1 Jean 5 - Nyanmien nde Ufle

Men'n nun ninngé nga bé ti ke é kpofue sa bo é kwla bé'n

¹ Swran kwlaa ng'o lafi su ke Jésus ti Christ'n (*f1*), wuun o ti Nyanmien wa. Swran nga bé klôé'n, bé klôé nin i wa'n.

² Se é klô Nyanmien bo é fe i nde'n su'n, ye é si ke é klô i mma muon.

³ Nyanmien i klôle'n yele ke é fe i nde'n su, i nde so'n i su fale'n yô'a ya.

⁴ Men'n nun ninngé kwlaa nga bé ti ke é kpofue'n sa'n, bé kwlaa nga bé ti Nyanmien wa'n, bé kwla bé. Nyanmien su bo é lafi'n ti ye man é kwla men'n nun ninngé kwlaa nga bé ti ke é kpofue sa muon.

⁵ ?Wan ye o kwla men'n nun ninngé kwlaa bo bé ti ke é kpofue sa nion? ?Nanh swran ng'o lafi su ke Jésus ti Nyanmien Wa nion?

Jésus-Christ i nde bo bé kan'n

⁶ Swran ng'o bali'n yele Jésus-Christ. Ke o bali'n, nzué nin mmôdya (*f44*) ye man bé sii io. Nanh nzué ngunmin ye man bé sii io, sannge bé nnyon nion. Ye Nyanmien Wawe'n sé ke nde so'n ti nanwle, afin i bobo ti nanwlefue.

⁷ Lalôfue'm bé ti nsan,

⁸ Nyanmien Wawe'n, nin nzué'n, nin mmôdya'n. Bé nsan'n bé nde'n ti kun.

⁹ Se é fa nde swran'm bé wun nun bo bé kan'n su'n, Nyanmien lie ng'o kan'n i nanwle'n tra bé lie'n, afin nde nga Nyanmien kan'n yele i Wa'n i nde'n.

¹⁰ Swran ng'o lafi Nyanmien Wa'n su'n, o si nde so'n wéiin, sannge swran ng'o lafi'a Nyanmien su'n, o bu i atôfue, yele ke o lafi'a Nyanmien Wa'n i wun nde b'o kannin'n su.

¹¹ Anh nian nde so'n ye, Nyanmien maan é anannganman nguan, i Wa'n ti ye man é nyaan nguan so nion.

¹² Swran ng'o nin Nyanmien Wa'n ti swran wunmuan'n, o le anannganman nguan, swran ng'o nin i ti'a swran wunmuan'n, o le'a anannganman nguan.

Anannganman nguan

¹³ N kle nde so'n blee amun nan amun bo an lafi Nyanmien Wa'n su'n, an si ke an le anannganman nguan.

¹⁴ Anh nian sa nga ti ye é wla'n wô Nyanmien su dan'n, é si ke liké kwla nga é sree'n, b'o ti i klun su'n, oh manh é.

¹⁵ Se é si ke liké nga é sree'n oh manh yé'n, liké kwla nga é sree'n, se o ti se o ti se ô, é si ke ya nyen.

¹⁶ Se swran wié wun i niaan kun b'o su yô sa te b'o ti'e i wié lie'n, mon o sre Nyanmien ke o man swran so'n i nguan, ye oh menh. Bé nga bé yô sa te b'o ti'a bé wié lie'n, bé nde ye n kaan. Sa te'n wié ô le bé yôo o ti bé wié lie, nenh i so sa lie'n ti ye n sé ke bé sre Nyanmien nion.

¹⁷ Sa kwlaa nga bé yô b'o ko'a atin su'n ti sa te. Sa te'n wié ô le o ti'a be wié lie.

¹⁸ É si ke swran kwlaa ng'o ti Nyanmien wa'n, o ka'a sa te yôle'n su, afin Nyanmien Wa'n sese, o man Klunwifue'n kwla yô'e i sa fi.

¹⁹ É si ke é ti Nyanmien lie, ye Klunwifue'n sié men wunmuan'n.

²⁰ É si kusu ke Nyanmien Wa'n bali, ye o kléé é ngwlele, nan é si Nanwlefue'n. É nin Nanwlefue so'n ya yô kun i wa Jésus-Christ ti. I ye o ti Nyanmien nion, i ye bé flee nguan nion.

²¹ M mma mun, anh nian amun wun amuen'm bé lika.