1 Jean 2 - Nyanmien nde Ufle

Christ ti é ti nde kanfue

¹ M mma mun, ke o kô yô nan amuan yô'a sa te'n ti, nh kleh nde nga ble amun. Sannge se swran wié yô sa te'n, é le é ti nde kanfue, o ô é Si Nyanmien wun lo, yele Jésus-Christ b'o ti swran kpa'n.

² Afin i bobo fe i wun yii é ti te, nan Nyanmien yatyi sa nga é yôlii'n tye é. Nanh é ngunmin é ti te ye o yilio, swran'n kwlaa bé lieo.

³ Se é fa Nyanmien nde'n su'n i so'n nun ye éh sih ke é sii sakpaa.

⁴ Swran ng'o sé ke o sii, sannge o fe'e i nde'n su'n, o ti atôfue, o di'a nanwle mlonmlon.

⁵ Sannge swran ng'o fa Nyanmien nde'n su'n, i sofue'n ye o klôé kpa sakpaa. Sa nga é yô nan ya si wéiin ke é nin Nyanmien ya yô kun'n ye:

⁶ swran ng'o sé ke o nin Nyanmien ba yô kun'n, mon o yô sa nga Jésus yôli'n bé wié.

Mmla ufle

⁷ N swran kpa mun, nanh mmla ufle ye nh kleh ble amuon, sannge mmla laa lie kunngba nga bé fa maan amun i bôbôle nun nion. Mmla laa so'n yele nde nga an tili'n.

⁸ Sannge o nin i so'n ngba, o ti ke mmla ufle ye n su fa man amuon, ye ke bé wun Christ nin amun'n bé wun ke o ti nanwle. Afin alie'n su tyen, alie'n wa tyen wéiin.

⁹ Swran ng'o sé ke o ô wéiin'n nun, sannge o te kpo i niaan'n, wuun o te ô aôsin'n nun.

¹⁰ Sannge swran ng'o klô i niaan'n, wuun o ô wéiin'n nun, o yô'a sa ng'o satyi i niaan wié ti nun'n.

¹¹ Sannge swran ng'o kpo i niaan'n, o ô aôsin'n nun, o man ke oh nantih'n o si'a lika ng'o ko'n, afin o ti ke anyansifue sa.

¹² M mma mun, nh kleh fluwa nga ble amun, yele ke Christ ti, Nyanmien a yatyi sa nga an yôlii'n wa tye amun.

¹³ N si mun, nh kleh fluwa nga ble amun, yele ke an si swran ng'o ô le i bôbôle nun'n. Gbanflen mun, nh kleh fluwa nga ble amun, yele ke an kwlali Klunwifue'n.

¹⁴ Ba kanngan mun, nh kleh fluwa nga ble amun, yele ke an si é Si'n. N si mun, nh kleh fluwa so'n ble amun, yele ke an si swran ng'o ô le i bôbôle nun'n. Gbanflen mun, nh kle fluwa so'n ble amun, yele ke an dyran kéklé, an fa Nyanmien nde'n su, ye an kwlali Klunwifue'n.

¹⁵ Nanh an klô men dile'n, nanh an klô ninngé nga bé ô men'n nun'n. Swran ng'o klô men dile'n, wuun o klô'a é Si'n.

¹⁶ Liké kwlaa nga bé yô bé men'n nun'n, bé nyin b'o blô ninngé'm bé su, nin akunndan nga bé fa bu ninngé nga bé wun bé'n bé su'n, nin bé wun tule'n i kwlaa so'n i wié fi fi'an é Si'n, sannge bé ti men'n nun nzuen.

¹⁷ Men'n nin i nun ninngé kwlaa bo swran nyin blô su'n, béh wiéh, sannge swran ng'o yô Nyanmien klun sa'n, oh kah le tititi.

Christ kpofue'n

¹⁸ Ba kanngan mun, ya dyu men'n i bué nuan. An tii i ke Christ Kpofue'n oh bah. Christ kpofue kpanngban ba ba, o man é si ke ya dyu men'n i bué nuan.

¹⁹ Swran so'n, ke bo bé ti'a éfue sakpa'n, i so'n ti ye bé yatyi é oli nion. Se bé ti éfue'n, wuun bé kaa é wun wa. Sannge bé yii bé wun so, nan swran'm bé si wéiin ke bé nun wié fi ti'a éfue.

²⁰ Amun lie'n, Nyanmien fe i Wawe'n maan amun, o man amun kwlaa an wun sa wle.

²¹ Nanh ke an si'a nde nanwle'n ti ye n kle fluwa so'n ble amuon, sannge i sile bo an sii'n tio, ye an si ke atô'n nin nanwle'n bé sa'an nun.

²² ?Wan ye o ti atôfue nion? ?Nanh swran nga i waan, Jésus ti'a Christ (*f1*) nion? Swran so'n ye o ti Christ kpofue nion, afin o bu'a é Si'n nin i Wa'n bé liké fi.

²³ Swran ng'o so'a Nyanmien Wa'n nun'n, wuun wa so'e i bobo nun. Swran ng'o so i nun'n, wuun wa so i Si'n nun.

²⁴ I so'n ti, nde nga ke o fin i bôbôle nun'n an tili'n, anh fa sié amun klun kpa. Se o tran amun klun kpa'n, wuun amun nin é Si'n nin i Wa'n an ti kun tititi.

²⁵ Anh nian liké nga Christ waan oh fah man yé'n, yele anannganman nguan'n.

²⁶ Bé nga bé klô ke béh lakah amun'n bé wun nde ye n kle blee amuon.

²⁷ Amun lie'n, Christ fe i Wawe'n maan amun. Ke i Wawe so'n nin amun te ô le'n, an bô'a ye kunnde'a swran ke o klé amun liké. Afin o klé amun liké'n kwlaa, liké ng'o klé amun'n ti nanwle, o ti'a atô. I so'n ti, amunh nin i tran titi ke o kan kléé amun'n sa.

²⁸ M mma mun, amunh nin i tran titi, nan tyen nga oh bah, bo oh yih i wun nglô'n, é wla'n wa gua asé, nan ba ka'an é bô, ya wu'an nyannzuen.

²⁹ An si ke Christ ti swran kpa, i so'n ti, swran kwlaa ng'o sa ng'o ti i nuan su'n, o ti Nyanmien wa.