2 Piɛr 1 - Nyanmien nde Ufle

Swran ng'o kle fluwa'n kô maan bé'n

¹ N Simon Pierre, bo n ti Jésus-Christ dyunman difue, b'o sunmaan min'n, nh kleh fluwa nga ble amun bo Nyanmien man amun lafi i su kpa ke é sa'n. I so'n fin é Défue Jésus-Christ b'o ti Nyanmien'n, afin o ti swran kpa.

² Nyanmien nin é Min Jésus bo an si bé'n ti, bé man an nyan yé titi, ye man amun wun dyo amun fouun!

Nyanmien i swran flele nin bé fale

³ Ke é si swran ng'o flee é ke é nyan nyrun, ye é yô sa ng'o ti kpa ke i bobo sa'n ti'n, o man é liké kwlaa nga b'o man é kwla fa é wun mantan Nyanmien titi'n i fanngan nun.

⁴ Ke o yôô so'n, o kan nde fe klé é ke o wa yô liké dan man é nan ke an kô nyan liké so'n, an yatyi liké nga bé nyin blô su b'o man men'n satyi'n, nan an katyi ke Nyanmien sa.

⁵ Liké bo é wa nyan bé so'n ti, ke an lafi Nyanmien su'n, anh yô liké kwlaa nga an kwle i yô'n man amun nzuen'n yô kpa. Ke amun nzuen'n yô kpa'n, anh kunnde ke amunh wunh sa'm bé wle.

⁶ Ke an wun sa'm bé wle'n, anh nian amun wun su. Ke an nian amun wun su'n, anh tra amun awlen. Ke an tra amun awlen'n, anh fa amun wun mantan Nyanmien.

⁷ Ke an mantan Nyanmien'n, anh yô amun niaan'm bé kpa. Ke an yô bé kpa'n, anh klô swran.

⁸ Nanwle, se an nian sa so'm bé su bo an yô bé titi'n, ke an kunnde ke amunh sih é Min Jésus-Christ'n san amunh siih, afin an su tra'an le ngben, ye liké nga an yô'n oh yôh yé.

⁹ Sannge swran ng'o yô'a sa so mun'n, o ti anyansifue, o wu'an mmua, i wla fi i wun sa laa'n b'o wiéli'n su.

¹⁰ Aniaan mun, i so'n ti, anh bu flele nin fale bo Nyanmien faa amun'n i akunndan kpa, nan anh dyran kéklé. Se an yô so'n, an su fonman mlonmlon.

¹¹ I so'n nun ye é Min Jésus-Christ b'o ti é Défue'n, oh soh amun nun kpa, ye oh fah amun wle i swran ng'o sié bé titi'n bé nuon.

¹² An si sa so mun, ye an lafi nde nanwle nga an tili'n su kpa, sannge n su yatyi'a amun wla kpenle sa so'm bé su.

¹³ Ke n nian wuman'n, se n kpen amun wla nan an fa sa so'n sié amun klun'n, n wun i ke o ti kpa.

¹⁴ Afin n si ke o tye kaan nh wuh, ke é Min Jésus-Christ kan kléé n soo.

¹⁵ Sannge n yô liké kwlaa nga n kwle i yô'n nan se n wu'n, amun wla a tran sa so'm bé su tititi.

Bé nga bé wuun Christ nyrun b'o le'n

¹⁶ Nanwle, ke éh kanh é Min Jésus-Christ i bale, nin i kwlale b'o kwla'n i nde klé amun'n, o ti'a ke ngôwa bo bé fa bé ti nun ngwlele fa di'n sa, ye é di kléé amuon. Sannge é bobo é wunnin i nyrun ng'o le'n nin é nyinma.

¹⁷ I lé kunngba nga é Si Nyanmien menmenh b'oh yih i aye'n, é bobo é ô i bô. O tili i nen b'o fin lika'n b'o kpadya nyannyan'n nun, o sé ke: «Min awlen su ba'n ye, i su ye n wla'n kwlaa ôo.»

¹⁸ Ke é nin i é ô Nyanmien i ôka'n su lo'n ye é tii nen so nion.

¹⁹ O man é wuun Nyanmien nuan idyofue'm bé nde nga bé kannin'n i wle kpa. Se an fa amun nyin sié su kpa'n, o ti kpa, afin o ti ke kannin b'o kpadya lika tuun wié nun sa, lélé fa dyu alie ndyennien komin su, ye awue nzraama'n fitéh, oh yih sa'm bé nyin wéiin klé amun.

²⁰ Man an si kpa ke swran kun i bobo tiaun o kwla klé'a Nyanmien Nde nga i nuan idyofue'm bé kleli'n i nun kun sa bô.

²¹ Afin Nyanmien nde nga swran'm bé kannin'n ba kpe'a wié fi bé ti nun ye bé kannion, i Wawe'n ye o fa wla bé nuan ye bé kannion.