Забур 87 - Сыйлы Инжил бла Забур

¹ Жыр. Къорах улуланы зикирлери. Хорну таматасына: Махалал Леаннот атлы макъам бла айтылады. Эзрахлы Хеманны юйретиу зикири.

² Мени къутхарыучу Раббий Аллах! Сени аллынгда кюндюз да, кече да къычырыкъ этеме.

³ Мени тилегим Сени аллынга келсин, мени жалбарыуума къулагъынгы сал.

⁴ Нек десенг мени жаным къыйынлыкъладан тойгъанды, мени жашауум да ахыратха жууукълашханды.

⁵ Мени къабыргъа тюшгенлеге тенг этедиле. Мен, къарыуу болмагъан,

⁶ Ёлгенлени арасында атылып къалгъан адамча – Сен аланы энди эсинге да келтирмеген эмда ала Сени къолунгдан атылып къалгъан, ёлтюрюлгенлеча болуп къалгъанма.

⁷ Сен мени ахырат уругъа, къарангыгъа, тюпсюзге салып къойгъанса.

⁸ Сени чамланыуунг манга ауурлукъ салгъанды, битеу толкъунларынг бла мени онгсуз этгенсе.

⁹ Сен мени танышларымы менден узайтханса, мени алагъа жийиргенчли этгенсе. Мен тутмакъ болуп къалгъанма, чыгъаргъа да болалмайма.

¹⁰ Мени кёзюм къыйынлыкъдан онгсуз болгъанды. Сау кюнню мен Сенден тилек этип тургъанма, Раббий, Санга къолларымы узатып тургъанма.

¹¹ Сен ёлгенлеге сейир ишле этерик болурмуса? Ахыратдагъыла къобуп Санга махтау саллыкъ болурламы?

¹² Неда Сени мархаматынг къабырдамы, Сени хакъ кертинг да чириу жердеми билдирилликди?

¹³ Сени сейирликлеринги къарангыдамы, Сени тюзлюгюнгю да унутуу жердеми билдирликдиле?

¹⁴ Алай а мен, болушлукъ излеп Санга къычырыкъ этеме, Раббий, эмда эрттенликде эртте мени тилегим Сени аллынга барады.

¹⁵ Раббий, мени жанымы нек ташлайса, менден бетинги нек жашыраса?

¹⁶ Мен жашлыгъымдан бери да харипме эмда ёлюмге жууукъма, Сени азапларынгы чегеме эмда абызырайма.

¹⁷ Сени чамланыуунг мени юсюм бла озгъанды, Сени къоркъутууларынг мени унукъдургъандыла.

¹⁸ Сууча, хар кюнден мени тёгерегимден аладыла, бары да бирге мени къуршалайдыла.

¹⁹ Сен шуёхуму бла керти тенгими менден узакъ этгенсе, мени танышларым кёрюнмейдиле