Забур 88 - Сыйлы Инжил бла Забур

¹ Эзрахлы Этанны юйретиу зикири.

² Раббий, Сени ахшылыкъларынгы юсюнден ёмюрледе да зикир айтырыкъма, Сени хакъ кертинги тукъумдан тукъумгъа ауузум бла билдирип турлукъма.

³ Нек десенг былай айтама: «Мархаматынг ёмюрлеге салыннганды, Сен хакъ кертинги кёкледе бегитгенсе».

⁴ «Мен сайлагъаным бла кесамат этгенме, Мени къулум Дауутха ант этгенме:

⁵ Сени урлугъунгу ёмюрлеге да бегитирикме, Сени тахтангы тукъумдан тукъумгъа да къурарыкъма», – деп айтханса.

⁶ Кёкле да Сени аламат ишлеринге махтау саллыкъдыла, Раббий, Сени хакъ кертинги да сыйлыланы жыйылыуунда айтырыкъдыла.

⁷ Нек десенг кёкледе Раббийге тенг боллукъ кимди? Аллахны уланларыны арасында Раббийге ушаш боллукъ кимди?

⁸ Аллахха сыйлыларыны жыйынында уллу хурмет этиледи, битеу Аны тёгерегиндегиле Андан къоркъадыла.

⁹ Неге да кючю жетген Раббий Аллах! Сенича кючлю кимди, Раббий? Сени хакъ кертинг да Сени тёгерегингдеди.

¹⁰ Тенгизни къутуруууна Сен бийлик этесе, аны толкъунлары кётюрюлген заманда, Сен аланы тохтатаса.

¹¹ Сен Рахапны къоратып жокъ этгенсе, Сен душманларынгы кючлю къолунг бла чачханса.

¹² Кёкле Сеникиледиле, жер да Сеникиди; дунияны да, битеу анда болгъанланы да Сен къурагъанса.

¹³ Шималны эм къыбыланы Сен жаратханса, Табор эм Хермон Сени атынгы хакъынгдан къууанадыла.

¹⁴ Сени билек кючюнг уллуду, Сени къолунг къарыулуду, Сени онг къолунг бийикди!

¹⁵ Тюз хукму эм тюзлюк Сени тахтангы мурдоруду, мархамат бла хакъ керти Сени аллынгда барадыла.

¹⁶ Сур быргъыны чакъыргъан тауушун билген халкъ насыплыды! Ала Сени бетинги жарыгъында жюрюйдюле, Раббий.

¹⁷ Сени атынгы хакъындан сау кюнню къууанадыла эмда Сени тюзлюгюнг бла кётюрюледиле.

¹⁸ Нек десенг аланы кючлери эм махтаулары Сенсе эмда Сени игилигинг бла бизни мюйюзюбюз кётюрюледи.

¹⁹ Бизни къоруулаучубуз Раббийденди, бизни патчахыбыз да Израильни Сыйлысынданды.

²⁰ Сен бир заманлада Сени сыйлынга кёрюнюу бла сёлешгенсе эмда былай айтханса: «Мен жигитлиги болгъаннга болушлукъ этгенме, халкъдан сайланнганны кётюргенме.

²¹ Мен къулум Дауутну тапханма, аны сыйлы зейтун жауум бла майлагъанма.

²² Мени къолум анга болушурукъду, Мени билек кючюм аны кючлендирликди.

²³ Душман аны хорларыкъ тюйюлдю, законсуз адам да анга зулму этерик тюйюлдю.

²⁴ Аны душманларын аны аллында ууатырыкъма, аны кёрюп болмагъанланы да урлукъма.

²⁵ Мени хакъ кертим да, Мени мархаматым да аны блады, Мени атым бла аны мюйюзю кётюрюллюкдю

²⁶ Эмда аны къолун тенгизни юсюне, аны онг къолун да баргъан сууланы юсюне саллыкъма.

²⁷ „Сен мени Атамса, мени Аллахымса эм мени къутхарыучу къаямса“ деп ол Мени чакъырлыкъды.

²⁸ Мен да аны, жерни патчахларыны барындан да багъалы, тюнгюч этерикме.

²⁹ Мархаматымы анга ёмюрге да сакъларыкъма, Мени аны бла кесаматым ышаннгылы боллукъду.

³⁰ Аны урлугъун ёмюрден ёмюрге, аны тахтасын да кёкню кюнлерича бардырлыкъма.

³¹ Аны уланлары Мени законуму къойсала эмда Мени фарызларым бла жюрюмеселе,

³² Мени жорукъларымы бузсала, Мени буйрукъларымы да тутмасала,

³³ Аланы законсузлукъларын таякъ бла, аланы терсликлерин да уруула бла жокъларыкъма.

³⁴ Мархаматымы уа андан тыярыкъ тюйюлме, кертичилигимден да таярыкъ тюйюлме.

³⁵ Кесаматымы бузарыкъ тюйюлме эмда ауузумдан чыкъгъанны тюрлендирлик тюйюлме.

³⁶ Мен бир кере Кесими сыйлылыгъым бла ант этгенме, Дауутха ётюрюк айтырмамы?

³⁷ Аны урлугъу ёмюрледе, аны тахтасы да, кюнча, Мени аллымда болуп турлукъду,

³⁸ Ёмюрге да айча, ол кёкледе болгъан тюз шагъатча къаты боллукъду», – дегенсе.

³⁹ Энди уа Сен майлагъанынгы атханса эм сан этмей къойгъанса, анга чамланнганса.

⁴⁰ Сен Къулунг бла этген кесаматынгы сансыз этип къойгъанса, аны тажын балчыкъгъа атханса.

⁴¹ Аны битеу бурууларын бузгъанса, аны къалаларын оюп къойгъанса.

⁴² Битеу жол бла ётгенле аны тонайдыла, ол кесини къоншуларында хыликкялыкъ болгъанды.

⁴³ Сен аны жауларыны онг къолларын кётюргенсе, аны битеу душманларын къууандыргъанса.

⁴⁴ Сен аны къылычыны жютюсюн артха айландыргъанса эмда урушда аны кючлендирмегенсе.

⁴⁵ Андан жылтырауну алгъанса, аны тахтасын да жерге аудургъанса.

⁴⁶ Аны ёмюр кюнлерин къысхартханса, аны уятха къалдыргъанса.

⁴⁷ Раббий, къачаннга дери тохтаусуз бугъуп турлукъса, Сени чамланыуунг отча жанып къачаннга дери турлукъду?

⁴⁸ Мени ёмюрюм къалай къысха болгъанын эсинге тюшюр. Сен битеу адам улуланы не фанагъа жаратханса!

⁴⁹ Жашагъан эм ёлюм кёрмеген, кесини жанын ахыратны къолундан къутхаргъан адам бармыды?

⁵⁰ Раббий, Сени алгъыннгы мархаматларынг къайдадыла? Сен быланы Дауутха берирге хакъ кертинг бла ант этгенсе.

⁵¹ Раббий, битеу кючлю халкъладан Сени къулларынг сынагъан бедишликни ичимде жюрютгеними эсинге ал.

⁵² Сени душманларынг къалай аман айтадыла, Раббий, Сен майлагъанны ызын къалай ыспассыз этедиле.

⁵³ Раббий ёмюрге да алгъышлыды! Амин, амин.