Забур 98 - Сыйлы Инжил бла Забур

¹ Раббий патчахлыкъ этеди: халкъла титиресинле! Ол, керупла юсюнде олтуруп турады: жер да къалтырасын!

² Раббий Сионда уллуду, Ол битеу халкъладан да бийикди.

³ Сени уллу эм къоркъунчлу атынга махтау салсынла: Ол сыйлыды!

⁴ Патчах кючлюдю, тюзлюкню сюеди. Сен адилликни бегитгенсе, тюзлюкню бла тюз хукмуну Якъупда Сен этгенсе.

⁵ Раббий Аллахыбызны кётюрюгюз эмда Аны аякъ тюбюне сежда этигиз: Ол сыйлыды!

⁶ Муса бла Харун Аны дин къуллукъчуларындан, Шамайыл да Аны атын айтып тилек этиучюледен эдиле. Ала Раббийден тилек этгендиле, Ол да аланы тилеклерин къабыл этгенди.

⁷ Ол алагъа булут чигинжини ичинден сёлешгенди. Ол алагъа берген фарызланы бла жорукъланы ала сакълагъандыла.

⁸ Эй Раббий Аллахыбыз! Сен аланы тилеклерин къабыл этгенсе. Сен аланы ишлери ючюн азап берген эсенг да, алагъа кечиучю Аллах эдинг.

⁹ Раббий Аллахыбызны кётюрюгюз эмда Аны сыйлы тауунда сежда этигиз, нек десегиз Раббий Аллахыбыз сыйлыды.