1 Timote 1 - Nyanmien nde Ufle

Paul kle fluwa nga kô maan Timothée

¹ M Paul bo é Défue Nyanmien nin Christ-Jésus bo é fa é wla gue i su'n bé waan béh sunmanh min bo Christ-Jésus so'n sunmaan min'n,

² nh kleh fluwa nga ble o Timothée. A ti n wa sakpa, afin min ye man a lafii Christ suo. Man é Si Nyanmien nin é Min Christ-Jésus bé man a nyan yé, man bé si wo aunnvue, ye man o wun dyo o fouun.

Liké nga bé klé b'o ti'a su'n

³ Ke nh koh Macédoine'n, n séli o ke a ka Éphèse lo nan a tu swran wié'm bé fo ke, nanh man bé klé liké ufle,

⁴ nanh man bé fa bé wla gua ngôwa nin bé nannannannan'm bé ôsu finwle b'o wié'a mlonmlon'n b'o kpe sae'n bé su. Sa so'm bé uka'a swran ke o lafi Nyanmien su o yô sa ng'o ti i klun sa'n.

⁵ É waan, bé klô swran kpa ti ye é tu bé fo so nion. Klôle so'n fin swran bo sa te kaan sa nu'en i awlen'n nun, b'o man i klun titimen, b'o lafi Nyanmien su sakpa'n.

⁶ Swran wié'm ba yatyi ninngé so'm bé yôle, ba fa bé wun a wle nde ngbenngben'm bé kanle nun.

⁷ Bé klô ke béh yôh mmla'n i kléfue, sannge bé wu'an nde nga bé bobo bé kan'n nin liké nga bé dyran su ke o ti nanwle sakpa'n bé wle.

⁸ É si ke, se swran yô mmla'n i nuan su sa'n, o ti kpa.

⁹ Afin é si ke, nanh bé nga bé ti swran kpa'n bé ti ye bé siéé mmla nion. Sannge bé sié maan bé nga bé ti'a kpa'n, nin nyin kékléfue, nin bé bo bé srô'a Nyanmien'n, nin sa te yôfue, nin bé bo bé nyin yi'a Nyanmien bo bé bu i ninngé'm bé finfin'n, nin bé bo bé kun bé si nin bé nin'n, nin swran kunfue,

¹⁰ nin bla nin bian kunndefue, nin yasua nga bé kunnde bé wiéngu yasua'n, nin bé nga bé tra swran suen'n, nin bé nga bé yô sa kwlaa nga b'o nin sa nga bé klé bé ke bé yô'n o ti'a kun'n.

¹¹ Ke bé klee Nyanmien Kpli bo bé bô i dunman fe titi'n i dyasin fe'n b'o fa wla n sa nun'n nun soo.

Paul laa Christ asé

^12-13 N la é Min Christ-Jésus b'o wlaa n fanngan'n i asé, afin m bo laa n satyi i dunman, n klé i yale, n kpe i nzôwa'n, o buu n swran, o fa min wle i dyunman'n nun. Nyanmien si min aunnvue, afin sa wle bo n wunmen'n nin i su bo n lafiman'n ti ye n yôô soo.

¹⁴ Yé nga é Min'n yôô min'n i nyin fitéé dan, o man ke é nin Christ-Jésus é katyii swran wunmuan'n, é lafi i su, ye é klô i nin swran.

¹⁵ Nde nga ti nanwle wéiin, se bé fa su'n o ti kpa, yele ke Christ-Jésus baa men'n nun sa te yôfue mun bo n ti bé nun klikli'n bé déle.

¹⁶ Nyanmien si min bo n sa te lie'n tra swran'n kwlaa bé lie'n, min aunnvue nan Christ-Jésus fe i awlen b'o tre swran wun'n klé bé nga bé wa lafi i su bo béh nyanh anannganman nguan'n, man bé wun ke o tre i awlen bé wun wié.

¹⁷ Famien b'o ti anannganman, b'o wunman, bo bé wunmen, b'o ti Nyanmien bo liké fi nu'en i sin'n, man bé menmen bé yi i aye tititi! Mon o yô so!

¹⁸ N wa Timothée, afotue nga n fa mon o ye'n, o nin o wun nde nga bé bô su kléé n laa'n o ti kun. Fa nde so'n, mion o nyin yô sa ng'o ti kpa'n,

¹⁹ Nyanmien su bo a lafi'n nin o klun b'o titimon'n ti. Swran wié'm bé yô'a sa kpa nga bé klun lo akunndan'n sé bé ke bé yô'n, o man bé lafi'a Nyanmien su kpa kun.

²⁰ Hyménée nin Alexandre bé ô swran so'm bé nun. N fa bé wlaa Satan (*f6*) sa nun nan bé bu akunndan, nan nanh man bé satyi Nyanmien dunman kun.