Забур 84 - Сыйлы Инжил бла Забур

¹ Хорну таматасына: Къорах улуланы зикирлери.

² Раббий! Сен жеринге жазыкъсыннганса, Якъупну жесирден къайтаргъанса.

³ Халкъынгы законсузлугъун кечгенсе, аны битеу гюняхларын къурутханса.

⁴ Ачыуунгу битеулей артха алгъанса, чамланыуунгу къатылыгъын тыйгъанса.

⁵ Бизни къутхарыучу Аллах, бизни жангыдан къура эмда бизге чамланыуунгу тохтат.

⁶ Бизге ёмюрге да чамланыпмы турлукъса, ачыуунгу тукъумдан тукъумгъа дерими жетдирликсе?

⁷ Сени халкъынг Сени юсюнгден къууаныр ючюн, бизни жангыдан тирилтмей къалай къоярса?

⁸ Раббий, мархаматынгы бизге кёргюзт, Сени къутхарыуунгу да бизге бер.

⁹ Раббий Аллахны не айтырыгъына тынгылайым. Ол Кесини халкъына эм Кесини сыйлыларына ырахатлыкъ деп айтырыкъды, ала дагъыда оюмсузлукъгъа тюшмесинле ансы.

¹⁰ Бизни жерибизде махтау турур ючюн, Андан къоркъгъанлагъа Аны къутхарыуу алай жууукъду!

¹¹ Мархамат бла хакъ керти тюбеширикдиле, тюзлюк бла ырахатлыкъ уппа этиширикдиле.

¹² Хакъ керти жерден чыгъарыкъды, тюзлюк да кёкледен къарарыкъды.

¹³ Раббий ахшылыкъ берликди, бизни жерибиз да кесини битимин берликди.

¹⁴ Тюзлюк Аны аллында барлыкъды эмда Аны аякъларына жол хазырларыкъды.