1 Timote 5 - Nyanmien nde Ufle

Liké nga bé yô man angbôti bla, nin kpenngben, nin kanga mun'n

¹ Nanh idyo kpenngben mun, sannge tu bé fo amannien su, fa bé bu o si, bu gbanflen mun o niaan,

² bu bla kpenngben mun o nin, bu talua mun o niaan sa'n kwlaa nun.

³ Bu bla nga bé wun wuli bo bé le'a swran'n bé swran, nian bé lika.

⁴ Sannge ng'o le ba annze anunman'n, man ba so'm bé si ke bé Nyanmien sule'n nun sa nga bé dun mmua yô'n yele bé awlô'n i lika nianle. Ke béh yôh so'n, wuun liké nga bé si nin bé nin nin bé nannan'm bé yô maan bé'n, i wunsu ye bé su yô man béo. I so'n yô Nyanmien fe.

⁵ Bla nga i wun wuli b'o le'a swran nien i lika mlonmlon'n, o fe i wla'n gua Nyanmien su, wia nun ô, kongue ô, o nin i kôkô yale, o sre i ke o nien i su.

⁶ Sannge angbôti nga men dile'n yô i fe'n, kannze i nyin ô su'n, o ti ke wa wu sa.

⁷ Ken i so klé bé, nan ba kwla ka'an bé wun nde.

⁸ Swran ng'o nie'en ifue'm bé lika'n o ti te, nga b'o i te'n tra su'n yele swran ng'o nie'en i bobo i awlô'n i lika'n, o ti'a Nyanmien sufue, i te lie'n tra swran ng'o lafi'a Christ su'n.

⁹ Bla nga i wun wuli bo bé waan béh kleh i dunman angbôti mmla'm bé fluwa'n nun'n, man o yô bo wa di afue ablésien, bo wa dya bian kpe kunngba.

¹⁰ Man bé wun ke o yô swran'm bé yé, o nien i mma'm bé su kpa, o ti aklunyéfue, o wunnzin Nyanmien swran'm bé dya, o uka yalefue mun, o yô sa kpakpa'n kwlaa.

¹¹ Sannge nanh kle angbôti bla nga bé te yô talua'n bé dunman angbôti mmla'm bé fluwa'n nun, afin se tyen wié bé kônvi wa so bian dyale'n, kpekuun béh yatyih Christ,

¹² ye liké nga bé sé bé ke béh yôh bo ba yôman'n ti, béh katyih sa te yôfue.

¹³ Ke o kô yô so'n, bé yô'a liké fi, bé wlanwlan awlô'm bé nun, ye ng'o ti te tra su'n, bé idyo fiaii, nde ng'o ti'a bé nde'n nin nde ng'o fataman'n ye bé kaan.

¹⁴ I so'n ti, man bé nga bé te yô talua'n bé dya bian, bé wu ba, bé nian bé awlô'n su, nan é kpofue'm bé kwla satyi a é wun.

¹⁵ Afin bé wié'm ba yatyi atin kpafue'n ba kô su Satan (*f6*) su.

¹⁶ Se Christfue bla wié le angbôti bla i awlô'n nun'n, men i bobo nian bé lika, nan asonun'n wa kwla nian bé nga bé le'a swran'n bé lika, nanh man o yatyi bé asonun'n sa nun.

¹⁷ Asonun kpenngben ng'o sié asonun'n kpa'n, se bé bui swran bé yô i mô dan'n, i yôwle suo. Sannge bé nga bé yô bé lie'n tra su'n, yele kpenngben ng'o di dyunman kpa o kan Nyanmien nde, o klé liké'n.

¹⁸ Afin bé klee Nyanmien Nde'n nun ke: «Nannin ng'o bô awié'n, nanh bé tyityi i nuan,» ye: «Dyunman difue'n i sa ka'a ngben.»

¹⁹ Se bé kan asonun kpenngben wié wun nde klé wo'n, se w'a tié'e swran nnyon annze nsan bé nuan nun'n, nanh fa su.

²⁰ Sannge bé nga bé yô sa te'n, tu bé fo swran'n kwlaa bé nyrun, man sre kun bé nga'm bé kusu wié.

²¹ Fa nde nga man kan klé o ye'n su kpa, se a nian ti'a swran i nuan nun nde'n, nanh bu i fo, nanh bu swran'n wié kpa tra wié, Nyanmien Kpli'n, nin Christ-Jésus, nin Nyanmien i ange'm b'o kpaa bé'n bé ti n lalôfue ke n kan nde so'n kléé wo.

²² Nanh kpli sié o sa swran su ndende ke o di Nyanmien dyunman. Nanh fo o wun wle sa te nga bé wié'm bé yô'n nun. Nion o wun, nanh yô sa te fi.

²³ O ku'n nin tukpatye bo a toe fukefuke'n ti, nanh non nzué ngunmin kun, non du vin kan.

²⁴ Swran wié'm bé sa lie'n nga bé yô'n bé dun mmua si ke o ti te i sin nan ba kô kan, sannge wié'm bé lie'n bé kan ye bé si ke o ti teo.

²⁵ Ya sa kpa nga kusu bo swran wié'm bé yô'n bé wuin, nga kusu bo ba ka'a le ba wunmen'n, o su ka'a bui bô, san béh wuinh.