Забур 90 - Сыйлы Инжил бла Забур

¹ Уллу Аллахны мекямында жашагъан, неге да кючю жетген Аллахны ауанасында тынчаяды.

² Раббийге: «Мени ышыгъым эм мени къалам, мен Анга ышанып тургъан Аллахым!» – дейди.

³ Ол сени тутуучуну тузагъындан, къыргъан ауруудан къутхарлыкъды.

⁴ Кесини къанатлары бла сени жабарыкъды, Аны къанатларыны тюбюнде къоркъуусуз боллукъса; аны хакъ кертиси къоруулаучуду эм сакълаучуду.

⁵ Кечегиде уллу къоркъууладан, кюндюз атылгъан окъдан,

⁶ Къарангыда жюрюген ёлюр ауруудан, кюн ортада халек этиучю жукъгъан ауруудан къоркъурукъ тюйюлсе.

⁷ Сени къатынгда мингле, сени онг жанынгда да он мингле къырылырла, санга уа жууукълашырыкъ тюйюлдю.

⁸ Жаланда кёзлеринг бла къарарыкъса эмда аман адамлагъа дерт жетдирилгенин кёрлюксе.

⁹ Нек десенг сен: «Мени ышаннганым Раббийди», – дегенсе, сен кесинге ышыкъгъа Уллу Аллахны сайлагъанса.

¹⁰ Санга аманлыкъ боллукъ тюйюлдю, къыргъан ауруу да сени мекямынга жууукълашырыкъ тюйюлдю.

¹¹ Нек десенг битеу жолларынгда сени сакъларгъа сени Кесини мёлеклерине аманат этерикди.

¹² Ала сени къолларында элтирикдиле, аягъынг ташха да абынмаз.

¹³ Асланны бла кобраны аягъынг бла басарыкъса, жаш асланны бла жилянны да малтарыкъса.

¹⁴ «Ол Мени сюйгени ючюн, аны къутхарлыкъма; ол Мени атымы билгени себепли, аны къорууларыкъма.

¹⁵ Ол Менден тилек этерикди, Мен аны тилегин къабыл этерикме, къайгъысында Мен аны биргесинеме, аны къутхарлыкъма эмда аны махтаулу этерикме.

¹⁶ Аны узакъ ёмюрден тойдурлукъма эм къутхарыууму анга кёргюзтюрюкме», – дейди Аллах.