Забур 91 - Сыйлы Инжил бла Забур

¹ Зикир. Шабат кюннге жыр.

² Раббийге шукур этиу эмда Уллу Аллах, Сени атынга махтау зикир айтыу,

³ Он къыллы къобуз бла эм арфа бла эмда саз бла зикир айтып,

⁴ Сени мархаматынгы эрттенликде, Сени хакъ кертинги да кечегиде билдириу насыпды.

⁵ Нек десенг Раббий, болдургъан затларынг бла мени къууандыргъанса, Сени къолларынгы ишлерине мен сюйюнюп зикир айтама.

⁶ Сени ишлеринг къалай уллудула, Раббий! Сени ойлашыуларынг аламат терендиле!

⁷ Акъылы жетмеген адам аны билмейди, жахил да аны ангыламайды.

⁸ Ёмюрлеге думп болур ючюн, аман адамла кырдыкча ёседиле, законсузлукъ этиучюле да чагъадыла.

⁹ Раббий, Сен а ёмюрледе да бийиксе!

¹⁰ Ол себепден, Сени душманларынг, Раббий, – Сени душманларынг жоюллукъдула, битеу законсузлукъ этиучюле да чачыллыкъдыла.

¹¹ Мени мюйюзюмю уа Сен, кийик бугъаны мюйюзюча кётюрлюксе, мен жангы зейтун жау бла майланнганма.

¹² Мени кёзюм душманларыма кёл кенгдирип къарайды, мени къулакъларым да манга къажау тургъан аманлыкъчыланы жоюлгъанларын эшитедиле.

¹³ Тюзлюклю пальмача чагъады, Ливанда кедр терекге ушаш ёсюп турады.

¹⁴ Раббийни юйюнде орнатылгъанла, бизни Аллахыбызны арбазларында чагъадыла.

¹⁵ Ала къартлыкъларында да битимлидиле, шатыкдыла эм жашилдиле,

¹⁶ «Раббий тюзлюклюдю, Ол мени къаямды эмда Анда ётюрюк зат жокъду», – дейдиле.