1 Piɛr 1 - Nyanmien nde Ufle

Swran ng'o klé fluwa'n kô maan bé'n

¹ M Pierre bo Jésus-Christ sunmaan min'n, nh kleh fluwa nga ble amun bo Nyanmien faa amun bo an sanndili man an ti aôfue Pont, nin Galatie, nin Cappadoce, nin Asie, nin Bithynie men'n nun'n.

² É Si Nyanmien faa amun, afin o dun mmua bu i akunndan so, nan i Wawe'n ti, an katyi i lie, amun nyin yi Jésus-Christ, ye i mmôdya'n ti amun wun sa'n wiéh. Nyanmien man an nyan yé titi, ye man amun wun dyo amun fouun!

É wla ô su ke éh nyanh é ti

³ É Min Jésus-Christ i Si Nyanmien Kpli, i kwla ô! I aunnvue sile dan'n ti, o wuu é ékun, o man é wla ô liké bo é si wéiin kpa ke o ô lo'n su, Jésus-Christ i tyenle'n ti.

⁴ O wuli é so nan é nyan liké kpa ng'o siéé nyanmien su lo'n. Liké so'n kwla satyiman, o yô'a fien, o mlinman.

⁵ Nyanmien Kpli siéé i lo sié amun i su bo an lafi'n ti, oh nianh amun su lélé amunh nyanh amun ti, afin wa dun mmua sié i ke men'n i awiélie oh yih amun ti nyanle so'n i nglô.

⁶ I so'n ti, kannze ke é sé ye'n, sa fanunfanun b'o to amun su'n ti amun wla bô lé nnyon kun'n, man amun klun dyo. Sa so'n b'o to amun su'n, o ti su,

⁷ i so'n nun ye béh wunh ke an lafi Nyanmien su kpaa. Sika okwle bo tyen wié oh satyih'n, bé klôé nian. Amun kusu ke an lafi Nyanmien su'n, an ti kpa tra sika okwle, sannge san béh sah amun nian. Ye ke bé wun ke an lafi i su kpa'n, tyen nga Jésus-Christ wa yi i wun nglô'n, béh manmanh amun, béh yih amun aye, béh yôh amun mô.

⁸ Amuan wunmen lé, sannge an klôé. Kannze an nian wunmen'n, an lafi i su, o man amun klun dyo dan kpa, o man an wu'an nde nga an kaan.

⁹ Afin ke an lafi Nyanmien su'n, i agualie amunh nyanh amun ti.

¹⁰ Nyanmien nuan idyofue bo bé kaan yé dan nga Nyanmien wa yô amun'n i nde'n, bé bobo bé buu ti nyanle wafa so'n i akunndan kpa, bé kunnde ke béh wunh i wle wéiin kpa.

¹¹ Christ Wawe'n su Nyanmien nuan idyofue so'm bé su. O kan Christ nyrennen wafa ng'o wa wuin'n o nin i manmanle nga ke o kô wun nyrennen'n béh fah menmen'n i nde kléé bé. Bé miaan bé nyin ke béh sih sa so'n i ble'n o nin i wafa ng'oh yôh su'n.

¹² Nyanmien kan kléé bé ke i nde ng'o fa wla bé nuan ke bé kan'n o ti'a bé bobo bé lie, sannge amun lieo. Bé nga bé kan dyasin fe'n Nyanmien Wawe'n b'o sunmenniin'n i fanngan nun'n, nde so'n ye bé kan kléé amun ye'n. Ange'm bé bobo bé klô ke béh wunh sa so'm bé wle.

O sé bé ke man bé nzuen'n fa Nyanmien lie'n

¹³ I so'n ti, anh bu akunndan, anh nian amun wun su, man amun nyin tran liké nga tyen nga Jésus-Christ wa yi i wun nglô'n oh fah man amun'n su kpa.

¹⁴ Man amun nyin yi Nyanmien, nanh an yô liké nga i nun'n bo an nian wu'an sa wle'n amun nyin blô bé su bo an yôô bé'n, bé kun.

¹⁵ Nyanmien b'o fleli amun'n i nzuen'n nin klo swran lie'n ti'a kun, man amun nzuen lie'n kusu fe i lie'n sa'n kwlaa nun.

¹⁶ Afin bé klee ke, «i nzuen'n nin klo swran lie'n ti'a kun, i so'n ti man amun nzuen lie'n fe i lie'n.»

¹⁷ An fle Nyanmien b'o nia'an swran nyrun ye o di dyole'n, sannge nde sin ye o dyran di dyole'n, amun Si. I so'n ti, ke an te ô asie'n su wa'n, anh yô sa ng'o klé ke amun nyin yii'n.

¹⁸ Afin an si liké nga bé fa tôô mun, b'o man an nyan amun ti sa ngbenngben nga amun nannan'm bé fa kléé amun'n bé nun'n. Nanh liké b'o satyio, nanh dyete ufuéo, nanh sika okwleo.

¹⁹ Sannge Christ b'o ti ke bua gbanflen bo le fi nu'en i wun'n i mmôdya'n b'o ti kpa'n ye bé fa tôô amun tio.

²⁰ Nyanmien dun mmua fe siéli i sin nan wa yi men'n, ye amun ti, ke ya dyu men'n i bué nuan'n, wa yii nglô.

²¹ I ti ye amuan lafi Nyanmien b'o tyenniin'n, b'o man o nyaan nyrun'n i suo, o man Nyanmien su ye amuan lafio, i su ye amuan fa amun wla'n ba guaa.

²² Ke an faa nde nanwle'n su, bo amun wun sa'n wiéli'n, o man an klô'a amun niaan Christfue mun amun nuan bui su. I so'n ti, anh klô amun wun kpa, anh tu amun klun yô sa ng'o klé ke an klô amun wun'n.

²³ Nyanmien nde b'o katyimen, b'o ô le titi'n ti, o wuu amun ufle, o man amun si'n ti'a swran b'o wu, o ô le tititi.

²⁴ Afin bé klee Nyanmien Nde'n nun ke: «Swran'n kwlaa bé ti ke idyré sa, Ye bé nyrun nga bé le'n ti ke idyré'n i nyre'n sa. Idyré'n wu, ye i nyre'n gua,

²⁵ Sannge é Min Nyanmien Kpli'n i nde'n wô le tititi.» Nde so'n ye ke béh kanh dyasin fe'n, bé kan kléé amun nion.