Забур 85 - Сыйлы Инжил бла Забур

Дауутну тилеги.

¹ Раббий, къулагъынгы ийилт эмда мени тилегими къабыл эт, нек десенг мен жарлыма эм факъырма.

² Мени жанымы сакъла, нек десенг мен Сени сыйлы кёреме. Мени Аллахым, Санга ышаннган къулунгу къутхар.

³ Раббий, манга мархамат эт, нек десенг хар кюнден Сенден тилек этеме.

⁴ Сени къулунгу жанын къууандыр, нек десенг Раббий, мен жанымы Санга кётюреме.

⁵ Нек десенг Сенден тилек этгенлени барына да, Раббий, Сен ахшылыкълыса, мархаматлыса эм кёп ырахматлыса.

⁶ Раббий, мени дууамы къабыл эт эмда мени тилек этген ауазыма тынгыла.

⁷ Мен къайгъы кюнюмде Санга къычырыкъ этеме, нек десенг Сен мени тилегими къабыл этериксе.

⁸ Эй Раббий, тейрилени арасында Сени кибик жокъду эм Сени этген ишлеринг кибик ишле да жокъдула.

⁹ Сен жаратхан битеу миллетле келликдиле эм Сени аллынгда сежда этерикдиле, Раббий, эмда Сени атынга махтау саллыкъдыла.

¹⁰ Нек десенг Сен уллуса, Сен сейир ишле этесе; Аллах Сен бирсе.

¹¹ Раббий, мени Кеси жолунга юйрет, сора Сени хакъ кертинге кёре жюрюрюкме; мен сени атынга хурмет этер ючюн мени тюз жюрекли эт.

¹² Мени Раббий Аллахым, битеу жюрегимден, Санга шукур этип эмда Сени атынга ёмюрге да махтау салып турлукъма.

¹³ Нек десенг Сени манга мархаматынг уллуду, Сен мени жанымы ахыратны теренликлеринден къутхаргъанса.

¹⁴ Аллах! Ёхтемле манга къажау тургъандыла, зулмучуланы жыйымдыгъы да мени жанымы излейди, ала Сени эслерине алмайдыла.

¹⁵ Алай болгъанлыкъгъа Сен ырахматлы эм халал жюрекли, кёп тёзюмлю эм кёп мархаматлы, хакъ керти Раббий Аллах,

¹⁶ Манга къара эм манга мархамат эт, мен къулунга кючюнгю бер эмда къарауашынгы уланын къутхар.

¹⁷ Манга ахшылыгъынгы илишанын кёргюзт, мени кёрюп болмагъанла аны кёрюп уялсынла; нек десенг Раббий, Сен манга болушдунг эм мени жапсардынг.