2 Timote 1 - Nyanmien nde Ufle

Paul kle fluwa nga kô maan Timothée

^1-2 M Paul bo Nyanmien waan Christ-Jésus sunman min'n, nh kleh fluwa nga ble o Timothée bo a ti min awlen su ba'n. Christ-Jésus sunmaan min ke n kan nguan nga Nyanmien waan oh fah man bé nga bé nin Christ ba katyi swran wunmuan'n i nde. Man é Si Nyanmien nin é Min Christ-Jésus bé man a nyan yé, man bé si wo aunnvue, ye man o wun dyo o fouun!

Afotue bo Paul fa maan Timothée'n

³ N la Nyanmien bo min nin a nannan mun é sui bo é klun titi'a yé'n i asé. Kongue nin wia nun ke nh kôkôh yale klé Nyanmien'n, n kan o nde kléé titi,

⁴ afin ke mh buh o nyinmuen b'o guali'n i akunndan'n, n wla lô o kpa, se n wun woo oh yôh n fe.

⁵ N wla ô o Nyanmien su bo a lafii kpa'n su, o nannan Loïs nin o nin Eunice bé ye bé dun mmua lafii i su soo. Ye n si ke a lafi i su so wié kusu.

⁶ I so'n ti, nh sreh o ke liké nga ke n fa n sa fuoo o su, bo Nyanmien fa moon o ke a yô b'o ti ke sin sa'n, tro i nuan nian su.

⁷ Afin Nyanmien a fe'e i Wawe'n wa ma'an é ke é sa nyan, sannge o fe man é ke o wla é fanngan, é klô Nyanmien nin swran, ye é si ngwlele.

⁸ I so'n ti, nanh man nyannzuen kun o é Min'n i nde kanle nin min bo i dunman nun ye bé wlaa m bisua'n ti. Sannge Nyanmien fanngan nun, man nyrennen nga é wuin dyasin fe'n ti'n, o son o nun.

⁹ O déé é, o flee é ke é yô i swran, nanh ke é yô sa kpa ti ye o flee yéo, sannge é wun akunndan bo i bobo buli'n, nin yé bo i waan Christ-Jésus ti oh yôh yé'n tio.

¹⁰ É ble lie'n su ke é Ti Défue Christ-Jésus bali'n, ye o yii yé so'n i nglôo. O tuu wié'n i dyé'n, ye i dyasin fe'n ti o man ya si nguan b'o man swran wuman'n.

¹¹ Dyasin fe'n i kanle nin i kléle ti ye Nyanmien fa min, o sunmaan mion.

¹² I so'n ti ye n wun nyrennen ngaa, sannge o nin i so'n ngba nyannzuen ku'an min, afin n si swran nga n fa n wla'n guee i su'n. N sii wéiin ke liké kwlaa nga o fa wlaa n sa nun'n, i bobo kwla nian su lélé fa dyu tyen so'n nun.

¹³ Fa nde nanwle nga n kan kléé wo'n su nian su yô, afin swran wunmuan bo é nin Christ-Jésus ti'n ti é lafi Nyanmien su, é klô Nyanmien nin swran.

¹⁴ Liké kpa nga bé fa wloo o sa nun'n, Nyanmien Wawe'n b'o tran é awlen'n nun'n i fanngan nun nian su kpa.

¹⁵ A si ke bé kwlaa nga bé ô Asie men'n nun lo'n, ba wanndi min, bé wié yele Phygèle nin Hermogène.

¹⁶ Man Nyanmien si Onésiphore nin i awlôfue'm bé aunnvue, afin kpale sunman o gua min awlen su nzué. N wôsu nianle bisua nun lo'n wa yômen nyannzuen.

¹⁷ Ye i nun nga o baa Rome wa'n, o mien i nyin kunnde min lélé o wuun min.

¹⁸ Man é Min'n wun i aunnvue é Min'n i wun lo tyen so'n nun, afin a si n lika ng'o fa niaan min Éphèse lo'n kpa.