1 Jean 3 - Nyanmien nde Ufle

Nyanmien mma mun

¹ Anh nian klôle nga é Si Nyanmien fa klô yéo! Klôle dan so'n ti ye bé fle é i wa nion. Ye é ti i wa sakpa. Anh nian sa nga ti ye men'n nunfue'm bé si'a yé'n, yele ke bé si'a Nyanmien.

² N swran kpa mun, sien'n é ti Nyanmien wa, sannge wafa nga éh katyih dyu'n, é nian wu'en ka, sannge é si ke, ke Christ wa yi i wun nglô'n, éh katyih ke i sa, afin éh wunh ke o fa ti'n.

³ Swran kwlaa nga i wla ô su so'n, o klô'a ke sa kaan sa tren i wun, afin sa fi nu'an Christ wun.

⁴ Swran kwlaa ng'o yô sa te'n, wuun wa ton Nyanmien mmla'n, afin sa te'n ye o ti mmla'n i tonle nion.

⁵ Afin an si ke Christ baa sa te'n i nuan nnya bule, ye sa te kaan sa bo'en i wun.

⁶ Swran kwlaa ng'o nin i bé ti swran wunmuan'n, o yô'a sa te, sannge swran kwlaa ng'o yô sa te'n, i min so'n wa wunmen, wa simen.

⁷ M mma mun, nanh an fa amun wun man swran fi mon o laka amun. Swran ng'o yô sa b'o ko atin su'n, o ti swran kpa ke Christ ti swran kpa'n sa.

⁸ Swran ng'o yô sa te'n, o ti mmusu'm bé si Satan'n i lie, afin ke o fin i bôbôle nun'n, mmusu'm bé si Satan'n ti sa te yôfue. Nyanmien Wa'n baa sa nga mmusu'm bé si Satan'n yô'n i nuan nnya bule.

⁹ Swran ng'o ti Nyanmien wa'n, o ka'a sa te yôle'n su, afin Nyanmien nzuen'n wa ke i nun, ye o kwla yô'a sa te, afin o ti Nyanmien wa.

¹⁰ I so'n nun ye bé fa si bé nga bé ti Nyanmien wa, nin bé nga bé ti mmusu'm bé si Satan'n i wa nion, fin swran kwlaa ng'o yô sa ng'o ti'a kpa'n, b'o kpo i niaan'n, o ti'a Nyanmien wa.

Bé wun klôle

¹¹ Anh nian nde nga ke o fin i bôbôle nun'n an tili'n ye, yele ke é klô é wun.

¹² Nanh man é yô ke Caïn b'o ti Klunwifue'n i lie'n ti, o kuun i niaan bian'n i lie'n sa. ?Nzu ti ye o kunnin io? Yele ke sa nga i bobo yô bé'n bé ko'a atin su, sannge i niaan bian lie'n ko atin su.

¹³ Aniaan mun, se men'n nunfue'm bé kpo amun'n, nanh mon o bô amun nuan.

¹⁴ É si ke ya nyan é ti wié'n sa nun, ya nyan nguan, yele ke é klô é niaan mun. Swran ng'o klô'a swran'n, wuun o te ô wié'n sa nun.

¹⁵ Swran kwlaa ng'o i niaan'n, wuun o ti swran kunfue, ye an si ke swran kunfue'n o le'a anannganman nguan.

¹⁶ Anh nian sa nga b'o man é si liké nga bé flee swran klôle'n, yele ke é ti, Christ fe i wun mannin. É kusu é niaan'm bé ti, man é fa é wun man.

¹⁷ ?Se swran kun ti anyanbéunfue, b'o wun i niaan wié bo i sa a mian, b'o ti'e i wun nyanman nun'n, nzu ye o klé ke o klô Nyanmien nion?

¹⁸ M mma mun, nanh man amun swran klôle'n yô amun nuan bui su, nin nuan nun fe su, sannge man bé wuin sakpa liké nga amun yôh'n nun.

É wla b'o gua asé Nyanmien nyrun'n

¹⁹ Se é yô so'n ye éh sih ke é ti nanwlefueo, ye é wla'n kwlah gua asé Nyanmien nyruon.

²⁰ Afin se é klun akunndan'n man é bu é wun fo'n, man é si ke Nyanmien ti dan tra é klun akunndan'n, ye o si sa'n kwlaa.

²¹ N swran kpa mun, se é si é klun lo ke ya yô'a sa te'n, é wla'n kwla gua asé Nyanmien nyrun.

²² Liké kwlaa nga é sree'n, oh fah man é, yele ke é fe i nde'n su, ye é yô sa ng'o dyo i klun'n.

²³ Anh nian nde nga o kan kléé yé'n, i waan, é lafi Wa Jésus-Christ su, ye é klô é wun ke Christ kan kléé é ke é klô é wun'n sa.

²⁴ Swran ng'o fa Nyanmien nde'n su'n, wuun o nin i ba katyi swran wunmuan, o nin i bé tran. Sa ti bo é si so'n, yele i Wawe'n b'o fa maan yé'n.