Забур 93 - Сыйлы Инжил бла Забур

¹ Дерт жетдириучю Аллах, дерт жетдириучю Раббий Аллах, Кесинги кёргюзт!

² Жерни Сюдюсю, тур, ёхтемлени айыпларына тюбет!

³ Къачаннга дери, Раббий, аман адамла, къачаннга дери аман адамла кёл кенгдирип турлукъдула?

⁴ Ала ёхтем сёзле къусадыла, битеу законсузлукъ этиучюле кеслерин уллудан кёредиле.

⁵ Сени халкъынгы малтайдыла, Раббий, Сени туудукъларынгы унукъдурадыла.

⁶ Башсыз къатынны бла киргинчини ёлтюредиле, ёксюзлени да жанларын аладыла

⁷ Эмда: «Раббий кёрлюк тюйюлдю, Якъупну Аллахы биллик да тюйюлдю», – дейдиле.

⁸ Ангылаусуз адамла, акъыл жыйыгъыз! Жукъбилмезле, сиз къачан акъыллы боллукъсуз?

⁹ Къулакъны орнатхан эшитмезми? Кёзню болдургъан кёрмезми?

¹⁰ Миллетлени низамгъа салыучу, адамгъа акъыл юйретиучю сизни уялтмай къалай къояр?

¹¹ Адамланы ойлашыулары фана болгъанын Раббий биледи.

¹² Раббий, Сен анга ангылатхан эм Сен аны законларынга юйретген адам насыплыды,

¹³ Аман адамлагъа уру къазылып бошалгъынчы, жарсыулу кюнледе анга тынчлыкъ берликсе.

¹⁴ Нек десенг Раббий Кесини халкъын атарыкъ тюйюлдю эм Кесини туудукъларын къоярыкъ тюйюлдю.

¹⁵ Нек десенг сюд тюзлюкге къайтырыкъды, битеу тюз жюреклиле аны ызындан барлыкъдыла.

¹⁶ Аманлыкъчылагъа къажау мени ючюн ким турлукъду? Законсузлукъ этиучюлеге къажау мени ючюн ким сюелликди?

¹⁷ Раббий манга болушуучу болмаса эди, къысха заманда мени жаным ахыратда тынар эди.

¹⁸ Мен: «Аягъым тентирейди», – деп айтхан заманымда, Раббий, Сени мархаматынг манга болушханды.

¹⁹ Мени жюрегимде къайгъыларым кёбейген заманда, Сени жапсарыуларынг мени жанымы къууандырадыла.

²⁰ Законлары бла зулму этиучю халеклеучюлени сюд этиучю жерлери бла Сени байламынг болурму?

²¹ Тюзлюклюню жанына ала жыйын болуп атыладыла эмда терсликсизге сюд этип къанын тёгедиле.

²² Алай болгъанлыкъгъа, мени къалам Раббийди, мен ышыкъ тапхан къаям да мени Аллахымды.

²³ Ол аланы законсузлукъларын аланы юслерине айландырлыкъды, аланы аманлыкъ этиулери бла да аланы къырлыкъды, бизни Раббий Аллахыбыз аланы къырлыкъды.