Забур 94 - Сыйлы Инжил бла Забур

¹ Келигиз, Раббийге зикир этейик, бизни къутхарыучу Къаягъа къууанып къычырайыкъ!

² Махтау салыу бла Аны аллына барайыкъ, зикир айтыу бла Анга сюйюнюп къычырайыкъ!

³ Нек десегиз Раббий уллу Аллахды эм битеу тейрилени бийлеген уллу Патчахды.

⁴ Жерни теренликлери Аны къолундадыла, тауланы башлары да Аныдыла.

⁵ Тенгиз Аныды, аны да Ол жаратханды, къуру жерни да Аны къоллары болдургъандыла.

⁶ Келигиз, сеждагъа барайыкъ, баш урайыкъ, бизни Жаратхан Раббийни аллында тобукъланайыкъ.

⁷ Нек десегиз бизни Аллахыбыз Олду, биз Ол кютген халкъбыз эм Аны къолу жюрютген къойлабыз. Бюгюн Аны ауазын эшитсегиз, Ол былай айтады:

⁸ «Мерибадача, Мени къум тюзде сынагъан кюнюгюзде кибик, жюреклеригизни терсакъыл этмегиз.

⁹ Ол къум тюзде аталарыгъыз Мени тинтип сынагъандыла эмда Мени ишлерими кёргендиле.

¹⁰ Мен бу тукъумгъа къыркъ жылны чамланнганма эм: „Бу, жюреги бла ажашхан халкъды, ала Мени жолларыма тюшюнмегендиле.

¹¹ Ол себепден Мен ачыуум бла ант этгенимча, ала Мени берлик ырахатлыгъыма кирлик тюйюлдюле“ дегенме».