1 Piɛr 2 - Nyanmien nde Ufle

Christ ti ke yebue sa. Nyanmien i swran mun

¹ I so'n ti, anh wla klunwi, nin gble'n kwlaa, nin dunman kunndele, nin amun nyin bo an fa tyi swran'n, nin swran wun nde kanle'n kwlaa bé asé.

² Ke ba nonman kunnde nyonflen'n, amun kusu anh kunnde Nyanmien nde b'o ti ke nonnon bo ba gua'a nun liké'n sa. Se amun non'n, amunh yôh swran ye amunh nyanh amun ti.

³ Afin an wuun ke é Min'n ti kpa.

⁴ Anh fa amun wun menten, afin o ô le tititi. I ye o ti yebue bo swran'm bé yii i blô, sannge Nyanmien wuun ke o ti kpa, b'o fali nion.

⁵ Amun kusu, an ti ke yebue b'o ô le tititi'n sa, man bé fa amun wla Nyanmien sua bo i Wawe'n kplan'n nun wié, ye amunh katyih Nyanmien nyrun dyranfue, bo i Wawe'n man amunh soeh wafa ufle su. Jésus-Christ ti, i sole so'n oh dyoh i klun.

⁶ Afin bé klee Nyanmien Nde'n nun ke: «Anh nian, n faa yebue kpa kun bo nh siéh Sion (*f14*) lo ke yebue kpa b'o tra sua'n i tyondyo'n i asé'n sa, Swran ng'o lafi i su'n, i nyin su gua'a asé.»

⁷ Amun bo an lafi yebue so'n su'n, o ti amun liké kpa. Sannge o sé bé nga bé lafi'e i su'n bé ke: «Yebue bo sua kplanfue'm bé yii blô'n, I ye wa katyi yebue kpa b'o tra sua'n i tyondyo'n i asé nion.

⁸ O ti yebue b'o kpla swran'm bé dya, Yebue dan kun bo swran'm bé fin asé su.» Bé dya'n kplelii, yele ke ba fa'a Nyanmien nde'n su, afin ke Nyanmien'n siéli bé lie'n soo.

⁹ Sannge amun lie'n, an ti swran bo Nyanmien faa amun, an ti Famien Nyanmien'n i nyrun dyranfue, an ti Nyanmien nvlé'n nun swran, an ti i lie mlonmlon. O faa amun ke an yi i b'o flee amun ke an dyaô aôsin nun, an bla lika ng'o kpadya kpa'n nun'n i aye.

¹⁰ Laa an ti'a Nyanmien swran, sannge sien'n, amuan katyi i swran. Laa Nyanmien a si'a amun aunnvue, sannge sien'n, wa si amun aunnvue.

Sa nga Nyanmien swran'm bé yô'n

¹¹ N swran kpa mun, an ti aôfue nin wlanwlanfue asie'n su, o man nh sreh amun ke an wla amun kônvi b'o man amun nyin blô ninngé'm bé su'n i asé, afin kônvi so'n kwla kun é.

¹² Anh yô sa ng'o ti kpa'n bé nga bé ti'a Christfue'n bé nyrun, nan se bé satyi amun dunman ke an ti sa te yôfue'n, bé wun sa kpa nga an yô bé'n, nan tyen nga Nyanmien ba'n, béh menmenh.

¹³ É Min'n ti, man amun nyin yi kpenngben kwlaa nga bé siéé bé'n, famien ng'o ti dan ô,

¹⁴ se i swran ng'o sié bé, o sunman bé ke bé tu bé nga bé yô sa te'n bé fo'n, nan bé yô bé nga bé yô sa kpa'n bé mô ô.

¹⁵ Sa nga Nyanmien klô'n yele ke an yô sa ng'o ti kpa'n. I so'n nun sinnglinfue'm bo bé wu'an sa wle'n, bé su kwla ka'an nde fi.

¹⁶ Amuan nyan amun ti, i so'n ti, anh yô sa ng'o ti kpa'n. Nanh amun ti nyanle so'n katyi sa te, sannge man bé wun ke an ti Nyanmien i swran.

¹⁷ Anh bu swran'n kwlaa bé swran, anh klô amun niaan Christfue mun, man amun nyin yi Nyanmien, anh bu famien'n i swran.

Man nyrennen'n son amun nun ke Christ lie'n sa

¹⁸ Kanga mun, man amun nyin yi amun min mun kpa, anh bu bé swran. Nanh bé nga bé ti kpa bo bé ti wetee'n bé ngunmin ye an yô bé soo, sannge man amun nyin yi bé nga bé ti wle'n.

¹⁹ Afin se bé klé amun nyrennen b'o ti'e i su, b'o son amun nun Nyanmien srôle bo an srôé'n ti'n, o ti kpa.

²⁰ ?Sannge se an yô sa, bo an tra amun awlen an dyran lé bé bô amun'n, nzu mô ye béh yôh amuon? Sannge se an yô kpa bo bé klé amun nyrennen, b'o son amun nun'n, i so'n ye o yô Nyanmien feo.

²¹ I so yôle ti ye Nyanmien flee amuon, afin amun ti, Christ bobo wuun nyrennen. O yôli so ke an nian su nan an nanti i adyale lie'n su.

²² Wa yô'a sa te lé, ba ti'a gble nde fi i nuan nun lé.

²³ Bé kpe i nzôwa, wa yi'a ma'an bé, bé klé i nyrennen, wa fua'a bé ti, sannge o fe i nde lie'n wlaa Nyanmien b'o di nde nanwle'n i sa nun.

²⁴ Christ bobo dyraan é sa te'n i nuan bé bôbôé waka'n su, nan é nin sa te'n é bu, ye é yô sa ng'o ti kpa'n. I wunnen sule'n ti ye man ya yô dyuédyuéo.

²⁵ Laa an ti ke bua'm bo ba bô nzanndri'n sa, sannge sien'n, amuan sa amun sin amun Tafue b'o ti amun Sunianfue'n i sin.