1 Tɛsalonikfuɛ Mun 1 - Nyanmien nde Ufle

Paul klee fluwa nga kô maan Thessalonique lo Christfue mun

¹ M Paul, min nin Silvain, nin Timothée éh kleh fluwa nga ble amun asonunfue bo an wô Thessalonique lo'n bo amun nin é Si Nyanmien nin é Min Jésus-Christ amuan yô swran wunmuan'n. Éh yrah é nuan ke an nyan yé, ye man amun wun dyo amun fouun!

Thessaloniquefue'm bé nzuen'n nin bé Nyanmien sulafile

² Amun ti é la Nyanmien asé titi, ye é sre i titi ke o nian amun su.

³ É akunndan ô liké nga Christ su bo an lafi'n ti an yô'n, nin dyunman nga an di klôle bo an fa klô Nyanmien nin swran'n, nin amun wla bo an fa gua é Min Jésus-Christ su kpa'n bé su, ye é kan klé é Si Nyanmien.

⁴ Aniaan mun, é si ke Nyanmien klô amun, ye o faa amun ke an yô i lie.

⁵ Afin ke é kan dyasin fe'n i nde kléé amun'n, é kenmen é nuan nun ngben, Nyanmien Wawe'n ye o tin yéo, o man é wun i wle kpa ke nde nga é kan'n ti nanwle. Ke é ô amun wun lo'n, an si é wun wafa nga é yôli'n, amun ti ye é yô é wun soo.

⁶ Ke an faa Nyanmien nde'n su'n, bo an wunnin nyrennen dan kpa'n, an niannin é nzuen'n nin Christ lie'n su an yôli. Sannge o nin i so'n ngba, Nyanmien Wawe'n man amun klun dyo.

⁷ Ke an yô so'n, o man bé kwlaa nga bé lafi Christ su Macédoine nin Achaïe lo'n bé nian amun lie'n su bé yô.

⁸ Ke Nyanmien nde'n fin amun wun lo b'o dyuu Macédoine nin Achaïe lo'n, wa ka'a le ngunmin, sannge o nin amun Nyanmien sulafile nde'n wa tru lika'n kwlaa, o man é bô'a ye é ke'en kun.

⁹ Ke é oo amun wun lo'n, nun sole nga an fa soo yé'n, swran'n kwlaa bé ken i nde. Bé sé ke an yatyii amuen mun, an fa amun wun maan Anannganman Nyanmien Kpli b'o ti nanwlefue'n,

¹⁰ ke amunh minndeh i Wa b'o tyenniin'n, b'oh finh nyanmien su lo ba'n, yele Jésus b'o dé é Nyanmien i ya b'o wa dyaô'n nun'n.