh n su, oh fah min ko i men'n nun nyanmien su lo. Man é yi i aye tititi! Mon o yô so!

Bé liké yôle

¹⁹ Nh yôh Prisca nin Aquilas nin Onésiphore awlôfue'm bé liké.

²⁰ Éraste kaa Corinthe lo, ye n yatyii Trophime b'o too tukpatye'n Milet lo.

²¹ Bô manndren bla nan ayre'n wa ba. Eubulus, nin Pudens, nin Claudia, nin é niaan'm bé kwlaa béh yôh o liké.

²² Man é Min'n nin o tran! Nh yrah n nuan ke an nyan yé!