Забур 95 - Сыйлы Инжил бла Забур

¹ Раббийге жангы зикир этигиз! Битеу жер, Раббийге зикир этигиз!

² Раббийге зикир айтыгъыз, Аны атына шукур этигиз, Аны къутхарыуун кюнден кюннге айтып билдиригиз!

³ Аны махтауун миллетледе, Аны сейир ишлерин битеу халкълада билдиригиз!

⁴ Нек десегиз Раббий уллуду эмда кёп махтау тийишли Олду, Ол тейрилени барындан да къоркъунчлуду.

⁵ Нек десегиз халкъланы тейрилери бары да идолладыла, Раббий а кёклени жаратханды.

⁶ Аламатлыкъ бла уллулукъ Аны аллындады, кюч бла ариулукъ Аны сыйлы юйюндеди.

⁷ Халкъланы тайпалары Раббийге тийишлисин беригиз, Раббийни махтауун бла къудуретин билдиригиз.

⁸ Раббийге, Аны атына тийишли махтау беригиз, къурман келтирип, аны арбазларына киригиз.

⁹ Аны сыйлы ариу журтунда Раббийге сеждагъа барыгъыз. Битеу жер, Аны аллында титире!

¹⁰ Миллетлеге былай айтыгъыз: «Раббий патчахлыкъ этеди! Ол себепден дуния бекди, къымылдарыкъ тюйюлдю. Ол тюзлюк бла халкълагъа сюд этерикди».

¹¹ Кёкле сюйюнсюнле, жер да къууанч этсин, тенгиз да эм битеу анда болгъанла да таууш этсинле.

¹² Аулакъ да эм битеу анда болгъан да сюйюнсюн, агъачдагъы битеу терекле да Раббийни аллында къууанып зикир айтсынла;

¹³ Нек десегиз Ол келеди, жерге сюд этерге келеди. Ол, дуниягъа тюзлюк бла, халкълагъа да Кесини хакъ кертилиги бла сюд этерикди.