Забур 89 - Сыйлы Инжил бла Забур

ТЁРТЮНЧЮ КИТАП

¹ Аллахны адамы Мусаны тилеги.

² Раббий! Сен бизге тукъумдан тукъумгъа да ышыкъса.

³ Таула тууардан да, Сен жерни бла дунияны къурардан да алгъа, ёмюрледен ёмюрлеге да Сен Аллахса.

⁴ Сен адамны топуракъгъа къайтараса эмда: «Адам улула, къайтыгъыз!» – дейсе.

⁵ Нек десенг Сени кёзлеринги аллында минг жыл, ол озгъан тюненеги кюн кибикди эм кечеги кезиу кибикди.

⁶ Сен аланы ырхы элтгенча алып кетесе; ала тюш кибикдиле, эрттенликде ёсген, эрттенликде чакъгъан эм кёгерген, ингирге кесилген эм къуругъан ханс кибикдиле.

⁷ Нек десенг Сени ачыуланыуунгдан биз думп болуп барабыз эмда Сени чамланыуунгдан биз абызыраудабыз.

⁸ Сен бизни законсузлукъларыбызны аллынгда, бизни таша гюняхларыбызны да бетинги жарыгъыны аллында салгъанса.

⁹ Бизни битеу жашау кюнлерибиз Сени чамланыуунгда озгъандыла, биз жылларыбызны ынчхау бла ётдюребиз.

¹⁰ Бизни ёмюрюбюзню узунлугъу жетмиш жылды, бек къарыулу эсег’а сексен жылды. Жашауубузну бек иги кезиую да урунуу бла аурууду, нек десенг терк ётедиле, биз да учуп барабыз.

¹¹ Сен къоркъутхан кезиуде, Сени ачыуланыуунгу эм Сени чамланыуунгу кючюн ким биледи?

¹² Биз терен акъыллы жюрек алыр кибик, кюнлерибизни алай тергерге бизге юйрет.

¹³ Бизге къара, Раббий! Къачаннга дери чамланып турлукъса? Кеси къулларынга жазыкъсын.

¹⁴ Сени ахшылыгъынг бла бизни эртте тойдур, сора биз битеу кюнлерибизде сюйюнюрбюз эм къууанч этербиз.

¹⁵ Сен бизни унукъдургъан кюнлеринг ючюн, биз къыйынлыкъ кёрген жылла ючюн бизни жарыт.

¹⁶ Сени къулларынга ишинг, аланы уланларына да аламатлыгъынг кёрюнсюн.

¹⁷ Бизни Раббий Аллахыбызны ыразылыгъы бизни юсюбюзде болсун эм бизни къол ишибизде бизни жетишимли эт, бизни къол ишибизде бизни жетишимли эт.