1 Piɛr 5 - Nyanmien nde Ufle

Nyanmien bua'm bé lika nianle

¹ I so'n ti, m ma sre amun bo an ti asonun kpenngben'n amun liké kun. M bobo n ti asonun kpenngben ke amun sa, n kan Christ i nyrennen b'o wunniin'n i nde, ye anyrunnyan liké nga Nyanmien wa yi nglô'n, n dunman'n teh nun wié. Nh sreh amun,

² anh nian Nyanmien i bua fa b'o fa bé maan amun'n bé lika. Nanh an yôé mianle su, anh yôé ke Nyanmien klô ke an yô'n sa. Nanh an yôé ke amun wa nyan liké ti, sannge anh tu amun klun yô.

³ Nanh an tin bé nga bé fa bé maan amun ke an nian bé su'n bé su, sannge anh yô sa ng'o ti kpa'n, man bé nian su.

⁴ Ye tyen nga Bua Tafue Dan'n ba'n, oh yôh amun mô, dunman nga amunh nyenh'n, o wié'a mlonmlon.

⁵ Gbanflen mun, amun kusu anh bu kpenngben'm bé swran. Amun kwlaa anh yô amun wun ke kanga sa, anh wuka amun wun, afin bé klee Nyanmien Nde'n nun ke: «Nyanmien nin bé nga bé tu bé wun mun lee, Sannge o yô aénvuefue'm bé yé.»

⁶ I so'n ti, anh yô amun wun aénvue Nyanmien Kpli'n i nyrun nan se tyen ng'o siéli'n dyu'n, wa man amun su.

⁷ Anh kôkô sa kwlaa ng'o ô amun su'n kléé, afin i ye o nian amun likaa.

⁸ Anh sasa amun wun, anh niannian! Afin mmusu'm bé si Satan b'o ti amun kpofue'n, o ti ke dyra b'o wlanwlan, o kpan kunnde nnen'n sa.

⁹ Nanh an lô amun wun men, anh dyran kéklé Nyanmien su bo an lafi'n ti. Afin an si ke amun niaan kwlaa nga bé ô men'n nun'n, bé wun nyrennen kunngba so'n wié.

¹⁰ Ke an wun nyrennen lé nnyon kun'n, Nyanmien Aklunyéfue Kpli'n b'o flee amun ke an nyan nyrun titi, swran wunmuan bo amun nin Christ a katyi'n ti'n, i bobo man amunh yôh swran kpa mlonmlon. Oh yôh man amunh dyranh kéklé, oh wlah amun fanngan, o man amun wun su usu'a amun.

¹¹ I ye o kwla tititio. Mon o yô so!

Bé liké yôle

¹² É niaan Sylvain bo n wuun ke é kwla fa é wla gue i su'n, i ye o uka min é kle nde kaan nga n kle ble amun ye nion. N waan nh wlah amun fanngan, ye nh kanh klé amun ke yé nga Nyanmien yô yé'n, i ye o ti yé kpafue nion. I ti, anh dyran kéklé.

¹³ Asonunfue nga bé ô Babylone bo Nyanmien flee bé ke amun sa'n, bé nin n wa Marc béh yôh amun liké.

¹⁴ Se an wun amun wun'n, anh yô amun wiéngu liké, klôle bo an klô amun wun'n ti. Nyanmien man amun kwlaa bo an ti Christ lie'n, amun wun dyo amun fouun!