1 Piɛr 4 - Nyanmien nde Ufle

Bé nga bé nzuen'n wa katyi'n

¹ Ke Christ wuun nyrennen'n ti, amun kusu anh bu akunndan kunngba ng'o buli'n, anh tra amun awlen.

² Afin swran ng'o wun nyrennen'n, wuun o nin sa te'n ba bu. O man tyen nga an te di i asie'n su wa'n, anh fa yô Nyanmien klun sa, nanh an yô klo swran klun sa kun.

³ Afin an yôô amun klun sa tyeli ke bé nga bé ti'a Christfue'n bé yô'n sa. An bô wlaka, amun nyin blô ninngé'm bé su, an non nzan bô, an yô sa finfin mun, an yia non nzan lélélé, an so amuen.

⁴ Ke bé nga bé ti'a Christfue'n bé wun ke amun nin bé sa'an nun yô'a sa tete so'm bé kun'n, o bô bé nuan, bé kpe amun nzôwa.

⁵ Sannge bé wa kan sa nga bé yôli'n klé Nyanmien b'o wa di bé nga bé nyin ô su'n, nin bé nga bé wuli'n bé dyole'n.

⁶ I so'n ti ye bé kan dyasin fe'n kléé bé nga bé wuli'n bé kusu nion. Bé ken i so klé bé nan bé nga bé buu bé fo ke bé fa bu swran'n kwlaa bé fo'n sa'n, bé wawe'n ka le ke Nyanmien ô le'n sa.

⁷ Liké'n kwlaa bé awiélie'n wa mantan. I so'n ti, anh bu akunndan, anh nian amun wun su nan amuan kwla kôkô yale a klé Nyanmien.

⁸ Sa ng'o ti dan tre i ngba'n yele ke an klô amun wun, afin swran ng'o klô swran'n, o wu'an sa tete kpanngban nga bé yô'n.

⁹ Swran ng'o tô amun'n, anh sikéé, nanh an idyo amun kônviabô.

¹⁰ Ke bo an nian ninngé wafawafa nga Nyanmien fa man swran ke bé yô'n bé su'n, man swran kun fe i lie nga Nyanmien menniin'n uke i wiéngu.

¹¹ Swran ng'o kan Nyanmien nde'n mon o kan nde nga Nyanmien klélii'n, ye nga kusu b'o di i dyunman'n, mon o fa wunmien ng'o menniin'n, di dyunman so'n, nan sa'n kwlaa nun Jésus-Christ b'o ti kpli bo bé yi i aye tititi'n ti, bé yi Nyanmien aye. Mon o yô so!

Christfue'n i nyrennen wunle

¹² N swran kpa mun, nanh man sa ng'o to amun su amun sa nianle'n ti'n, o bô amun nuan. Nanh an bu i ke o ti sa te.

¹³ Sannge ke an wun nyrennen kunngba nga Christ wunniin'n wié'n, man amun klun dyo, nan tyen nga béh yih i swran wafa ng'o ti'n i nglô'n, amun klun a dyo kpa.

¹⁴ Se bé kpe amun nzôwa Christ dunman b'o ô amun su'n ti'n, amun lie su ti yé, afin Nyanmien Wawe'n b'o le nyrun'n, wa ba amun wun!

¹⁵ Nyrennen nga an wuin'n, nanh mon o yô ke amuan kun swran, amuan wua, amuan yô sa te wié, amuan fa amun nuan a wlewle swran wié'm bé nde nun.

¹⁶ Sannge se an wun nyrennen Christfue bo an ti'n ti'n, nanh man nyannzuen kun amun, sannge anh la Nyanmien asé dunman so'n b'o ô amun su'n ti.

¹⁷ Tyen nga béh bôh dyole dile'n bô'n wa dyu, béh bôh i bô Nyanmien bobo i awlô'n nun. ?Se é su ye béh bôh i bô'n, bé nga ba fa'a Nyanmien dyasin fe'n su'n, bé lie'n yôh se?

¹⁸ ?Se bé nga bé ti kpa'n bé ti nyanle'n ti kéklé'n, bé nga bé srô'a Nyanmien bo bé yô sa tete'n, bé lie'n yôh se?

¹⁹ I so'n ti, bé nga bé nyrennen wunle'n ti Nyanmien klun su'n, man bé fa bé wun man Nyanmien b'o yii bé, bo bé kwla fa bé wla gue i su'n. Man bé yô sa ng'o ti kpa'n tititi.